Read KapsikiDC Ɛzɛkiyɛl 32 Bible Online

Ɛzɛkiyɛl 32 - KapsikiDC bible

Ɛzɛkiyɛl 32

¹Ma mbe kwa meŋe bakeghəmbe ta va, mbe hɛ kwa ghate te tere kwa meŋe bakeghəmbe kwa sebe ta nya fəhwe ŋkwa mbeli ne, ma ke Mahwətə sha 'ya:

²«Wəndə ŋelɛ, gha nehwene kənəa Farawon, meghea ka Ɛzhipte, ma pa na sha gha: Kala katsala nivɛrə nya hwa mbeli nza ta ŋa. Ama kala kele nya kwa ndərə na ɓiyitsa: katsa bamba na kwa hələa ŋa nya wəba, kawedazle yɛmə na le seɗa ta ŋa ba'a kahwehwəzləɓə yɛ hələ na.

³Wa nya ghena nya geze Shala Mahwətə nya: Ma vəa ŋkwa nya tetsenete geva hwelefefi kwele kwele ne, katepelake bararawea ɗa 'ya kənəa gha ba'a katentsehe ŋa hɛ le kasame mɛa hələbə.

⁴Katenegha ŋa 'ya te hɛɗi, katenegha ŋa 'ya kwamte hwa gamba. Katepele nda hweŋkwa 'ya ke yɛ 'yɛ kame kənəa gha ba'a ke wəshi keseɗa nyi hwa gamba kase kazeme slia ŋa.

⁵Katebete slia ŋa nyi ketene 'ya hwa yɛ ghweme ba'a kateviɗi yɛ zlərə 'ya le.

⁶Kateɓasle hɛɗi 'ya le mimia ŋa, bətə tenza yɛ ghweme mbe ba'a viɗi tenza yɛ hələ ve.

⁷Ma vəa ŋkwa nya tezamte geva sebe te gha ne, zhikwətəkwə tenza ŋkwa nya pelɛ ghweme, ngərə ngərə tenza yɛ saseregwa. Katedəpə ləmbə 'ya kənəa veci ba'a kateɓele tere we.

⁸Ma tewəmbəreke gha ne, katedəpə wəshi nyi keɓele pelɛ ghweme 'ya ba'a kateve ŋkwesle 'ya te hɛɗia ŋa. 'Ya Shala Mahwətə nde gezete.

⁹Kwele kwele hwelefefi nyi keteghazlənə vəa ŋkwa nya gezave nda kiɗi ta ŋa 'ya ke hɛ, pa te hɛɗi nyi ɗepetema na.

¹⁰Ma tewəmbəreke gha ne, kwele kwele hwelefefi nyi tetaze mehele ta nci. Katedake ka meghea kɛfia nci vəa ŋkwa nya kafete kafayɛa ɗa 'ya kənəa hɛ. Ma te veci nya teteɗe na ne, katefɛa hɛ yitea bare bare we, yayata wəndəa nci kaghazlənə va za ta mpia ŋkɛ.

¹¹Kwa nza ŋkɛ ne, wa nya ghena nya geze Shala Mahwətə nya: Katese kafayɛa meghea ka Babilone kadzete gha.

¹²Kateghwene ka sewajɛ nyi ghyana ghyana ma 'ya se hwa kweci hwelefefi kaza sebe te mbelia ŋa. Kateza sebe hɛ te Ɛzhipte nya kekele ghə nya, mɛke tenza sebe te mbeli nyi mbe.

¹³Pɛtɛ teza sebe 'ya te wəshi keseɗa nyi va gha nyi dzeyi mɛa hələ. Mba yɛmə katewedazle va seɗa ta wəndə ŋelɛ keɗema va yɛ cɛpea wəshi keseɗa we.

¹⁴Katezhɛne nda mpi 'ya ke yɛmə nyi mbe Ɛzhipte ba'a katehwɛ yɛ hələ laɗaɗa kala n'yi. 'Ya Shala Mahwətə nde gezete.

¹⁵Katezhɛre hɛɗia Ɛzhipte 'ya kaɓerama, katefə wəshi nyi mbe 'ya pɛtɛ ba'a kateza sebe 'ya te mbeli nyi mbe. Tsagha gɛ, kateɗepete mbeli 'ya ya kaMahwətə.»

¹⁶Nya ya kanehwene nya tegha pɛtɛa mia kweci hwelefefi kənəa Ɛzhipte ba'a kənəa mbeli nyi kwele kwele mbe. Shala Mahwətə nde gezete.

¹⁷Ma mbe kwa meŋe bakeghəmbe ta va, te hɛ kwa meŋe mcɛfeghəmbe te tere kwa meŋe bakeghəmbe kwa sebe ta nya fəhwe ŋkwa mbeli ne, ma ke Mahwətə sha 'ya:

¹⁸«Wəndə ŋelɛ, nehwene kənəa mbeli nyi mbe Ɛzhipte. Fəghe hɛ nehwene ta ŋa zlaɓe le kweci hɛɗi nyi jama jama kadzawa zeweve ta hɛɗi, ŋkwa nya dzawa mbelia kwahɛɗi.

¹⁹Ma pa na sha hɛ: Ganyɛ ma newe mehele ta ŋayɛ yɛ ke ŋa kweci mbeli na? Dzawa mə kaɓelahe hwa kweci ka slamtema mɓɛta nyi kempənji hwa mpa.

²⁰Katebete ka Ɛzhipte hwa mbeli nyi kempə va kafayɛ. Tsetsenya ne, ɗeke ɗeke yɛ kafayɛ kanzere ŋkwa. Mpəmte yɛ Ɛzhipte le mbeli nyi mbe hɛ.

²¹Ma kwagha hwa mbelia kwahɛɗi ne, ma ke ka katsala kɛfi ba'a mbeli nyi kese yitea Ɛzhipte vəashi sha tsa lewela: ‹Sawa yasawa ka slamtema mɓɛta nyi kempənji nyi hwa mpa hɛ kaɓelahe hwa gheɓəmə!›

²²Kwagha meghea ka Asiri le ka sewajɛa ŋkɛ. Dzasle ŋkɛ kwa kwele ta ka sewajɛa ŋkɛ. Kwamte mpa mpəmte hɛ mbeli pɛtɛ.

²³Kwa zeweve ta ŋa mbelia kwahɛɗi kwele ta nci, dzeyi yiteyɛ ŋa meghea nci. Kwamte mpa mpəmte hɛ mbeli, hɛ nyi kese kadake mbeli teghweme.

²⁴Kwagha meghea ka Ɛlam le ka sewajɛa ŋkɛ. Dzasle ŋkɛ kwa kwele ta ka sewajɛa ŋkɛ nyi kempənji hwa mpa. Ma ka slamtema mɓɛta nyi kedake mbeli teghweme nyi ne, nahe hɛ kedzawa zeweve ta hɛɗi. Bətə mbe hawe zlaɓe le kweci mbeli nyi kempəmte geva.

²⁵Kaganda ne, meɓelahe yɛ meghea ka Ɛlam le ka sewajɛa ŋkɛ hwa mbeli nyi kempə kwamte mpa. Dzasle ŋkɛ kwa kwele ta ka sewajɛa ŋkɛ. Kwamte mpa mpəmte geva ka slamtema mɓɛta shɛhɛ pɛtɛ. Hɛ ka se kadake mbeli nyi teghweme, ama tsetsenya ne, bətə hɛ mbe hawe zlaɓe le mbeli nyi kempəmte geva.

²⁶Kwagha Mɛshɛk, Təwbal ba'a ka sewajɛa nci. Dzasle hɛ kwa kwele ta ka sewajɛa nci. Kwamte mpa mpəmte geva ka slamtema mɓɛta shɛhɛ. Pɛtɛ dakenji mbeli nyi teghweme va hɛ.

²⁷Kelamte hɛ mbeli le zləvə kala ka katsala kɛfi nyi vəashi nyi kese kadake mbeli nyi teghweme we. Le wəshi kempa ta nci lamte ka katsala kɛfia shɛhɛ mbeli. Yitea ghəa nci beteyi kafayɛa nci mbeli ba'a te geva ta nci betate geləa nci mbeli.

²⁸Ŋa ŋayɛ nya və gɛ ka Ɛzhipte, katempə yɛ ba'a katela ŋayɛ mbeli hwa ka slamtema mɓɛta nyi kempəmte geva kwamte mpa.

²⁹Kwagha ka Ɛdom, ka meghea kɛfia nci ba'a mbeli nyi te ghəa nci. Ya tsemanyɛ se hɛ kaka katsala ne, kala mbeli nyi kempəmte geva kwamte mpa menete nda mbeli ke hɛ. Zlaɓe lamte hɛ mbeli le ka slamtema mɓɛta nyi kempəmte geva.

³⁰Kwagha mbeli nyi te ghəa hɛɗi laka bela kwa gwela perə, tsagha ka Sidon nyi kempəmte geva. Ya kwela se hɛ kadake ŋkwa vəashi ne, nahe hɛ kelamte geva zlaɓe le mbeli nyi kempə kwamte mpa. Bətə hɛ mbe hawe zlaɓe le kweci mbeli nyi kempəmte geva.

³¹Ma vəa ŋkwa nya tenakɛ ka katsala kɛfi nyi Farawon ne, gweɗakwe tenza mehele ta ŋkɛ va mpə ta ka sewajɛa ŋkɛ. Kwa nza ŋkɛ ne, kwamte mpa tempə hɛ le ka sewajɛa ŋkɛ. 'Ya Shala Mahwətə nde gezete.

³²Nahe 'ya kesərəakɛ Farawon kadake mbeli nyi te ghweme, ama tsetsenya ne, katela hɛ mbeli le ka sewajɛa ŋkɛ hwa ka slamtema mɓɛta nyi kempəmte geva kwamte mpa.» Nya ya kaghena nya geze Shala Mahwətə.