Read KapsikiDC Ɛzɛkiyɛl 34 Bible Online

Ɛzɛkiyɛl 34 - KapsikiDC bible

Ɛzɛkiyɛl 34

¹Ma ke Mahwətə sha 'ya:

²«Wəndə ŋelɛ, zlape nda ghena ta ɗa ke mbeli nyi te ghəa ka Israyɛl, ma pa na sha hɛ: Wa nya ghena nya geze Shala Mahwətə nya: Ndiremi ya te mbeli nyi te ghəa ka Israyɛl nyi kedambeghənji kaya ghəa nci! Ashɛ wəshi keseɗa yaya ka ya wəshi wəka?

³Pɛtɛ yɛ mɓisəmte ŋ'wa mbe timɛti, pɛtɛ yɛ tsehemte shinti te hɛ kezha tsa lekwesa ta ŋayɛ, wəshi keseɗa nyi dɛɓedɛa dɛɓedɛa yahene yɛ. Ama keyate hɛ yɛ megela we.

⁴Kese gheyɛ kapəkə wəshi keseɗa nyi dewə berete sate te ŋkwa we, kese gheyɛ kasa nda ghwɛ ke nyi shewə va zereghwe we, kese gheyɛ kahwepe seɗa ta nyi keɓelenji we, kese gheyɛ kazhɛne nyi kecaŋwe caŋwenji kase ba'a kazele nyi kezanji we. Ama zleɗe yazleɗe timɛti yɛ le berete ba'a le ntɛaŋentɛa mehele.

⁵Kwetɛ kwetɛŋe wəshi keseɗa tazenji va nya ɗema wəndə yitea hɛ. Kawəshi kezeme ta wəshi nyi hwa gamba zhɛrenji hɛ.

⁶Nahe timɛtia ɗa ketazeyi geva kwetɛ kwetɛŋe dzeme hwa yɛ ghweme ba'a dzeme vare yɛ wəmbə. Nahe wəshi keseɗa ta ɗa ketazeyi geva te yayata bela ta hɛɗi kaɗema wəndə kese kapele ntsə yitea hɛ, wəndə shɛ kese kazele hɛ we.

⁷Vatse gɛ ka ya wəshi, ve mə sleme yitea ghena nya geze Mahwətə:

⁸Kazeme ŋayɛ 'ya kafela, 'ya Shala Mahwətə: Pɛtɛ ka ghərəa kɛfi kekesakawa wəshi keseɗa ta ɗa, pɛtɛ wəshi nyi hwa gamba kezakawa sebe te timɛti ɗa ba'a kezezehwe hɛ, va nya ɗema ka ya wəshi ɗa kese kapele ntsə yitea hɛ. Ghəa nci yase hɛ kanewe ghweme te, kaɗema ya wəshia ɗa.

⁹Ka ya wəshi, ghwene mə sleme ta ŋayɛ kafa ghena ta ɗa:

¹⁰Wa nya ghena nya geze 'ya, 'ya Shala Mahwətə nya: 'Ya kateme te gheyɛ ka ya wəshi. Katefə wəshi keseɗa ta ɗa 'ya va gheyɛ, katefɛa ŋayɛ 'ya kezhɛne kaya hɛ. Ma tsagha, wəsə shɛ kazhɛne yɛ kaŋ'we mbe hɛ we. Pɛtɛ tezləgwə timɛtia ɗa 'ya shave mbe mɛa ŋayɛ, yitea ɗema hɛ mba kanza kawəshi kezeme ta ŋayɛ.

¹¹Kwa nza ŋkɛ ne, wa nya ghena nya geze 'ya, 'ya Shala Mahwətə nya: 'Ya le ghəa ɗa nde tezele timɛtia ɗa kezha newe ghweme te hɛ.

¹²Kala nya mene nde ya wəshi nya ketsene wəvəsəa timɛtia ŋkɛ nya ketazenyɛ kwetɛ kwetɛŋe ne, tsagha tenewe ghweme 'ya te timɛtia ɗa. Ya tema tema lənji hɛ ne, katelə 'ya kazele hɛ kase, ya ŋkwa nza dibə dibə mbe meləkwə ləkwə keɗema mbe ŋkwesle.

¹³Katedzaŋele hɛ 'ya shave hwa kweci hwelefefi, katetsene hɛ 'ya se te kweci hɛɗi nyi nza hɛ kezha zhɛne hɛ te hɛɗia nci. Kateya hɛ 'ya dzeme hwa ghweme nyi mbe Israyɛl, dzeyi kwelɛ yɛ zlərə ba'a dzeyi te ŋkwa ganji nyi nza mbeli.

¹⁴Kadzete ŋkwa nya nza gwəzə ganji teŋka hɛ 'ya, dzeme hwa ghweme nyi mbe Israyɛl tezeme gwəzə hɛ. Pelɛagha tezhɛne mpi hɛ te ŋkwa ganyɛ ba'a tezeme gwəzə ganji hɛ dzeyi hwa ghweme.

¹⁵'Ya le ghəa ɗa nde teya timɛtia ɗa, 'ya shɛ nde tezhɛne nda mpi ke hɛ. 'Ya Shala Mahwətə nde gezete.

¹⁶Ma təmə nya kezanyɛ ne, katezele 'ya. Katezhɛne nya kecaŋwe caŋwenyɛ 'ya kase. Katepeɗe seɗa ta nya keɓelenyɛ 'ya. Katesa nda ghwɛ 'ya ke nya shewə va zereghwe. Ama kateza sebe 'ya te nya keneghanyɛ keɗema nya kekelenyɛ dɛɓe dɛɓe. 'Ya nde teya wəshia ɗa laka nza tiɗiɗi.

¹⁷Kaŋa ŋayɛ, gheyɛ wəshi keseɗa ta ɗa gɛ ne, wa nya ghena nya geze 'ya Shala Mahwətə nya: 'Ya katenegha fete kwelɛ timɛti, kwelɛ yɛ gamea lɛmə le zhɛfa lɛmə.

¹⁸Kenza zeme gwəzə te ŋkwa nya nza gwəzə ganji wərə ŋayɛ wəka? Yitea wa ŋkeɗe gwəzə nyi ketene yɛ ɓiyitsa wa? Kenza sa yɛmə nya lɛŋe wərə ŋayɛ wəka? Yitea wa hwəzləɓə nya ketene yɛ le seɗa ta ŋayɛ wa?

¹⁹Nda gwəzə nyi ŋkeɗemte seɗa ta ŋayɛ yatezeme wəshi keseɗa ta ɗa nyi ketene ba'a yɛmə nya hwəzləɓəmte yɛ yatesa hɛ.

²⁰Vatse gɛ, wa nya ghena nya geze 'ya, 'ya Shala Mahwətə nya: 'Ya katenegha fete kwelɛ yɛ timɛti nyi deke deke le nyi kepahe pahe hwa wəshi keseɗa ta ɗa.

²¹Va nya tsetsəkwə nyi dewə berete yɛ le paslɛ paslɛa ba'a le slerepe, va nya mpə nda tereme yɛ ke nyi kese shewə va zereghwe yitea tazemte hɛ kwetɛ kwetɛŋe te ŋkwa nya nza gwəzə ne,

²²'ya katese kakemane timɛtia ɗa yitea ɗema ka ghərəa kɛfi kazhɛne kakese hɛ. Katenza 'ya kande negha fete kwelɛ yɛ timɛti le timɛti.

²³Nde ya wəshi kwetɛŋe yatedape nda wəshi keseɗa ta ɗa 'ya te dzeve yitea newe ghweme ŋkɛ te hɛ. Kameghe tenza ŋkɛ kala nde mene slene ta ɗa David. Gheŋkɛ nde tenewe ghweme te hɛ, kande ya wəshi ganyɛ tenza ŋkɛ.

²⁴'Ya Mahwətə le ghəa ɗa nde tenza kaShala ta nci ba'a nde mene slene ta ɗa David nde tenza kameghe te tepe ta nci. 'Ya Mahwətə nde gezete.

²⁵Katemene jikə geva ta kwelɛŋe 'ya le wəshi keseɗa ta ɗa, pɛtɛ teza sebe 'ya te wəshi keseɗa nyi hwa gamba te hɛɗi. Ma tsagha ne, kala nya ɗe timɛtia ɗa tenza hɛ kwamte te ɓerama ba'a tehɛ hɛ dzeyi te yɛ kweshɛhe.

²⁶Katesərə hɛ kanza dzeyi vare ghweme nya keveyi ɗa geva tekeleke. Kateme va 'ya te vəa ŋkɛ ba'a kewəpi wəpi tenza yɛməa va shɛ kezha hɛ.

²⁷Ŋkerɛape ŋkerɛape teya yɛ wəfe, ndeɗekə temene wəshi hɛɗi ba'a gwezlayɛ tenza mbelia ɗa te hɛɗia nci. Kateɓele sheghwə nya te welɛ va mbelia ɗa kala sla kewəza 'ya, katembele hɛ 'ya shave mbe dzeve ta mbeli nyi kezhɛrete hɛ kaka mavashi. Ma vəa ŋkwa shɛ, kateɗepete hɛ 'ya ya kaMahwətə.

²⁸Katezhɛne kweci hwelefefi kafə wəshia nci we, katezhɛne wəshi nyi hwa gamba kampeɗe hɛ we. Werete tenza hɛ ba'a wəndə shɛ katezhɛne kadake hɛ we.

²⁹Wəve ganji yateve nda 'ya ke hɛ, katezhɛne hɛ kasa yaka va ma te hɛɗia nci we. Katezhɛne kweci hwelefefi kapele zeweve yitea hɛ we.

³⁰Tsagha ne, kateɗepete hɛ 'ya ya kaMahwətə Shala ta nci, katenza 'ya le hɛ ba'a katenza Israyɛl ɓiyitsa kambelia ɗa. 'Ya Shala Mahwətə nde gezete.

³¹Gheyɛ ya kawəshi keseɗa ta ɗa, kawəshi keseɗa nyi ya 'ya, gheyɛ mbeli. 'Ya ya kaShala ta ŋayɛ. 'Ya le ghəa ɗa, Shala Mahwətə nde gezete.»