Read KapsikiDC Daniyɛl 1 Bible Online

Daniyɛl 1 - KapsikiDC bible

Daniyɛl 1

¹Ma mbe kwa mahekene ta va ta Zhowakim, meghe nya mbe Zhəwda mbe meghe ne, pa Nabəkodonozor, meghe nya mbe Babilone se kahave nda mpa ke Zhɛrəzalɛm.

²Pa Mahwətə vame Zhowakim, meghe nya mbe Zhəwda ba'a bela ta wəshi kemene slene nyi mbe ghɛa Shala mbe dzeve ta ŋkɛ. Pa ŋkɛ fəghe ka mavashi kajive Babilone ba'a beteyi wəshi kemene slene mbe ghɛa yɛ shala ta ŋkɛ, mbe cɛ kebete yɛ shala ta ŋkɛ.

³Kwa sebe ta ŋkɛ, pa meghe gezave nda ke Ashepɛnaz, wəndə nya te ghəa mbeli nyi yite, kezha tseha ŋwale tezhili ɓɛhwɛ mbe hwelefe ta meghe keɗema hwa hwelefefia mbeli ganji:

⁴ŋwale tezhili nyi ɗema beze te hɛ, nyi ndeɗe ndeɗe, nya kentsehwele ntsehwele, nyi keɗepe wəshi ba'a nyi nza zəzə va hɛ, yitea mene slene hɛ ki ghɛa meghe. Kateteke rafe wəshi ba'a ghena ta ka Babilone hɛ.

⁵Pa meghe gezete kezha ve nda wəshi kezeme ta ŋkɛ ba'a wəshi kesa ta ŋkɛ mbeli ke hɛ keveci keveci, kezha teke nda wəshi mbeli ke hɛ kava mahekene. Ma kwa sebe ta vəa shɛ ne, katedzembe slene ta ŋkɛ hɛ.

⁶Hwa mbeli nyi tsehave mbeli ne, ka Zhəwda ya shɛ: Daniyɛl, Hananiya, Mishayɛl ba'a Azariya.

⁷Pa wəndə nya te ghəa ka mene slene hekate nda slə mɛnɛfɛ ke hɛ: Bɛltasar ŋa Daniyɛl, Shadrak ŋa Hananiya, Mɛshak ŋa Mishayɛl, Abɛd-Nɛgo ŋa Azariya.

⁸Pa Daniyɛl kelete zəzə megela kezha ɗema kazhɛre ghəa ŋkɛ wale wale laka zeme wəsə kezeme ba'a sa wəsə kesa ta meghe. Pa ŋkɛ 'yɛwete va wəndə nya te ghəa ka mene slene kezha ɗema ŋkɛ katərənə ŋkɛ kazhɛre ghəa ŋkɛ wale wale.

⁹Pa Shala pelave nda hweŋkwa ke wəndə nya te ghəa ka mene slene kezha yɛ 'yɛwe ta Daniyɛl le ganyɛa mehele ba'a zhɛ heli.

¹⁰Ama ma ke wəndə nya te ghəa ka mene slene sha Daniyɛl: «Meghe le ghəa ŋkɛ nde gezete wəsə kezeme ta ŋayɛ ba'a wəsə kesa ta ŋayɛ. Kazhɛ ɗa ghazlənə yagha ŋkɛ tesləyi ŋayɛ sheŋwe sheŋwe hwa kweci ka mandalahɛ ŋayɛ. Tsagha ne, katesla ghə ŋkɛ te 'ya tewəmbəreke gheyɛ.»

¹¹Tagha gɛ, ma ke Daniyɛl gezete nda ke wəndə nya veyi wəndə nya te ghəa ka mene slene kezha newe ghweme te Hananiya, Mishayɛl, Azariya ba'a gheŋkɛ le ghəa ŋkɛ:

¹²«Təhwə təhwə ŋa 'ya, dzeghakɛ n'yɛ kahɛ meŋe. Ve n'yɛ nɗeli sleke ba'a yɛmə kesa mbeli.

¹³Kwa sebe ta ŋkɛ ne, kateyipə nza ta n'yɛ na le nza ta ka mempɛhwetɛti nyi kezeme wəshi kezeme ta meghe. Ma vəa ŋkwa shɛ ne, kateme na te ghen'yɛ laka wəsə nya teneweve na.»

¹⁴Pa wəndəa shɛ yɛte ghena shɛ ba'a dzeghakɛ hɛ kahɛ meŋe.

¹⁵Ma kwa sebe ta hɛ meŋe ne, pa mbeli nakɛ tsema tsema nza nza ta nci ganyɛ ma ke ŋa pɛtɛa ka mempɛhwetɛti nyi kezehwe wəshi kezeme ta meghe. Nahe hɛ kenza deke deke ma ke hɛ.

¹⁶Tagha gɛ, pa wəndə nya kenewe ghweme te hɛ kelemte wəshi kezeme ba'a tɛ nyi ve nda mbeli ke hɛ. Deke nɗeli sleke yave nda ŋkɛ ke hɛ.

¹⁷Pa Shala ndeke nda ɗepe wəshi ba'a zəzə ghena laka ghena ba'a ntsehwele ke ka mempɛhwetɛti nyi wəfaɗe nyi. Ɓiyitsa ne, wərə Daniyɛl kafave pɛtɛa wəshi nyi ketemene geva ba'a pɛtɛa shiwə.

¹⁸Ma kwa nakanyɛ və nya sləyi meghe Nabəkodonozor kezha ncɛ nda ka mempɛhwetɛti nyi tsehave nyi mbeli ne, pa wəndə nya te ghəa ka mene slene fəke nda hɛ.

¹⁹Pa meghe gezete ghena le hɛ. Ama hwa hɛ pɛtɛ ne, wəndə shɛ kesləyi ŋkɛ kala Daniyɛl, Hananiya, Mishayɛl ba'a Azariya we. Vatse dzembe slene ta ŋkɛ hɛ.

²⁰Ma te pɛtɛa ghena nyi ke'yɛwe ntsehwele ba'a zəzə ghena nyi se meghe ka'yɛwe va hɛ ne, za ma sləyi hɛ ŋkɛ meŋe zhigə ke pɛtɛa ka mene ghɛ ba'a ka ŋa zlera nyi kese mbe pɛtɛa hɛɗia ŋkɛ.

²¹Nahe Daniyɛl kenza mbe slene ta meghe hwa'a te və nya dzete meghe Sirəs.