Read KapsikiDC Ozɛ 8 Bible Online

Ozɛ 8 - KapsikiDC bible

Ozɛ 8

¹Vɛ mə vəaŋə, tsa mə lewela: ndiremi kame te hɛɗia Mahwətə kala zele. Ma ke Shala: «Kese hɛ kahawe va jikə geva ta ɗa we, kese hɛ kanza dɛŋe dɛŋe te wəsə nya tekete nda 'ya ke hɛ we.

²Ma ke hɛ sha tsa ɗa lewela: ‹Shala yawe, nahe ghen'yɛ kenza kaIsrayɛl, nahe ghen'yɛ le ghəa n'yɛ keɗepe ŋa›

³Nahe Israyɛl keneghakɛ ganyɛ. Katekeka ŋkɛ nde ghema ta ŋkɛ.

⁴Pa hɛ ntentave ka meghea kɛfi, kaɗema kese ka'yɛwe va 'ya. Pa hɛ veveyi mbeli nyi te ghə kaɗema kese kageze ɗa. Pa hɛ fəte mze kwa tɛawetɛa ba'a mze kwa tere tere ta nci kezha vɛsə wəshi nyi zhɛrete mbeli kashala, yitea zamte geva sebe te hɛ.

⁵Ka Samari, neghamte mə leve ta sla ta ŋayɛ gɛ! Nahe wənəa ɗa kewepenyɛ va hɛ. Pa te nyama və teɗema ɗa kanza te hɛ wa?

⁶Se mbe Israyɛl levea shɛ, nde vɛsə mze nde menete ŋkɛ, kenza ŋkɛ kaShala we. Kaganda ne, katempəmte geva leve ta Samari.

⁷Ma kwa nza ŋkɛ sefə yatsawete hɛ ne, sefə nya wəba yatetsa hɛ. Ma ke kwete ghena ŋela gezete geva: ‹Ma zləkə nya keveyima ghə ne, kaŋ'wete hə mbeli yite we.› Ya mbeli ŋ'wete ɓɛhwɛ ne, ka se se ka tezeme ŋkɛ.

⁸Nahe Israyɛl kendahwe geva. Nahe ŋkɛ kenza hwa mbeli tsetsenya kala gezlehwe nya zhɛnema mbeli kaɗe.

⁹Pa Ɛfrayim dzeme laka Asiri kala kwara gamba nya kendeŋe ghəa ŋkɛ. Pa ŋkɛ pave ka meghwateshi.

¹⁰Ya hɛ nehe nda wəshi gəmə ke kweci mbeli ne, 'ya katetsene hɛ tsetsenya. Temə vireɗi ne, katesa yaka hɛ va wəsə nya ɗaŋeɗa ta meghea mbeli nyi te ghə.

¹¹Kwele kwele pate reghwetɛ Ɛfrayim yitea kemave yaɓe jaɗafa. Ama reghwetɛa shɛhɛ ne, mene jaɗafa yamtsehete nda hɛ.

¹²Ya 'ya rafete nda wəshi mahalegə slibə ne, katenza hɛ shɛ kala kwete wəsə.

¹³Va nya ɗe hɛ kazeme sli dzeghe melɛ hɛ. Ama zeɗehwe ɗa melɛa nci, 'ya Mahwətə we. Tsetsenya ne, katezəzə yɛ fete ta nci 'ya ba'a kateɓela yɛ jaɗafa ta nci 'ya. Katezhɛne geva hɛ kadzawa Ɛzhipte.

¹⁴Nahe Israyɛl kezaghəyite nde pate ŋkɛ, nahe ŋkɛ keŋate yɛ ghɛ meghe. Ma Zhəwda le ŋa ŋkɛ ne, kwele kwele ŋate meleme nyi berete berete ŋkɛ. Ama katendə ghwə 'ya yitea yɛ meleme ta ŋkɛ, katetere ghɛ ganjia nci ghwə.»