Read KapsikiDC Ɛzɛkiyɛl 45 Bible Online

Ɛzɛkiyɛl 45 - KapsikiDC bible

Ɛzɛkiyɛl 45

¹Ma vəa ŋkwa nya tenehe hɛɗi yɛ kwelɛ hwelefefia Israyɛl ne, kateŋa nda bela ta hɛɗi yɛ tekeleke ke Mahwətə: kadzeghe 25.000 tenza biya ta ŋkɛ, dzeghe [2] 20.000 bezlea ŋkɛ. Kaŋkwa nya keveyi geva tekeleke tenza ŋkwa shɛ pɛtɛ.

²Ma te tepe ta ŋkwa shɛ ne, kateŋa ŋkwa nya nza biya ta ŋkɛ kadzeghe gwəmsə mcɛfe ba'a bezlea ŋkɛ kadzeghe gwəmsə mcɛfe mbeli kezha ghɛa Shala. Ma dzeyi yite ne, ɓawe tesərə kwete ŋkwa nya nza bezlea ŋkɛ kadzeghe mcɛfemsə mbeli.

³Ma te ŋkwa nya slave nya mbeli ne, katesla kwete mbeli ŋkwa nya nza biya ta ŋkɛ kadzeghe 25.000 ba'a bezlea ŋkɛ kadzeghe 10.000. Te ŋkwa shɛ tenza ŋkwa nya keveyi geva tekeleke, ŋkwa nya keveyi geva tekeleke tsape.

⁴Kaŋkwa nya tekeleke tenza nyagha bela ta hɛɗi. Kateve ŋkɛ mbeli tekeleke kaŋa ka dzeghe Shala nyi kemene nda slene ke Mahwətə mbe ŋkwa nya keveyi geva tekeleke. Te ŋkwa shɛ teŋ'we ŋkwa hɛ kezha ŋa ghɛa nci. Kaŋkwa nya tekeleke kezha ŋkwa nya keveyi geva tekeleke tenza nde.

⁵Ma bela nya ketene kadzeghe 25.000 biya ta ŋkɛ ba'a kadzeghe 10.000 bezlea ŋkɛ ne, kaŋa ka Lɛvi nyi kemene slene mbe ghɛa Shala tenza ŋkɛ. Te teŋa ghɛa nci hɛ kezha nza hɛ mbe.

⁶Ma dzeyi vare hɛɗi nya keveyi geva tekeleke ne, katesla kwete ŋkwa mbeli kadzeghe 25.000 biya ta ŋkɛ ba'a kadzeghe 5.000 bezlea ŋkɛ kezha ŋa ghɛa ŋkɛ yayata nde Israyɛl te.

⁷Ma kaŋa wəndə nya te ghə ne, katesla hɛɗi yɛ dzeyi vare yayata bela ta ŋa ŋkwa nya keveyi geva tekeleke ba'a dzeyi vare ŋa meleme. Ma hɛɗia shɛ laka ŋkwa nya pəkwə veci te ne, hwa'a mɛa ndərə Mɛditɛranɛ. Ma laka ŋkwa kesame ta veci ne, hwa'a kwa ghala ta hɛɗia Israyɛl.

⁸Ma tsagha gɛ ne, katenza ŋa nci hɛɗi va mbeli nyi te ghə te hɛɗia Israyɛl. Katezhɛne hɛ kazeme berete ta mbelia Mahwətə we. Ke hwelefefia Israyɛl tesərə nda hɛɗi nya ketene hɛ.

⁹Wa nya ghena nya geze Shala Mahwətə nya: «Mbeli nyi te ghəa ka Israyɛl, kembarave wəshi nyi mene nyi yɛ! Peslekɛ mə ghwə te slene berete ba'a dzeghwama ntsə ŋayɛ nyi, mene mə wəshi nyi kehi ba'a nyi tiɗiɗi, peslekɛ mə ghwə te zləgwə wəshia mbelia ɗa. 'Ya Shala Mahwətə nde gezete!

¹⁰Mene mə slene le kiləwə ba'a wəshi kedzeghe wəshi nyi tiɗiɗi.

¹¹Ma wəshi kedzeghe wəshi kwa dzeghe dzeghe ba'a wəshi kedzeghe wəshi kwa yɛmə yɛmə ne, yipə yipə nza hwə nya yitea hɛ, gare dzawa kwa meŋe ta bela ta homɛr[3] nda viɗi nde nza yayata ŋkɛ. Le hwə nya yitea homɛr ve yayata wəsə kedzeghe wəshi mbeli.

¹²Ma dəɓərə kwetɛŋe mze kwa tɛawetɛa kwetɛŋe ne, yipə yipə le səŋkwə bakemsə tenza nde. Ma səŋkwə ŋkwaŋemsə ne, yipə yipə le gwəmsə ba'a deghesemsə kwa slibə ta bela ta kiləwə tenza hɛ.

¹³Wa nya tsetse tekele wəsə gəmə yɛ kase: bela kwetɛŋe kele yɛ mbe marəwrə keɗema megi nyi ŋ'wete yɛ ŋkwaŋemsə se te wəve,

¹⁴ba'a bela kwetɛŋe mbe n'yi nyi ŋ'wete yɛ gwəmsə. Le wəsə kedzeghe wəshi kwa yɛmə yɛmə nya kakwa meŋe ta bela ta wəsə nya kedzawa homɛr kala nya kele kor[4] dzeghe n'yia shɛ yɛ.

¹⁵Ma hwa wəshi keseɗa nyi mbe Israyɛl ne, kwetɛŋe tekele mbeli mbe timɛti keɗema kwi gwəmsə bake, kezha dzeghe melɛ kwa tere tere keɗema melɛ kejikə ghə. Ma tsagha ne, kateyaɓemte geva jaɗafa ta ŋayɛ. 'Ya Shala Mahwətə nde gezete.

¹⁶Pɛtɛa mbeli nyi te hɛɗi katetsehe nda ŋa nci wəshi ke wəndə nya te ghəa ka Israyɛl.

¹⁷Kwa nza ŋkɛ ne, kaŋa meghe ŋkɛ kakele wəsə nya kehi kezha melɛ kwa tere tere ba'a wəshi gəməa hə ba'a tɛ nyi hwa yɛ gəsəkə: halama hwa gəsəkəa dzemɛa ghweme ta tere, hwa yɛ veci kezhɛne mpi ba'a hwa kweci gəsəkə nyi mene ka Israyɛl. Gheŋkɛ nde fə wəshi keseɗa kase kezha yaɓe jaɗafa, tsagha wəshi gəməa hə, wəshi keseɗa kedzeghe melɛ kwa tere tere ba'a melɛ kejikə ghə. Ma tsagha ne, kateyaɓemte geva jaɗafa ta ka Israyɛl.»

¹⁸Wa nya ghena nya geze Shala Mahwətə nya: Ma te kwa ghate ta hɛ mbe tere kwa ghate ne, dzeghakwe mbeli dzeghekɛ melɛ le mca nya ɗema fete te kezha yaɓe ŋkwa nya keveyi geva tekeleke.

¹⁹Katekele mimia wəsə keseɗa shɛ nde dzeghe Shala ba'a katesehwe ŋkɛ dzeyi te sheghwə nyi dzeme vare gelembe nyi mɛa ghɛa Shala, dzeyi te megwekwe nyi wəfaɗe nyi te ŋkwa keve reghwetɛ ba'a dzeyi te sheghwəa gelembe nyi mɛa ŋwela nya ki ghɛ ki ghɛ.

²⁰Ma te kwa mberefaŋe ta hɛa tere ne, katezhɛne ghwelə mbeli yite kezha wəndə nya kemenete fete le ɗema ta ŋkɛ keɗema le ɗepema ta ŋkɛ. Ma tsagha ne, wɛŋe teyaɓemte ghɛa Shala yɛ.

²¹Ma te kwa meŋe wəfaɗeghəmbe ta hɛ mbe kwa ghate ta tere ne, kategha mene gəsəkə Pake nya ketetemə kahɛ mberefaŋe yɛ, ɗafa kwalekwala yatezeme mbeli vəa ŋkwa shɛ.

²²Ma te kwa ghate ta hɛa gəsəkə ne, katedzeghe melɛ wəndə nya te ghə le mca kezha yaɓe jaɗafa ta ŋkɛ ba'a ŋa mbeli pɛtɛ.

²³Mbe vəa gəsəkə nya kahɛ mberefaŋe nya ne, mcɛmcɛli mberefaŋe ba'a gamea lɛmə mberefaŋe nyi ɗema fete te yatedzeghe ɗa melɛ kwa tere tere wəndə nya te ghə le. Kala yayata hɛ ne, katedzeghe ɗa melɛ ŋkɛ ɓiyitsa le zhɛfa kezha yaɓe jaɗafa.

²⁴Katekele hə ŋkɛ kakiləwə mahekenemsə ba'a litrəa n'yi ŋkwaŋe kawəsə gəmə yitea yayata mca ba'a yayata game nya dzeghekɛ melɛ mbeli le.

²⁵Ma kezha gəsəkəa ghwəli nya kegha geva te kwa meŋe mcɛfeghəmbe ta hɛ mbe tere kwa mberefaŋe ne, kala nya menete wəndə nya te ghə hwa gəsəkə Pake temene ŋkɛ: keveci keveci kahɛ mberefaŋe ne, katedzeghe melɛ nya kwetɛŋe ŋkɛ kezha yaɓe jaɗafa, katedzeghe melɛ kwa tere tere nya kwetɛŋe ŋkɛ ba'a katefə wəshi gəməa hə ba'a n'yi nya kwetɛŋe ŋkɛ kase.