Read KapsikiDC Ɛzɛkiyɛl 46 Bible Online

Ɛzɛkiyɛl 46 - KapsikiDC bible

Ɛzɛkiyɛl 46

¹Wa nya ghena nya geze Shala Mahwətə nya: Ma gelembe nya mɛa ŋwela nya ki ghɛ ki ghɛ laka ŋkwa kesame ta veci ne, keŋzle ŋzle tenza nde kahɛ ŋkwaŋe nyi mene slene mbeli, ama te veci kezhɛne mpi ba'a hwa gəsəkəa dzemɛa ghweme ta tere ne, keghwene ghwene tenza nde.

²Ma nahe kezlakemte ŋwela nya pelɛ pelɛ wəndə nya te ghə ne, dzeki kwa cɛ nya mɛa ŋkwa kedzeki tedzeki ŋkɛ. Slape tenza ŋkɛ dzeme vare sheghwəa gelembe vəa ŋkwa nya dzeghe nda melɛ kwa tere tere ba'a melɛ kejikə ghə ka dzeghe Shala. Kategwəɗəŋə ŋkɛ ntiŋə ghə mbe hɛɗi kwelɛ mɛ cɛa shɛ, kwa sebe ta ŋkɛ ne, kateshave ŋkɛ. Kateŋzle gelembea shɛ mbeli pa va tɛhwɛɗi we.

³Kwa nza ŋkɛ ma hwa veci kezhɛne mpi ba'a hwa vecia dzemɛa ghweme ta tere ne, pɛtɛa mbeli nyi te hɛɗi katese kadzemɛa ŋkwa kedzekia shɛ kezha gwəɗəŋə kwa kema ta ɗa, 'ya Mahwətə.

⁴Ma melɛ kwa tere tere nya tedzeghe wəndə nya te ghə hwa veci kezhɛne mpi ne, le zhɛgwəa lɛməa timɛti nyi ɗema beze te ŋkwaŋe ba'a game kwetɛŋe nya ɗema beze te.

⁵Katekele hə ŋkɛ kase kakiləwə mahekenemsə yitea game. Ma yitea zhɛgwəa lɛməa timɛti ne, kala nya ɗe ŋkɛ tekele ŋkɛ kase. Katemtsehe litrəa n'yi ŋkɛ ŋkwaŋe yitea kiləwəa hə nyi mahekenemsə nyi.

⁶Ma hwa vecia dzemɛa ghweme ta tere ne, mca nya ɗema beze te, zhɛgwəa lɛməa timɛti ŋkwaŋe ba'a game nya ɗema beze te yatekele ŋkɛ kase.

⁷Katekele hə ŋkɛ kase kakiləwə mahekenemsə yitea yayata mca ba'a yitea yayata game. Ma yitea zhɛgwəa lɛməa timɛti ne, kala nya ɗe ŋkɛ tekele ŋkɛ kase. Katemtsehe litrəa n'yi ŋkɛ ŋkwaŋe yitea kiləwəa hə nyi mahekenemsə nyi.

⁸Ma kenza wəndə nya te ghə kadzeki ne, dzeki kwa cɛ nya mɛa ŋkwa kedzeki nya tedzeki ŋkɛ, shave kwa hweŋkwa shɛnyɛ teshave ŋkɛ.

⁹Ama mbeli nyi te hɛɗi kese hɛ kave zləvə te 'ya Mahwətə hwa gəsəkə nyi jama jama ne, shave kwa mɛa cɛ nya laka bela kwa zeme teshave mbeli nyi kedzeki kwa mɛa cɛ nya laka bela kwa gwela. Ma nyi kedzeki kwa mɛa cɛ nya laka bela kwa zeme ne, shave kwa nya laka bela kwa gwela teshave hɛ. Wəndə shɛ katezhɛne geva shave kwa mɛa cɛ nya dzeki ŋkɛ we, ama yayata wəndə kateshave kwa mɛa cɛ nya laka kwete bela.

¹⁰Ma wəndə nya te ghə le ŋa ŋkɛ ne, zlaɓe tedzeki ba'a teshave ŋkɛ le mbeli.

¹¹Ma hwa yɛ vecia gəsəkə ba'a hwa vecia tsene nyi jama jama ne, katekele hə wəndə nya te ghə kase kakiləwə mahekenemsə yitea yayata mca ba'a yayata game. Ma yitea zhɛgwəa lɛməa timɛti ne, kala nya ɗe ŋkɛ tekele ŋkɛ kase. Katemtsehe litrəa n'yi ŋkɛ ŋkwaŋe yitea kiləwəa hə nyi mahekenemsə nyi.

¹²Ma keɗe wəndə nya te ghə kadzeghe nda melɛ kwa tere tere keɗema melɛ kejikə ghə le ɗe ta ŋkɛ ke Mahwətə ne, mɛa cɛ nya laka ŋkwa kesame ta veci yateghwene nda mbeli. Kala nya hwa veci kezhɛne mpi tedzeghe melɛa shɛ ŋkɛ. Ma nahe keshavenyɛ ŋkɛ ne, jaslɛ mbeli ŋzlete gelembea shɛ.

¹³Keveci keveci tedzeghe nda melɛ kwa tere tere mbeli ke Mahwətə le zhɛgwəa təmə nya kemenete va kwetɛŋe nya ɗema beze te. Masheke tedzeghe melɛa shɛ mbeli.

¹⁴Kala same ta veci kwa ghɛ ɓiyitsa ne, katekele nda kiləwəa hə mcɛfe ba'a litrəa n'yi bake mbeli ke Mahwətə kezha gweɗə hwa hə shɛ. Ma ghena nyi kegezete geva te ghəa melɛ nya dzeghe nya mbeli keveci keveci ne, kaghala ghala temene slene hɛ.

¹⁵Kala kiɗi ta ŋkwa ne, katedzeghe nda melɛ kwa tere tere mbeli ke Mahwətə le zhɛgwəa təmə, hə ba'a n'yi kaghala ghala.

¹⁶Wa nya ghena nya geze Shala Mahwətə nya: Ma kendeke nda wəve meghe ke kwete hwa ŋwale tezhilia ŋkɛ ne, kadzehwa wəsə kezeme ghɛa wəzege teza shɛ dzehwe nde ba'a kawəsə kezeme ghɛ ta ŋwale tezhilia ŋkɛ tenza nde kwetere wəmbə.

¹⁷Ama kendeke nda wəve wəndə nya te ghə ke kwete hwa mbeli nyi yite ne, deke hwa'a mɛa va nya ɗema wəndəa shɛ mba kamava tenza nde kaŋa ŋkɛ. Ma kwetere wəmbəa ŋkɛ ne, katezhɛne nda wəvea ŋkɛ ŋkɛ ke wəndə nya te ghə, va nya nza ŋkɛ, deke ŋwale tezhilia ŋkɛ ka nza kazehwe ghɛ yitea wəshia ŋkɛ.

¹⁸Ama ɓiyitsa ne, hweŋkwa va meghe kakele wəvea mbeli nyi te hɛɗia ŋkɛ kaberete we. Ama wəshi nyi zeme ghɛ ŋwalea ŋkɛ yite ne, hwa wəshia ŋkɛ kele ŋkɛ. Ma tsagha ne, wəndə shɛ kateŋkamte geva te wəve ŋkɛ we.

¹⁹Kwa sebe ta ŋkɛ, shilimə wəndəa shɛ keleghe ɗa dzeki kwa mɛa cɛ nya mɛa ŋkwa kadzeki laka bela kwa gwela. Ntəŋə ŋkɛ le 'ya dzeyi laka cɛ nyi mbe ŋkwa nya keveyi geva tekeleke nyi keveyi geva kaŋa ka dzeghe Shala. Tagha ne, pa ncɛte ɗa kwete ŋkwa talɛ wəmbala ta ŋkwa nya laka ŋkwa kepəkwə ta veci.

²⁰Ma ke sha 'ya: «Wa nya ŋkwa nya ta slia wəshi keseɗa nyi dzeghekɛ melɛ ka dzeghe Shala kezha yaɓe jaɗafa nya. Te ŋkwa shɛnyɛ ta wəshi gəmə hɛ. Ma tsagha ne, wəsə shɛ katekele geva kajive pelɛke te ŋwela, yitea kwaɗe wəsə nya keveyi geva tekeleke mbeli we.»

²¹Kwetere wəmbəa ŋkɛ ne, cape wəndəa shɛ le 'ya kashave te ŋwela nya pelɛ pelɛ, ntəŋə ŋkɛ le 'ya dzeyi mɛa megwekwe ta ŋkɛ nyi wəfaɗe nyi. Ma te yayata megwekwea shɛ ne, ŋwela ya shɛ.

²²Keɓɛhwɛ ɓɛhwɛnji ŋwela nyi wəfaɗe shɛhɛ ba'a yipə yipə wəba ta nci: kadzeghe wəfaɗemsə nza biya ta ŋkɛ, dzeghe mahekenemsə ŋa bezlea ŋkɛ.

²³Dzasle yayata ŋwela shɛ kwa zli nya ŋate mbeli le pelɛ. Ma dzeyi vare zlia shɛ ne, reghwetɛ keta ɗafa yaŋeŋeyi mbeli.

²⁴Ma ke wəndəa shɛ sha 'ya: Nyi ya kaŋkwa keta wəshi kezeme. Teke ta slia wəshi keseɗa nyi dzeghekɛ melɛ mbeli le ka mene slene mbe ghɛa Shala.