Read KapsikiDC Ozɛ 4 Bible Online

Ozɛ 4 - KapsikiDC bible

Ozɛ 4

¹Fete yave nda Mahwətə ke mbeli nyi te hɛɗi. Ka Israyɛl, fa mə ghena nya geze Mahwətə: «Teke ne, kaganda ba'a ganyɛa mehele shɛ we. Te hɛɗi nya ne, kezhɛne mbeli kaɗepe ɗa kaShala we.

²Ma te yayata ŋkwa ne, bezla ŋkwa, ghwete ŋkwa, pesle ŋkwa, ghərə ba'a vale tahe ya shɛ. Nda ŋkwa yampə mbeli.

³Vatse gɛ ne, katenza ɓɛaŋwela te hɛɗi, katedene pɛtɛa mbeli nyi te, tsagha wəshi keseɗa nyi hwa gamba ba'a 'yɛ nyi yitea ghweme. Pa le kelepe nyi kwa ndərə kateza.»

⁴Ma ke Shala: «Ntsehwele mə! Kehi kave nda fete mbeli ke yayata wəndə keɗema kaŋele yayata wəndə mbeli we. Ama ma ke gheyɛ ka dzeghe Shala ve ŋayɛ fete 'ya.

⁵Katetsa ŋayɛ tehene heveci, tsagha ka mɛ ŋkwa, kala gheyɛ heviɗi. Kateza sebe 'ya te Israyɛl, meyɛ ŋayɛ.

⁶Kaganda ne, mbelia ɗa kaza va nya ɗepema ɗa hɛ. Ama va nya ɗema yɛ kese kaɗepe ɗa ne, vatse teɗema 'ya kazhɛne kaɗe ŋayɛ, katezhɛne yɛ kanza kaka dzeghe ɗa melɛ we. Nahe yɛ kezaghəyite wəshi nyi tekete ŋayɛ Shala ta ŋayɛ. Ma 'ya perə ne, katezaghə ŋwalea ŋayɛ 'ya.

⁷Nahe pɛtɛa ka dzeghe Shala, kaɗema ghala kwa kemenete ɗa fete. 'Ya katezhɛre zləvəa nci kawəsə hawe.

⁸Melɛ nyi dzeghe mbelia ɗa va jaɗafa yazeme hɛ, mene fete ta mbelia ɗa yamawe hɛ.

⁹Yipə yipə temeha ghwə 'ya te ka dzeghe melɛ le mbeli. Kateme 'ya te hɛ va dzeghwa ta nci, katedzəɓə slene ta nci 'ya kənəa hɛ.

¹⁰Katezeme wəshi kezeme hɛ kaɗema kabehe, katemene mefətekwə hɛ kaɗema kaya ŋwale, kwa nza ŋkɛ nahe hɛ kewəfəyite ɗa, 'ya Mahwətə, kezha lə kamene mefətekwə.

¹¹Dewə mehele yave nda mene mefətekwə ba'a tɛ ke mbelia ɗa.

¹²Sheghwə nya feɗete mbeli yafa ghena hɛ ve. Ama geta nde ncɛ nda wəshi ke hɛ. Sefəa mene mefətekwə nde vɛ kənəa hɛ ba'a nde fə hɛ same kwa hweŋkwa ganyɛ. Tagha gɛ, ntəŋə hɛ yitea mene mefətekwə nya keve hɛ cakeɗake le Shala ta nci.

¹³Kadzeghe melɛ hɛ dzeyi kwa ghəa yɛ ghweme, katere 'wərdə hɛ dzeyi te yɛ wəmbə, dzeyi yitea wəfe nyi jama jama nyi nza shenaŋkwe ta nci lɛnɛake. Vatse mene mefətekwə ŋwalea kwɛa ŋayɛ ba'a mene vale tahe ka makwashia ŋayɛ.

¹⁴Ama kateme 'ya te ŋwalea kwɛa ŋayɛ, va nya menete mefətekwə hɛ, ya te ka makwashia ŋayɛ va nya menete vale tahe hɛ we. Kwa nza ŋkɛ ne, te gheyɛ ka dzeghe Shala teme 'ya va nya se yɛ kadzeyi wəmbəa ŋkwa le mi nyi kemene mefətekwə ba'a va nya zehwe wəshi melɛ yɛ le mi mefətekwə nyi dzeyi mbe yɛ ghɛa Shala ta ŋayɛ. Ma ke kwete ghena ŋela gezete geva: ‹Ma mbeli nyi ɗema zəzə va hɛ ne, mbeli nyi keza za hɛ.›»

¹⁵Ya gha Israyɛl nza kamene mefətekwə ne, yakɛ ghəa ŋkɛ Zhəwda va mene fete tsagha gi! Dzawama Gilgal yɛ ma, dzemema Bɛt-Avɛn yɛ ma, zemema fela yɛ: Le Mahwətə nya teghweme, pe yɛ ma.

¹⁶Kaganda ne, nahe Israyɛl kese kezlere zlere kala sla nya kezlere zlere. Ma tsetsenya ne, va wa newe ghweme Mahwətə te, kala zhɛgwəa lɛməa timɛti nyi ŋka mbeli kadzete ŋkwa gwəzə ganji wa?

¹⁷Nahe ka Ɛfrayim kendeke nda ghəa nci ke kweci shala. Newe mə hɛ le ntsə.

¹⁸Ma kwa nahemte sa wəshi hɛ behe behe ne, ntəŋə hɛ yitea mene mefətekwə. Ɗehwe ma hawe hɛ ke zləvə.

¹⁹Katefə hɛ sefə mbe yɛ bidzəa ŋkɛ. Katezhɛ nda hawe ke hɛ va yɛ melɛa nci.