Read KapsikiDC Ozɛ 10 Bible Online

Ozɛ 10 - KapsikiDC bible

Ozɛ 10

¹Nahe Israyɛl kese kala rɛzɛŋe ganyɛ nya keya kwele kwele. Ma kaya ŋkɛ kwele kwele ne, kapa yɛ reghwetɛ ŋkɛ kwele kwele. Ma kamtsehe jive te kema hɛɗia ŋkɛ ne, kamtsehe hi yɛ gɛaŋa ta ŋkɛ ŋkɛ.

²Nahe ka Israyɛl kenza kaka mbəɗəkwə, katenza ɗaŋeɗa ta fete ta nci kənəa hɛ tsetsenya. Kateŋzla yɛ reghwetɛa nci Mahwətə le ghəa ŋkɛ ba'a katenteɗe yɛ gɛaŋa ta nci ŋkɛ.

³Ma tsetsenya ne, ma ke hɛ sha geze: «Ma nda zhɛnema meghe kanza hwa gheɓəmə ne, va nya sema gheɓəmə kahawe va Mahwətə. Ama te ŋkwa nya nza nya gheɓəmə ne, wa yanza meghe kamenete ɓəmə wa?»

⁴Nda caŋa yatseha hɛ, fela tseŋwə yazeme hɛ, yɛ jikə geva yamene hɛ. Ama nahe wəsə nya tiɗiɗi kenza sha hɛ kala kwerehi nya kepese dzeyi mbe wəve.

⁵Ma mbeli nyi mbe Samari ne, va leve ta sla nya mbe Bɛt-Avɛn hawe hɛ. Kanehwene mbeli nyi mbe yitea levea shɛ, tsagha ka dzeghe Shala nyi mbe. Zlama hɛ yitea ganyɛa ŋkɛ, tsetsenya kaɗema ŋkɛ hwa hɛ gɛ gi!

⁶Katekele leve ta sla mbeli perə kadzeme Asiri kawəsə keve nda ke Meghe nya wəba. Katezhɛ hawe ke Ɛfrayim ba'a katehale dzeve Israyɛl va yɛ zəzə ta ŋkɛ.

⁷Rayɛ tenza sebe te Samari. Nahe meghea ŋkɛ kenza kala təkwə nya kele ghwa.

⁸Kateza geva sebe te kələŋə nyi mene jaɗafa nyi ka Israyɛl dzeyi hwa hɛ. Katezlere yɛ ndəŋwə ba'a yɛ gwezlembela kaja dzeyi te yɛ reghwetɛa nci. Ma ke hɛ sha tegeze vəa ŋkwa shɛ: «Yɛ ghweme, zhiɓə mə geva kənəa ghen'yɛ», «Yɛ wəmbə, dase mə geva kənəa ghen'yɛ.»

⁹Se te fete nya kwa Gibɛya ne, nahe ka Israyɛl kemenete jaɗafa. Kezhɛreke pa we. Ashɛ ndeɗekə kedzehwa ka jaɗafa shɛhɛ mpa kwa Gibɛya wəka?

¹⁰Kateme 'ya te hɛ. Ma va nya ndeke nda ghə hɛ ke fete ta nci nyi bake ne, katetsene geva hwelefefi yitea hɛ.

¹¹Nahe Ɛfrayim kenza kambəkwəa sla nya ke'yɛ 'yɛ, nya keɗe kaŋkeɗe ha te lane. Ma kwa nakɛ gwerezle nya mbe welɛa ŋkɛ 'ya ne, pa 'ya hwepeyite wəɗə yitea Ɛfrayim nahe Zhəwda kenza kwa wəza, wəsə kempə təsə yantsehe Israyɛl.

¹²Tsawe nda mə wəsə nya tiɗiɗi ke ghəa ŋayɛ, katemene ganyɛ yɛ se te wəve. Tsəhwə nda mə wəve mɛnɛfɛ ke ghəa ŋayɛ. Nahe və kese kezha zele ɗa yɛ, 'ya Mahwətə, pa te və nya tese 'ya kame nza tiɗiɗi kənəa gheyɛ.

¹³Ama nahe yɛ kewəzakɛ 'yaghwa mehele, nahe yɛ kemeneke wəsə kwa ndiremi te wəve ba'a nahe yɛ kezehwe ya ta tseŋwə. Israyɛl, nahe na kevate ghə te berete ta ŋa ba'a te kwele kwele ta ka sewajɛa ŋa.

¹⁴Vatse tetsa geva kaka hwa mbelia ŋa, kateŋzlamte geva pɛtɛa meleme ta ŋa nyi berete berete. Katenza hɛ kala Bɛt-Arbɛl. Ma vəa ŋkwa nya have nda mpa meghe Shalman ne, nahe ŋkɛ keghazlemte yɛ meghekɛa ŋwale ba'a ŋwalea nci.

¹⁵Nya ya kawəsə nya mtseke ŋayɛ wəsə nya menete yɛ mbe Bɛtɛl, va dzawea 'yaghwa mehele ta ŋayɛ. Kiɗima ta ŋkwa ne, rayɛ tenza sebe te meghe nya mbe Israyɛl.