Read KapsikiDC Zhowɛl 1 Bible Online

Zhowɛl 1 - KapsikiDC bible

Zhowɛl 1

¹Ghena nya gezete nda Mahwətə ke Zhowɛl, wəzege ta Petəwɛl.

²Gheyɛ mbelia jama, fa mə ghena nya, gheyɛ pɛtɛa ka Zhəwda, ghwene mə sleme. Nahe wəsə nya kala nya kegha kamenete geva te vəa ŋayɛ keɗema te vəa ka shihɛ ŋayɛ na?

³Ɓela nda mə ghena shɛ ke ŋwalea ŋayɛ, kateɓela nda ŋkɛ hɛ ke ŋwalea nci, kezha ɓela nda ŋkɛ ŋwalea nci ke mbeli nyi keteya kwa sebe ta nci.

⁴Ma wəshi nyi ketene yitea mɛa yɛ geteɗə te wəve ne, nahe yɛ dzale kezehwe hɛ. Ma nyi ketene yitea mɛa yɛ dzale ne, nahe yɛ zhamaya kezehwe hɛ. Ma nyi ketene yitea mɛa yɛ zhamaya ne, nahe yɛ jagha kezehwe hɛ.

⁵Ka ghwəyi ghwəyi, feɗeghe mə ba'a nehwene mə! Gheyɛ pɛtɛa ka sa tɛ, ŋgaɗe mə ghəa ŋayɛ, katezhɛne tɛ mɛnɛfɛ kadzete mɛa ŋayɛ we.

⁶Nahe ləmbəa yɛ dzale kepesleyi geva te hɛɗia n'yɛ. Nahe hɛ kenza keberete beretenji, kaɓelate hɛ mbeli we. Nahe yɛ slene ta nci kenza kala ŋa nivɛrə, nahe yɛ ghweleme ta nci kenza kala ŋa ŋemalea nivɛrə.

⁷Nahe hɛ kezhɛrete yɛ rɛzɛŋea n'yɛ kaɓerama, nahe ŋkɛ kezamte sebe te yɛ dasekwa ta n'yɛ. Nahe hɛ kezehwe hɛ, nahe hɛ kempeɗehwe zlapələa nci ba'a nahe hɛ kezhɛrete yɛ dzeve ta nci tɛzlɛzlɛ.

⁸Ŋgaɗe mə ghə kala makwa nya nza wəsə hwa hwə ve kezha nehwene za makwa nta.

⁹Kezhɛne mbeli kafəke ha ba'a tɛ kadzembe ghɛa Shala we. Vatse nza ka dzeghe Shala mbe nehwene, ghenci nyi kaka mene slene ta Mahwətə.

¹⁰Nahe yɛ wəve kebezemte geva, nahe hɛɗi kenza helaŋe helaŋe. Nahe ha kebezemte geva, nahe tɛ mɛnɛfɛ kekiɗi ba'a nahe n'yi nya lɛnɛa kehase.

¹¹Nahe ka wəza kenza keyirə yirə, kaŋələvə ka mene slene mbe wəvea rɛzɛŋe. Nahe sebe keza te ha ba'a megi, rayɛ sebe te wəshi nyi kese te wəve.

¹²Nahe yɛ rɛzɛŋe keghwelenji, nahe yɛ dasekwa ketiwɛɗinji. Nahe yɛ kwakweme, yɛ peha, yɛ maŋgwerə, pɛtɛa wəfe nyi keya keghwelenji. Nahe zlama kekiɗinyɛ hwa mbeli.

¹³Gheyɛ ka dzeghe Shala, hwepe mə wəsə hwa hwə ba'a ŋgaɗe mə ghə. Gheyɛ ka mene slene te reghwetɛ, tsa mə lewela. Gheyɛ ka mene slene ta Shala ta ɓəmə, nza mə le wəsə hwa hwə kahɛ, va nya zhɛnema mbeli kafə wəshi ba'a tɛ kase kadzembe ghɛa Shala.

¹⁴Gezete mə vəa kemene səwəmayɛ, zlapete mə tsene nya wəba, tsenete mə mbelia jama ba'a pɛtɛa mbeli nyi te hɛɗi mbe ghɛa Shala Mahwətə ta ɓəmə, tsa nda mə lewela ke Mahwətə.

¹⁵Amaga, takwa takwa veci nya dzawe kase, vecia Mahwətə gɛ wa! Se yase ŋkɛ kala ndiremi nya keza wəshi pɛtɛ, nya ghweneke Shala nde berete.

¹⁶Nahe wəsə kezeme ta ɓəmə keza kwa ntsə ta ɓəmə, nahe zlama ba'a farefa keshave mbe ghɛa Shala ta ɓəmə.

¹⁷Nahe wəshi nyi tsawete mbeli keghwelenji mbe hɛɗi. Nahe yɛ tame kenza ghwalɛalɛa, nahe yɛ dɛdimə kenza keŋzla ŋzla, va nya ɗema ha shɛ.

¹⁸Fama mə nehwene ta wəshi keseɗa gi! Ndeŋe yandeŋe yɛ sla dzeyi te yayata ŋkwa, va nya ɗema gwəzə mba va hɛ. Pa le timɛti kadene.

¹⁹Mahwətə, katsa ŋa lewela 'ya! Kwa nza ŋkɛ katere gwəzə nyi hwa gamba ghwə, katse pɛtɛa wəfe nyi kwamte ghwə.

²⁰Pa le wəshi keseɗa nyi hwa gamba kazhɛre geva laka gha, kwa nza ŋkɛ nahe yɛ hələ kehasenji, katere gwəzə nyi hwa gamba ghwə.