Read KapsikiDC Ɛzɛkiyɛl 5 Bible Online

Ɛzɛkiyɛl 5 - KapsikiDC bible

Ɛzɛkiyɛl 5

¹Ma ke Shala sha 'ya: «Wəndə ŋelɛ, kelete kafayɛ nya nza mɛ nale nale te shɛ na zhɛrete kampiɗi. Ŋsəmte yɛ ghəa ŋa le ghwɛmɛa ŋa, kwa sebe ta ŋkɛ, dzeghete shinti nyi ŋsəmte na te kiləwə ba'a neheve mbe kabela mahekene.

²Ma vəa ŋkwa nya tekelehwe geva Zhɛrəzalɛm ne, katetere kwete na bela ta shinti nyi mahekene nyighɛ te tepe ta meleme. Katekele kwa bake ta bela nya tenzere na le kafayɛ dzeyi yitea meleme na. Katetaze kwa mahekene ta bela yitea sefə, nda tekeka hɛ 'ya le kafayɛa ɗa.

³Ama katenta shinti na ɓɛhwɛ kezha ve kwa slibəa lekwesa ta ŋa.

⁴Katezhɛne na kanta kweci kezha bete mɛa ghwə yitea terenji hɛ. Ma tsagha, kateteremte ka Israyɛl ghwə pɛtɛ.

⁵Ma 'ya, 'ya Shala Mahwətə: tsetse temene nda geva ŋkɛ ke Zhɛrəzalɛm, meleme nya veyi 'ya te tepe ta kweci hwelefefi, nya dzaslete 'ya le kweci hɛɗi.

⁶Nahe mbeli nyi mbe keɗema yɛ fete yitea wəshi nyi gezete 'ya ba'a yitea wəshi mahalegə nyi ndeke nda 'ya ke hɛ. Ma tsagha ne, nahe hɛ kendamte kweci hwelefefi ba'a kweci hɛɗi nyi dzeyi yitea hɛ le 'yaghwa mehele.

⁷Vatse gɛ ne, wa nya ghena nya geze 'ya, 'ya Shala Mahwətə nya: Za ma menete zlere yɛ ke hwelefefi nyi te hɛɗi, kese yɛ kazele wəshi mahalegəa ɗa ba'a wəshi nyi gezete 'ya we. Kese yɛ kadzeghwa ya kala wəshi keshia kweci hwelefefi nyi dzeyi yitea gheyɛ we.

⁸Vatse ne, wa nya ghena nya geze 'ya, 'ya Shala Mahwətə nya: Kateme 'ya kənəa gheyɛ ka Zhɛrəzalɛm. Katemeha ghwə ta ɗa 'ya te tepe ta ŋayɛ, kanewe newe kweci hwelefefi.

⁹Ma va wəshi nyi ndiremi ndiremi kashasha pɛtɛ nyi menete yɛ ne, katemene ŋayɛ wəsə nya ghama 'ya kamenete 'ya, wəsə nya ɗema 'ya mba katemene tɛape.

¹⁰Ma mbe meleme ta ŋa gɛ, katezeme ŋwalea nci mbeli nyi keyake hɛ ba'a katezeme mbeli nyi keyake hɛ ŋwalea nci. Katemeha ghwə 'ya te gheyɛ ba'a katetaze mbeli nyi ketene mbe gha 'ya kwetɛ kwetɛŋe dzeyi te yayata bela.

¹¹Vatse gɛ, wa nya ghena nya geze 'ya, 'ya Shala Mahwətə nya teghweme nya: Va nya zhɛrete ghɛa ɗa yɛ wale wale le wəshi nyi ndiremi ndiremi kashasha ta ŋayɛ ba'a wəshi nyi zhɛrete yɛ kashala ne, 'ya le ŋa ɗa perə, katehendemte geva 'ya seyi vare gheyɛ, katezhɛ heli 'ya yitea gheyɛ we. Wəndə shɛ katesərə 'ya we.

¹²Ma kwa mahekene ta bela ta mbelia ŋa ne, katempə hɛ va ba keɗema va ma. Ma kwa bake ta bela ne, katempə hɛ dzeyi yitea meleme ta ŋa va kafayɛ. Kwetɛ kwetɛŋe tetaze kwa keɗaŋe ta bela ta nci 'ya laka yayata bela ba'a katekeka hɛ 'ya le kafayɛa ɗa.

¹³Katendɛkwe ghwə ta hwepe wənəa ɗa 'ya, katetereke beze ta wənəa ɗa 'ya te hɛ ba'a katewa dewa 'ya te hɛ. Ma tsagha, kaɗepete hɛ 'ya ya kaMahwətə nya kegezete nda ghena ke hɛ le wənə le wənə, vəa ŋkwa nya tendɛkwemte hwepe wənəa ɗa 'ya te hɛ.

¹⁴Katenewe kweci hwelefefi nyi dzeyi yitea gheyɛ ba'a pɛtɛa mbeli nyi ketedzeyi vare tsema tsema ŋzlamte Zhɛrəzalɛm 'ya ba'a vate hawe 'ya te.

¹⁵Katemeha ghwə 'ya te le hwepe wənə nya wəba ba'a kateŋele ŋkɛ 'ya ndiremike mike. Kateŋ'wəshi ba'a kateŋele melemea shɛ kweci hwelefefi nyi dzeyi yite. Ama katenza ŋkɛ kawəsə keyipə pa ba'a kawəsə keghazlənə sha hɛ. 'Ya Mahwətə nde gezete ŋayɛ.

¹⁶Katehe have ta ma nyi kempə ŋkwa 'ya kase kadzehwa gheyɛ, kateza sebe 'ya te wəshi kezeme nyi wəmbəyi yɛ ba'a katesərə ŋayɛ 'ya kampə va ma.

¹⁷Kateghwene ŋayɛ ma ba'a wəshi keseɗa nyi ghyana ghyana 'ya kezha mpə ŋwalea ŋayɛ. Katempə yɛ va ba, mene berete ba'a mpa. 'Ya Mahwətə nde gezete ŋayɛ.»