Read KapsikiDC Ozɛ 2 Bible Online

Ozɛ 2 - KapsikiDC bible

Ozɛ 2

¹Ma te kwete hɛ ne, katenza ka Israyɛl kwele kwele kala ndaleghe nya kwa hələ, kateɓelate hɛ mbeli we. Ma te ŋkwa nya se Shala kageze: Kenza yɛ kahwelefe ta ɗa we, ke sha hɛ ne, kateheka hɛ ŋkɛ “kaŊwalea Shala teghweme”.

²Ma ka Zhəwda ba'a ka Israyɛl ne, katezhɛne hɛ kanza kanya kwetɛŋe, katenta meghe hɛ kwetɛŋe hwa ghəa nci ba'a katenza hɛ kaka sleke hɛɗi. Kaveci nya wəba tenza ŋkɛ mbe Zhizrɛyɛl.

³«Hwelefe ta ɗa» pe yɛ sha ka kesaka yiteyɛ ŋayɛ, «Kwa jiwənia ɗa» pe yɛ sha ŋwalea kwɛa yiteyɛ ŋayɛ.

⁴Ma ke Shala: «Dzete mə ghwə le Israyɛl, meyɛ ŋayɛ, kaganda ne, dzete mə ghwə le, kwa nza ŋkɛ kazhɛne nde kanza kamale ta ɗa ba'a kazhɛne 'ya kanza kaza nta we. Fəmte wəshi nyi kencɛ mefətekwəa nta nde kwa kema ta nta, tsagha nyi kencɛ vale tahe ta nta kwa ŋ'wa ta nta.

⁵Ma ewə ke ne, kateseɗemte lekwesa 'ya kənə ba'a kateve ŋkɛ 'ya derelɛŋe lɛŋe kala nya sawa nde kwa hwə. Katezhɛre hɛɗia nta 'ya kaɓerama, katezhɛre ŋkɛ 'ya kahɛɗi nya helɛŋe helɛŋe ba'a katepesle ŋkɛ 'ya le ndere.

⁶Kateɗe ŋwalea nta 'ya we: nahe hɛ kenza kaŋwalea male mefətekwə.

⁷Kwa nza ŋkɛ ne, nahe megheyɛa nci kemenete mefətekwə, nahe male nya keyake hɛ kepəlike hawe. Kwa nza ŋkɛ ma ke kwalɛ ŋa nta: Kwa sebe ta ka meghwateshia ɗa ɗe 'ya kahwɛ, mbeli nyi keve ɗa ɗafa ba'a yɛmə, shintia təmə ba'a pawa, n'yi ba'a wəshi kesa.

⁸Ma 'ya, 'ya Shala gɛ ne, katentsa nda hweŋkwa 'ya le hwele, katedzasle ŋkɛ 'ya kwa zli kezha zhɛnema nde kasləyi hweŋkwa ta nta.

⁹Katehwɛ nde kwa sebe ta ka meghwateshia nta, ama katekekave hɛ nde we. Katezele hɛ nde, ama katesləyi hɛ nde we. Tagha gɛ, ma ke sha tegeze: Katezhɛre geva 'ya kalə ghɛa za makwa ɗa, kwa nza ŋkɛ te zeɗe nza ma se 'ya vəashi ke nya tsetsenya.

¹⁰Kedzembe ghəa nta nde ka'ya nde se kanta nda ha, kasa nda tɛ ba'a kave n'yi nya lɛnɛa we. 'Ya nde se kave nda mze kwa tɛawetɛa ba'a mze kwa tere tere, ama nahe nde kemenehwe slene le hɛ kezha Ba'al.

¹¹Vatse gɛ ne, katezhɛne geva 'ya kase kakele ha ta ɗa te vəa mene wəshi se te wəve ba'a tɛ mɛnɛfɛa ɗa hwa feghwea rɛzɛŋe. Katezləgwə lekwesa shintia təmə ta ɗa ba'a ŋa pawa ta ɗa nyi dəpə geva nde le hɛ 'ya.

¹²Tsetsenya ne, 'ya kateseɗemte lekwesa kənə kwa ntsə ta ka meghwateshia nta. Wəndə shɛ katembele ŋkɛ shave mbe dzeve ta ɗa we.

¹³Kateza sebe 'ya te yɛ zlama ta nta, te yɛ gəsəkə nyi keva keva ta nta, te yɛ gəsəkəa dzemɛa ghweme ta tere ta nta, te yɛ veci kezhɛne mpi ta nta ba'a te yɛ pɛtɛa gəsəkəa nta.

¹⁴Katempə yɛ rɛzɛŋe ba'a yɛ dasekwa ta nta 'ya. Ma ke sha se kageze te ghəa nci: Zhɛme nya ndeke ɗa ka meghwateshia ɗa hɛ. Katezhɛre hɛ 'ya kagamba, katezeme hɛ wəshi keseɗa nyi hwa gamba.

¹⁵Kateve ɗa 'ya te tewəmbəreke və nyi zamte nyi kahawe va yɛ Ba'al. Nahe nde kese katere nda 'wərdə ke hɛ. Nahe nde kese kaseɗe yɛ ŋgwedɛba ba'a yɛ zhɛɗa, nahe nde kese kahwɛ kwa sebe ta ka meghwateshia nta. Ama 'ya ne, nahe nde kezaghəyite ɗa, 'ya Mahwətə nde gezete.

¹⁶Vatse gɛ ne, 'ya kateɗa geva yite, 'ya katekele ŋkɛ kadzemte te ɓerama ba'a 'ya katekese mehele ta nta.

¹⁷Kwamtea shɛ ne, katezhɛne nda yɛ rɛzɛŋea nta 'ya, katezhɛre zlərəa Akor 'ya kaŋkwa kedzembe mbele. Kwamtea shɛ ne, katezhɛne ghena nde kala nya te və nya se nde kadegheli, kala nya te veci nya same nde kwa Ɛzhipte.»

¹⁸Ma ke Mahwətə: «Ma te vecia shɛ ne, ‹Za ɗa› a ke sha teheka ɗa. Katezhɛne nde kaheka ɗa ‹kaBa'al ɗa›, geze ta ŋkɛ, nde sleke ɗa we.

¹⁹Katekele sləa yɛ Ba'al 'ya same kwa mɛa nta, katezhɛne mbeli kahekɛme sləa nci we.

²⁰Ma te vecia shɛ ne, katemene jikə geva 'ya kezha mbelia ɗa le wəshi keseɗa nyi kwamte, 'yɛ nyi yitea ghweme ba'a wəshi nyi kentsehe geva dzate te hɛɗi. Ma yɛ rəgi, yɛ kafayɛ ba'a kweci wəshi kempa ne, katehwəshi hɛ 'ya ba'a kateza hɛ 'ya te hɛɗi. Katepele nda hweŋkwa 'ya ke mbelia ɗa kahɛ gwezlayɛ.

²¹Katenza na, gha Israyɛl kameghwate ɗa kaghala ghala, katenza na kameghwate ɗa laka nza tiɗiɗi ba'a kaganda, laka ɗe ba'a ganyɛa mehele.

²²Katenza na kameghwate ɗa laka kaganda. Ma tsagha ne, kateɗepete ɗa na kaMahwətə.»

²³Ma ke Mahwətə: «Ma te vecia shɛ ne, katezhɛne səkwə ta ghweme 'ya, katezhɛne ŋa hɛɗi ghweme perə.

²⁴Katezhɛne səkwə ta ha, tɛ mɛnɛfɛ ba'a n'yi nya lɛnɛa hɛɗi. Ma pɛtɛa wəshi nyi ne, katezhɛne səkwə ta Zhizrɛyɛl hɛ.

²⁵Katetsawe wəshi 'ya kaŋa ɗa te hɛɗi, kateɗe ‹Kwaɗema› 'ya. ‹Gha ya kahwelefe ta ɗa› a 'ya sha tegeze nda ke ‹Kaɗema kahwelefe ta ɗa.› Ma gheŋkɛ ne, ‹Shala ta ɗa› a ke sha tegeze ɗa.»