Read KapsikiDC Daniyɛl 12 Bible Online

Daniyɛl 12 - KapsikiDC bible

Daniyɛl 12

¹Ma ke nde ghwene ta Shala sha 'ya zhɛkwa: «Ma te vəa shɛ ne, katenca Mishɛl, wəndə nya te ghəa ka ghwene ta Shala nya keya hwelefe ta ŋa. Katenza vəa shɛ kavəa yaka nya keghama kase ghala nza hwelefefi hwa'a te və nya. Tagha gɛ, katembele pɛtɛa hwelefefia ŋa nyi nza sləa nci kerafe rafe te palepa ta mpi.

²Katefeɗeghe mbeli kwele kwele nyi yitea hɛ kwa kwele: ma kweci mbeli ne, kezha mpi nya kaghala ghala, ma kweci, kezha hawe ba'a ndiremi nya kaghala ghala.

³Kateɓele mbeli nyi kezəzə ghena kala ŋkwa nya pelɛ ghweme. Ma kwa sebe ta nya ncɛte nda nza tiɗiɗi hɛ ke mbeli kwele kwele ne, kateɓele hɛ kaghala ghala kala yɛ saseregwa.

⁴Ma gha gɛ Daniyɛl, wəfərəakɛ ghena shɛhɛ ba'a ŋzlete palepa nya hwa'a te keɗaŋe ta və. Ma vəa ŋkwa shɛ ne, kwele kwele mbeli nyi ketejaŋga, katemtsehe geva ɗepe wəsə ta nci.»

⁵Ma mba 'ya, 'ya Daniyɛl kanewe wəsəa shɛ ne, pa kweci mbeli bake ghereŋenji tagha, pelɛ kwete kema ta hələ kwete, nahe kwete kenza pelɛ kwete.

⁶Ma ke kwete wəndəa nci 'yɛwete va wəndə nya mbe lekwesa pawa, nya meghereŋe lateghə mɛa hələ: «Hweŋkwa tekiɗi wəshi meŋelea shɛhɛ wa?»

⁷Pa wəndə nya mbe lekwesa pawa shɛ kafete dzeve bake nci yitea ghweme, ma ke gezete ghena kafefa 'ya: «Kazeme 'ya kafela le Shala teghweme nya kaghala ghala, katetemə wəshia shɛhɛ kava mahekene ba'a kwete yite. Katekiɗi hɛ vəa ŋkwa nya denenyɛ pɛtɛa berete ta mbelia Shala.»

⁸Ma 'ya, 'ya Daniyɛl ne, nahe 'ya kefate ghena shɛhɛ, ama kefave ghena nya mbe hɛ 'ya we. Tagha gɛ, ma 'ya 'yɛwete: «Nde sleke ɗa yawe, tsema tenza kiɗi ta wəshia shɛhɛ wa?»

⁹Ma ke wəndəa shɛ zhɛnete: «Daniyɛl, kwiɗi ŋa, kwa nza ŋkɛ nahe ghena shɛhɛ kenza tewəfərə ba'a keŋzle ŋzle hwa'a te keɗaŋe ta və.

¹⁰Katenza mbeli kwele kwele keyaɓe yaɓe, tɛzlɛzlɛ ba'a kepɛ pɛ va yɛ yaka. Katemene wəshi nyi ndiremi ndiremi te ka ndiremia mehele. Katefave ka ndiremia mehele we, ama katefave mbeli nyi kezəzə ghena.

¹¹Ma se te və nya tefɛa geva melɛ nya keveci keveci ba'a nya teve geva wəsə kwa ndiremi kashasha te reghwetɛ ne, katenza hɛ shɛ 1.290.

¹²Zlama nde tenza va mbeli nyi keteneghe ba'a nyi ketekekave hɛ 1.335.

¹³Ma gha, gha Daniyɛl ne, nza dɛŋe dɛŋe hwa'a te keɗaŋe. Tagha gɛ, katekemave zhɛne mpi na ba'a katesame na kwa kwele kezha ŋ'we zhɛme ta ŋa te keɗaŋe ta və.»