Read KapsikiDC Ozɛ 6 Bible Online

Ozɛ 6 - KapsikiDC bible

Ozɛ 6

¹Tagha gɛ, ma pe yɛ gezete: «Nde mə, zhɛre nda ɓəmə geva ke Mahwətə. Gheŋkɛ nde ɗakɛ ɓəmə le zhi, gheŋkɛ nde tembe ɓəmə. Gheŋkɛ nde vate ɗa te gheɓəmə, gheŋkɛ nde tepeɗe zhia ɓəmə.

²Ma kwetere wəmbəa hɛ bake ne, katezhɛne ɓəmə wənə ŋkɛ, Ma te kwa mahekene ta hɛ ne, katefə ɓəmə ŋkɛ same kwa kwele. Tagha gɛ, katenza gheɓəmə kwa kema ta ŋkɛ.

³Ntsə ɓəmə geva kaɗepe Mahwətə, kaganda nza se ta ŋkɛ kala kiɗi ta ŋkwa, katese ŋkɛ sha gheɓəmə kala meŋzleghele, kala va feghwe nya keɓasle hɛɗi.»

⁴Ma ke Mahwətə zhɛnete ŋayɛ: «Wa wəsə nya temene ŋa 'ya wa Ɛfrayim? Wa wəsə nya temene ŋa 'ya wa Zhəwda? Nahe ɗe ta ŋayɛ kenza kala ləmbə nya masheke, kala mɛnɛ nya keteməma kabete masheke.

⁵Vatse ɗate ŋayɛ 'ya laka ka mɛ ŋkwa, mpəmte ŋayɛ 'ya laka ghena nyi kwa mɛa ɗa. Kateɓele meha ghwə ta ɗa kala waŋe.

⁶Kwa nza ŋkɛ ɗe yamawe 'ya, za ma ke melɛa nyi le wəshi keseɗa. Ɗepe ɗa kaShala yaɗe 'ya, za ma ke yɛ melɛ kwa tere tere.»

⁷Ama gheyɛ nyi mbe meleme ta Adam ne, nahe gheyɛ kepelemte jikə geva ta ɗa. Tagha pamte ɗa gheyɛ

⁸Nahe Gala'ad kenza kameleme ta ka ndiremia mehele, rayɛ va yɛ tɛakwe ta mimi.

⁹Kala ka ghərəa kɛfi nyi te ghweɓe ne, wa nya wəvəsəa ka dzeghe Shala nya kampə mbeli kwa hweŋkwa ta Sishɛm. Wəsə nya ndiremi kashasha yamene hɛ deŋwa!

¹⁰Ma te hɛɗia Israyɛl ne, nahe 'ya kenakɛ wəshi nyi ndiremi ndiremi kashasha: te hɛɗia shɛ mene mefətekwə ka Ɛfrayim, zhɛrenji ka Israyɛl wale wale.

¹¹Kaŋa ŋa perə gɛ Zhəwda, takwa takwa vəa mene wəshi se te wəve, vəa ŋkwa nya tezhɛne mbelia ɗa 'ya te ŋkwa nci.