Read KapsikiDC Ozɛ 12 Bible Online

Ozɛ 12 - KapsikiDC bible

Ozɛ 12

¹Ma ke Shala: «Kantəslə ɗa Ɛfrayim le tseŋwə, kadzasle ɗa Israyɛl le mbəɗəkwə. Ama nahe Zhəwda kenza le 'ya, nahe ŋkɛ kenza dɛŋe dɛŋe te 'ya, 'ya Shala nya kaganda.»

²Kabehe ghəa ŋkɛ Ɛfrayim le sefə, kahwɛ ŋkɛ kavəghwə kwa sebe ta sefəa ŋkwa kesame ta veci. Kaslə yɛ tseŋwə ŋkɛ ba'a kamene berete ŋkɛ kwele kwele. Kamene jikə geva ŋkɛ le Asiri ba'a kafə nda n'yi ŋkɛ ke Ɛzhipte.

³Nahe Mahwətə kenza mbe ghena le Zhəwda. Kateme ŋkɛ te hwelefe ta Zhakob va dzeghwa kwa ndiremi ta ŋkɛ, kateŋki nda zhɛme ŋkɛ kala yɛ slene ta ŋkɛ.

⁴Ma mba Zhakob kwa hwə ne, nahe ŋkɛ kekelehwe ŋkwa wəza meghekɛ. Ma kwa mene za ŋkɛ ne, pa wətite wəti le Shala.

⁵Pa ŋkɛ wətite wəti le nde ghwene ta Shala ba'a hərəte ŋkɛ. Ntake Zhakob kanehwene ba'a ka'yɛwe wəpi ve. Pa Zhakob begeme le Shala mbe Bɛtɛl, tagha gezete ɓəmə ghena Shala.

⁶Nahe Mahwətə kenza kaShala nde berete. Ma ke gheŋkɛ nya heka mbeli “kaMahwətə” gezete:

⁷«Katezhɛre geva na kase sha 'ya, 'ya Shala ta ŋa. Nza ganyɛke, hawe va wəsə nya tiɗiɗi ba'a ve ghə te 'ya kevə kevə, 'ya Shala ta ŋa.»

⁸Ma ke Shala gezete: «Ɛfrayim, kala ka Kanan ne, kiləwə mbəɗəkwə ya yitea dzeve va gha, mene mbəɗəkwə yaɗe na.

⁹Ma pa na gezete: ‹Kaganda ne, nahe 'ya kezhɛre kande galɛpi, nahe 'ya kekemave mcɛlə. Ama kemenete wəsə kwa ndiremi 'ya we, kasləyi wəsə fete wəndə mbe 'ya we.›

¹⁰Ama 'ya Mahwətə ne, 'ya ya kaShala ta ŋa se te və nya same na kwa Ɛzhipte. Katezhɛne 'ya kave ŋa nza dzeyi mbe yɛ cɛ lekwesa, kala nya te və nya begeme 'ya le gha.

¹¹Nahe 'ya kegezete nda ghena ke ka mɛ ŋkwa ba'a keghweneke nda wəshi nyi ketemene geva ke hɛ. Laka ka mɛ ŋkwa ne, nahe 'ya kegezete ghena keyipə pa.

¹²Nahe ka Gala'ad kenza kaka mefətekwə ganji, nahe hɛ kezhɛrenji kawəshia kwadanji. Kadzeghe melɛ hɛ le mcɛmcɛli kwa Gilgal. Ama nahe reghwetɛa nci kenza kala tsene ta yɛ pelɛ dzeyi mbe yɛ wəve.»

¹³Pa Zhakob hwɛnyɛ kadzeme Mɛzopotami. Pa Israyɛl menete slene kadzembe male. Kaganda ne, kadzembe male yate wəshi ŋkɛ.

¹⁴Ama laka nde mɛ ŋkwa ne, nahe Mahwətə kekelakame Israyɛl kwa Ɛzhipte. Te zlaɓa ta nde mɛ ŋkwa ne, nahe Israyɛl keyate geva.

¹⁵Nahe Ɛfrayim kevate zhi nya ndiremi te Shala. Ama katezhɛne zhɛme ta mpə ŋkwa ta ŋkɛ Nde sleke ŋkɛ kwa ghəa ŋkɛ, kateŋki nda yɛ ŋele ta ŋkɛ ŋkɛ.