Read KapsikiDC Ɛzɛkiyɛl 35 Bible Online

Ɛzɛkiyɛl 35 - KapsikiDC bible

Ɛzɛkiyɛl 35

¹Ma ke Mahwətə sha 'ya:

²«Wəndə ŋelɛ, zhɛrete kema laka ghweme ta Ɛdom shɛ na gezete nda ghena ta ɗa ke mbeli nyi hwe.

³Ma pa na sha hɛ: Wa nya ghena nya geze Shala Mahwətə nya: 'Ya kateme te gheyɛ! 'Ya katencɛ berete ta ɗa te gha Ɛdom, kaɓerama nya dɛrɛŋe rɛŋe tezhɛre ŋa 'ya.

⁴Kakwəfi tezhɛre yɛ meleme ta ŋa 'ya, pɛtɛ tenza na keŋzla ŋzla. Ma tsagha ne, kateɗepete na 'ya ya kaMahwətə.

⁵Ndimə ndimənyɛ ɗema ntsə ta ka Israyɛl na. Vəa ŋkwa nya nza ndiremi te hɛ ne, mpɛke na hake nda mpa ke hɛ, mbe və nya kiɗiave nda kiɗi fete ta nci ke hɛ.

⁶Vatse gɛ ne, ma 'ya, 'ya Shala Mahwətə: tɛazlɛave te tepe ta mimi teve ŋa 'ya, katehwɛ mimi kwa sebe ta ŋa. Ma va nya ɗema helia ŋa kese kasla va sheke mimi ne, tɛazlɛave zlɛave tenza na hwa mimi perə.

⁷'Ya katezhɛre ghweme ta ka Ɛdom kaɓerama nya dɛrɛŋe rɛŋe, pɛtɛ tempə mbeli nyi ketedzeghwa hwe 'ya.

⁸Rayɛ tenza ŋkwa nyi dzeme hwa yɛ ghweme ta ŋa va mbeli nyi kempə mpə. Selekə lekə tenza mbeli nyi mpəmte mbeli kwamte mpa dzeyi te yɛ wəmbəa ŋa, dzeyi kwelɛ yɛ zlərəa ŋa ba'a dzeyi mɛa yɛ zlɛzlelɛŋwəa ŋa.

⁹Kaghala ghala tezhɛre hɛɗia ŋa 'ya kaɓerama, katezhɛne mbeli kanza mbe yɛ meleme ta ŋa we. Tsagha ne, kateɗepete na 'ya ya kaMahwətə.

¹⁰Ma pa na gezete: ‹Kaŋa ɗa tenza hɛɗia yɛ Israyɛl le Zhəwda, 'ya katekele hɛɗi nyi nza nya Mahwətə mbe.›

¹¹Vatse gɛ ne, kazeme 'ya kafela, 'ya Shala Mahwətə, kala hwepe wənə ba'a zlɛ nya menete nda na ke hɛ temene ŋa 'ya. 'Ya katencɛ nda ghəa ɗa ke hɛ laka ghwə nya temeha 'ya te gha.

¹²Ma tsagha, kateɗepete na 'ya ya kaMahwətə. Pɛtɛ 'ya kefate ŋele nyi ŋelekɛ ghweme nyi mbe Israyɛl na le, ma pa na sha se kageze: ‹Keŋzla ŋzla hɛ! Nahe hɛ kendeke ɓəmə geva kawəshi kezeme ta ɓəmə.›

¹³Kewəba se na kageze ghena ŋkele ntsə te 'ya, ghena fege yase na kasla te 'ya, pɛtɛ hɛ kwa sleme ta ɗa.

¹⁴Wa nya ghena nya geze 'ya Shala Mahwətə nya: Ma te veci nya tezlama kweci hɛɗi ne, kaɓerama tezhɛre ŋa 'ya.

¹⁵Ma va nya se na kamte va zlama kwa nza hɛɗia Israyɛl kaɓerama ne, kala nyagha shɛ tezhɛre ŋa 'ya. Kaɓerama tezhɛre ghweme ta ka Ɛdom pɛtɛ. Tsagha ne, kateɗepete yayata wəndə 'ya ya kaMahwətə.»