Read KapsikiDC Ɛzɛkiyɛl 8 Bible Online

Ɛzɛkiyɛl 8 - KapsikiDC bible

Ɛzɛkiyɛl 8

¹Ma te kwa ŋkwaŋe ta va, te hɛ kwa mcɛfe mbe kwa ŋkwaŋe ta tere, vəa ŋkwa nya nza 'ya mentishɛ ki ghɛa ɗa ba'a vəa ŋkwa nya nza mbelia jama ta Zhəwda mentishɛ kwa kema ta ɗa ne, pa berete ta Shala Mahwətə dzeghənyɛ kənəa 'ya.

²Newe 'ya ne, dəkwə 'ya te kwete wəsə kala wəndə ŋelɛ. Ma ghala dəŋə kadzawa dzawadze ne, kala ghwə geva ta ŋkɛ. Ma se mɛa dəŋə kadzeme dzemedze ne, kala mze kwa ghwə ghwə nya shɛanɛa ɓele ŋkɛ.

³Pa ŋkɛ hake kwete wəsə kala dzeve ba'a keseve ɗa te shintia ghə. Kwa sebe ta ŋkɛ, pa Sefəa Shala keleghe ɗa kadzeme yitea ghweme. Ma mbe wəsə nya ncɛte ɗa nya Shala ne, pa keleghe ɗa kadzembe Zhɛrəzalɛm, kadzemɛa gelembe nya mbe mbe, laka bela kwa gwela ta meleme nya veyi geva pa ta wəsə nya zhɛrete mbeli kashala nya kehwepe nda wənə ke Shala.

⁴Tagha ne, pa zləvəa Shala ta ka Israyɛl ncɛte ɗa geva kala nya ghate 'ya kanakɛ te shiwə kwa zlərə.

⁵Ma ke sha 'ya: «Wəndə ŋelɛ, newe pa sha ŋkwa laka bela kwa gwela.» Walaŋe 'ya ne, dəkwə 'ya te reghwetɛ laka bela kwa gwela ta gelembe. Tagha wəsə nya zhɛrete nya mbeli kashala nya kehwepe nda wənə nya ke Shala mɛa ŋkwa kedzeki.

⁶Ma ke zhɛkwa: «Wəndə ŋelɛ, nahe na kenakɛ wəsə nya mene nya hɛ tse na? Nahe na kenakɛ wəshi nyi ndiremi ndiremi kashasha nyi mene nyi ka Israyɛl teke kezha hendemte ɗa cakeɗake vare ghɛa ɗa tse na? Ama katenewe kweci na wəshi nyi ndiremi ndiremi kashasha zhɛkwa.»

⁷Pa ŋkɛ keleghe ɗa kajive mɛa mɛ degha nya pelɛke te ŋwela. Newe 'ya ne, dəkwə 'ya te wəfela dzeme vare dewe.

⁸Ma ke sha 'ya: «Wəndə ŋelɛ, ntsate wəfela te dewe nya.» Ntake 'ya kantsa ŋkwa kadzete dewe. Tagha gɛ, pa wəfela ntsate geva te dewe.

⁹Ma ke zhɛkwa: «Dzeki shɛ na nakɛ wəshi nyi ndiremi ndiremi kashasha nyi mene hɛ ki.»

¹⁰Ma kwa dzeki 'ya ne, dəkwə 'ya te mama ta pa ta wəshi nyi kentsehe geva dzate te hɛɗi, wəshi keseɗa ba'a pɛtɛa wəshi nyi zhɛrete mbeli kashala nyi meneyi ka Israyɛl dzeme vare dewe.

¹¹Pa mbelia jama ta ka Israyɛl nyi mberefaŋemsə sletenji dzeme vare yɛ pa ta wəshia shɛhɛ. Hwa hɛ Yazaniya, wəzege ta Shafan. Yayata wəndəa nci le wəshi nyi tere 'wərdə mbeli kwa yitea dzeve. Nda dzeme yadzeme n'yia 'wərdəa shɛ yitea ghweme.

¹²Ma ke Shala 'yɛwete va 'ya: «Wəndə ŋelɛ, nahe na kenakɛ wəshi nyi mene mbelia jama ta ka Israyɛl te wəfərə, yayata wəndəa nci mbe cɛa ŋkɛ nya nza nya pa ta wəshi dzeme vare tse na? Ma ke hɛ sha geze: ‹Kanakɛ ɓəmə Mahwətə we, nahe ŋkɛ kewəfəyite hɛɗi.›»

¹³Ma ke mtsehete: «Katenewe kweci na wəshi nyi ndiremi ndiremi ma kashasha ke nyi mene nyi hɛ ɓiyitsa.»

¹⁴Pa ŋkɛ keleghe ɗa kalə kadzemɛa ŋkwa kedzeki ta ghɛa Mahwətə nya laka bela kwa gwela. Tagha kweci mi mentishɛ kanehwene Taməwz.

¹⁵Ma ke 'yɛwete va 'ya: «Nahe na keneweve megela tse na wəndə ŋelɛ? Katenewe kweci na wəshi nyi ndiremi ndiremi ma kashasha ke nyi zhɛkwa.»

¹⁶Pa ŋkɛ keleghe ɗa kadzeki kwa hwə ghɛa Mahwətə. Tagha mɛa ŋkwa kedzembe ghɛa Mahwətə, kwelɛ yɛ ŋkwa kedzembe cɛ le reghwetɛ ne, zhili gare bakemsə mcɛfeghəmbe nyi kezhɛrave nda wəmbə ke ŋkwa nya keveyi geva tekeleke ba'a nyi nza kema ta nci laka ŋkwa kesame ta veci ya tagha. Megwəɗəŋə hɛ ntiŋə ghə mbe hɛɗi kahawe va veci.

¹⁷Ma ke sha 'ya: «Nahe na keneweve megela tse na wəndə ŋelɛ? Dewə newe wəshi nyi ndiremi ndiremi kashasha nyi mene nyi hɛ teke ka Zhəwda na? Rayɛ ŋkwa nya te hɛɗi va kwa berete nya mene hɛ ba'a nahe hɛ kezhɛne kaghate beze ɗa wənə. Le wənə le wənə ncɛ berete ta nci hɛ.

¹⁸'Ya le ŋa ɗa perə ne, kateme 'ya kənəa hɛ le wənə le wənə. Katezhɛ heli ba'a katepele ntsə 'ya yitea hɛ we. Katetsa ɗa lewela hɛ, ama katefa nehwene ta nci 'ya we.»