Read KapsikiDC Daniyɛl 9 Bible Online

Daniyɛl 9 - KapsikiDC bible

Daniyɛl 9

¹Ma mbe kwa ghate ta va ta Dariyəs, wəzege ta Kɛrkɛs, hwelefe ta ka Mɛde te meghe te hɛɗi ka Babilone,

²te kwa ghate ta va ta ŋkɛ mbe meghe ne, ntake 'ya, 'ya Daniyɛl kazele ghena nya mbe palepa nyi keveyi geva tekeleke kezha fa ghena nya mbe ghena nya gezete nda Mahwətə ke nde mɛ ŋkwa Zhɛrɛmi, te ghəa va mberefaŋemsə nyi tenza Zhɛrəzalɛm kakwəfi.

³Ntake 'ya kamene səwəmayɛ, pa 'ya hwepahwe wəsə hwa hwə ba'a behweyi pəsəɗə mbe ghəa ɗa. Zhɛne ne, pa 'ya zhɛrave nda geva ke Nde sleke ŋkwa Shala kezha səkwə ŋkɛ ba'a kezha nehwene nda nehwene.

⁴Ma 'ya ncɛte nda yɛ jaɗafa ta hwelefe ta ɗa ke Shala Mahwətə ta ɗa: «Nde sleke ŋkwa yawe, Shala nya wəba ba'a nya ghazlənə mbeli ve, kaya jikə geva ta ŋa na laka mbeli nyi keɗe ŋa ba'a kamene nda ganyɛ na ke mbeli nyi kehawe va ghena nyi gezete na.

⁵Nahe ghen'yɛ kemenete jaɗafa, nahe ghen'yɛ kemenete fete, nahe ghen'yɛ kese kaka ndiremia mehele ba'a kaka fama ghena, nahe ghen'yɛ kezhɛrave nda wəmbə ke ghena ba'a ke wəshi nyi gezete na.

⁶Kese ghen'yɛ kafa nda ghena ke ka mene slene ta ŋa nyi kaka mɛ ŋkwa nyi kese kageze nda ghena te sləa ŋa ke ka meghea kɛfia n'yɛ, mbeli nyi te ghəa n'yɛ, ka shihɛ n'yɛ ba'a mbeli pɛtɛ we.

⁷Ma gha, gha Mahwətə ne, tiɗiɗi na. Ma ghen'yɛ le ŋa n'yɛ ne, hawe ya te ghen'yɛ tsetsenya, ghen'yɛ ka Zhɛrəzalɛm, ka Zhəwda ba'a pɛtɛa kweci ka Israyɛl nyi dekwede dekwede keɗema nyi cakeɗa cakeɗa, dzeyi te pɛtɛa hɛɗi nyi ŋkeyi hɛ na tewəmbəreke beze ghena nya menete ŋa hɛ.

⁸Mahwətə yawe, hawe ya te ghen'yɛ, ka meghea kɛfia n'yɛ, mbeli nyi te ghəa n'yɛ ba'a ka shihɛ n'yɛ, va nya menete ŋa jaɗafa ghen'yɛ.

⁹Ama gha Nde sleke ŋkwa Shala ta n'yɛ nya kezhɛ heli ne, kelemte n'yɛ fete ta n'yɛ te wənə, ya ghen'yɛ se kaka fama ŋa ghena.

¹⁰Kese ghen'yɛ kafa ghena ta ŋa, gha Shala Mahwətə ta n'yɛ kezha dzeghwa kala wəshi mahalegəa ŋa nyi kegezete n'yɛ geva laka ka mene slene ta ŋa nyi kaka mɛ ŋkwa we.

¹¹Nahe pɛtɛa ka Israyɛl kedzawanji wəmbəa wəsə mahalegəa ŋa ba'a kazhɛrete wəmbə kezha fama ghena ta ŋa. Nahe ghen'yɛ kemenete ŋa jaɗafa. Tagha gɛ, pa bezla nya kemeɗeyi geva mbe wəsə mahalegəa Moyize, nde mene slene ta ŋa, dzeghənyɛ kənəa ghen'yɛ.

¹²Nahe na kemenete wəsə nya gezete na te ghəa n'yɛ ba'a te ghəa mbeli nyi kese kasleke n'yɛ. Nahe na keghweneke ndiremi nyi jama jama kadzeghəa ghen'yɛ mbe Zhɛrəzalɛm. Wəndə shɛ kegha kanakɛ ndiremi nyi kala nyi te hɛɗi lema we.

¹³Kala nya kerafete geva mbe wəsə mahalegəa Moyize ne, nahe pɛtɛa ndiremia shɛhɛ kedzeghəa ghen'yɛ. Ama kese ghen'yɛ kazele gweɗakwe ŋa wənəa ŋa, gha Shala Mahwətə ta n'yɛ we, kese ghen'yɛ kazhɛre nda wəmbə ke yɛ jaɗafa ta n'yɛ we, kese ghen'yɛ kaɓela kaganda ta ŋa we.

¹⁴Vatse se na ɗeke ɗeke kezha ve ndiremia shɛhɛ te ghen'yɛ. Kwa nza ŋkɛ ma gha Shala Mahwətə ta n'yɛ ne, tiɗiɗi na mbe wəshi nyi mene na pɛtɛ, ama kefate ŋa ghena ta ŋa ghen'yɛ we.

¹⁵Nde sleke ŋkwa Shala ta n'yɛ yawe, ma kwa fəakave mbelia ŋa na shave mbe Ɛzhipte laka berete ta ŋa nya wəba ne, nahe zləvəa ŋa kedzemte ɓeshi nya. Ama ghen'yɛ ne, nahe ghen'yɛ kese kaka jaɗafa ba'a kaka 'yaghwa mehele.

¹⁶Shala yawe, ma laka tiɗiɗia ŋa ne, kelemte ghwə ta hwepe wənəa ŋa seyi kənəa Zhɛrəzalɛm, meleme ta ŋa, ghweme ta ŋa nya keveyi geva tekeleke. Ma tewəmbəreke yɛ fete ta n'yɛ ba'a yɛ jaɗafa ta ka shihɛ n'yɛ ne, Zhɛrəzalɛm ba'a mbelia ŋa yaŋele pɛtɛa hwelefefi nyi dzeyi yitea ghen'yɛ.

¹⁷Shala ta n'yɛ yawe, ma tsetsenya gɛ ne, fate səkwə ta nde mene slene ta ŋa ba'a mpi dzeve ta ŋkɛ. Ma tewəmbəreke ghəa ŋa ne, zhɛraghe kema ta ŋa kənəa ghɛa ŋa nya kakwəfi.

¹⁸Shala ta ɗa, fate megela gi! Pelakɛ ntsə ta ŋa shɛ na neweve nza ta meleme ta n'yɛ nya keŋzla ŋzla, meleme nya keveyi geva nya kaŋa ŋa gi! Kenza tewəmbəreke slene nyi tiɗiɗi tiɗiɗi ta n'yɛ mpi dzeve ghen'yɛ kwa kema ta ŋa we, ama tewəmbəreke wəba ta zhɛ helia ŋa.

¹⁹Shala yawe, fate n'yɛ ŋa n'yɛ gi! Shala yawe, kelemte n'yɛ te wənə gi! Shala yawe, ghwenemte sleme gi! Shala ta ɗa, ma tewəmbəreke ghəa ŋa ne, sate te ŋkwa kahe kahe kezha meleme ta ŋa ba'a kezha mbeli nyi kaŋa ŋa.»

²⁰Nda ghə yasəkwə 'ya, nda yɛ jaɗafa ta ɗa ba'a ŋa Israyɛl, hwelefe ta ɗa yancɛ 'ya ba'a nda dzeve yampi nda 'ya ke Shala Mahwətə ta ɗa, te ghəa ghweme nya keveyi geva tekeleke kaŋa Shala ta ɗa.

²¹Ma mbe səkwə ghə 'ya ne, pa Gabriyɛl nya ghate nya 'ya kanakɛ hendave ɗa geva le zlə kahe kahe, te vəa melɛ tɛhwɛɗi.

²²Pa ŋkɛ ncɛte ɗa ghena, ma ke sha 'ya: «Daniyɛl, nahe 'ya kese tsetsenya kezha ghwene mehele ta ŋa.

²³Ghatema ta ŋa kampi nda dzeve ke Shala ne, nahe ŋkɛ kegezete kwete ghena, nahe 'ya kese kezha ncɛ ŋa ŋkɛ, kwa nza ŋkɛ kaɗe ŋa Shala. Fave ghena nya tegeze ŋa 'ya te ghəa wəsə nya nakɛ nya na.

²⁴Nahe va mberefaŋe zhigə mberefaŋemsə kesləyi geva kezha hwelefe ta ŋa ba'a kezha meleme ta ŋa nya keveyi geva tekeleke. Nahe vəa shɛ kehi kezha tereke wəsə kwa ndiremi, kezha kiɗi jaɗafa, kezha kelemte geva yɛ fete te wənə, kezha ncɛ geva tiɗiɗi nya kaghala ghala, kezha yipə geva wəshi nyi nakɛ mbeli ba'a ghena ta ka mɛ ŋkwa kadzawa ba'a kezha zhɛne ghɛa Shala kave geva tekeleke.

²⁵Wa nya wəsə nya hi na kaɗepete ba'a kafave nya: Ma se te və nya gezete geva ghena te ghəa zhɛne geva ta mbeli nyi kefəhwe geva kase ba'a ŋa ta Zhɛrəzalɛm zhɛkwa, hwa'a te nca ta wəndə nya te ghə nya ntave Shala ne, va mberefaŋe zhigə mberefaŋemsə ya shɛ. Ma mbe va ŋkwaŋemsə bakeghəmbe zhigə mberefaŋe ne, kateŋa geva meleme ba'a zli nya yite, ama dzawe dzawe tenza yɛ va shɛhɛ.

²⁶Ma kwa sebe ta va nyi ŋkwaŋemsə bakeghəmbe shɛhɛ ne, katepesle wəndə nya ntave Shala mbeli kaɗema wəndə keya ŋkɛ shɛ. Zhɛne ne, katese kwete wəndə nya te ghə le ka sewajɛa ŋkɛ kezha beze meleme ba'a ghɛa Shala. Ama katemte ŋkɛ mbe wəba ta hwepe wənəa Shala. Hwa'a te mte ta ŋkɛ ne, katempa ŋkɛ ba'a katebeze wəshi ŋkɛ kala nya ketarete geva.

²⁷Ma mbe kwa keɗaŋe ta vəa yɛ va mberefaŋe ne, kateŋka mbeli kwele kwele ŋkɛ le berete yitea mene wəsə nya ɗema hɛ. Ma kwa sebe ta yɛ va mahekene ba'a kwete yite ne, katefɛa yɛ melɛ ba'a wəshi nyi fə mbeli kase ŋkɛ. Katemene wəshi nyi ndiremi ndiremi kashasha ta ŋkɛ nde beze wəshia shɛhɛ kahe kahe hwa'a te və nya teza sebe te gheŋkɛ le ghəa ŋkɛ kala nya ketarete geva.»