Read KapsikiDC Ozɛ 7 Bible Online

Ozɛ 7 - KapsikiDC bible

Ozɛ 7

¹Ma te və nya ɗe 'ya kambe Israyɛl ne, kancɛ geva fete ta Ɛfrayim ba'a beze ghena ta Samari. Kaganda ne, mbəɗəkwə yamene hɛ, kantsa ghɛ ka ghərəa kɛfi kaberete, kafə wəshi ka mefətekwə dzeyi kwa yɛ hweŋkwa.

²Kazəzə wəsə kwa ndiremi nya mene hɛ hɛ we. Nahe 'ya kezəzəte ŋkɛ. Tsetsenya ne, kadzasle hɛ yɛ slene ta nci, kevə kevə nza ntsə ta ɗa te hɛ.

³Ma mbe 'yaghwa mehele ta nci ne, wəshi ŋ'wəshi yamene nda hɛ ke meghe, Ma laka tseŋwəa nci ne, və yaza nda hɛ ke mbeli nyi te ghə.

⁴Pɛtɛ hɛ kamene vale tahe. Nahe hɛ kenza kala dəghwə nya kenefemte nefe nya zhɛnema nde ta ɗafa kanewe se te və nya ntawa hə nde kwa hwa'a te və nya wepe ŋkɛ.

⁵Ma te vecia gəsəkəa meghea nci ne, shewə shewə nza mbeli nyi te ghə va mesle ta tɛ. Kaha nda dzeve meghe ke ka ŋ'wəshi ŋkwa,

⁶te və nya hendeke geva hɛ. Ma mbe tseŋwəa nci ne, nahe hɛ kenza kala dəghwə. Kagweɗakwe hwepe wənəa nci kahɛ, Ama masheke ne, kafeɗeghe nde ba'a katse nde kala ghwə nya wəba.

⁷Pɛtɛ hɛ kenefe nefe kala dəghwə, kampə mbeli nyi te ghəa nci hɛ. Nahe pɛtɛa ka meghea nci kebete, wəndə shɛ hwa hɛ ketsave ɗa lewela we.

⁸Nahe Ɛfrayim kenza yipə le kweci mbeli, nahe Ɛfrayim kenza kakwasayɛ nya sema mbeli kazhɛre.

⁹Kamɓisə berete ta ŋkɛ ka se se, ama keɗepe ŋkɛ we. Shinti meha ya mbe ghəa ŋkɛ, ama keɗepe ŋkɛ we.

¹⁰Kele ghəa ka Israyɛl nde ve nda fete ke hɛ, ama kazhɛre geva hɛ kase sha Shala Mahwətə ta nci we. Mbe pɛtɛa wəshi nyi kemenete geva nyi ne, kese hɛ kazele ŋkɛ we.

¹¹Nahe ka Ɛfrayim kenza kala gezhia gheɗepe nya dewə nda mehele: katsa nda lewela hɛ ke Ɛzhipte, kahwɛ hɛ dzeme laka Asiri.

¹²Ma te və nya tehwɛ hɛ kalə ne, katenegha zamba ta ɗa 'ya kənəa hɛ, katekese hɛ 'ya kasawa kala yɛ 'yɛ, katekese hɛ 'ya le keleŋa fatema ta ɗa ke tsene ta nci.

¹³Wa nya ndiremi te hɛ kwa nza ŋkɛ hwɛ yahwɛ hɛ va 'ya gɛ! Wa nya beze te hɛ kwa nza ŋkɛ nahe hɛ kefatema ɗa ghena gɛ! Tseŋwə yasla hɛ te 'ya. Tagha gɛ ne, tsema nza 'ya kambelete hɛ wa?

¹⁴Katsa ɗa lewela hɛ le wənə kwetɛŋe we. Ama ŋələvə yaŋələvə hɛ te gezle ta nci, geva ta nci yaperawe hɛ kezha kemave ha ba'a tɛ mɛnɛfɛ. Ma kala nya ne, wəsə nya ɗema mehele ta ɗa yamene hɛ.

¹⁵'Ya nde tekete nda wəshi ba'a nde ndeke nda berete ke hɛ. Ama wəsə kwa ndiremi yazəzə hɛ te 'ya.

¹⁶Ya hɛ zhɛreke geva ne, kenza laka 'ya we. Nahe hɛ kenza kala rəgi nya metələ. Katempə mbeli nyi te ghəa nci va kafayɛ tewəmbəreke ghena ŋkele ntsə nya geze hɛ. Tagha gɛ, kateŋ'wəshi hɛ mbeli kwa Ɛzhipte.