Read KapsikiDC Amos 1 Bible Online

Amos 1 - KapsikiDC bible

Amos 1

¹Ghena ta Amos, kwete wəndə hwa ka ya wəshi nyi mbe meleme ta Tɛkowa yageze palepa nya. Wəshi nyi nakɛ ŋkɛ te ghəa ka Israyɛl te vəa yɛ Oziyas, meghea ka Zhəwda le Zhɛrobowam, wəzege ta Zhowas nya kameghea ka Israyɛl, va bake nda tegaŋkəɗə hɛɗi.

²Ma ke Amos: «Mahwətə kaghwəghwə mbe Zhɛrəzalɛm, kafefa ŋwələa ŋkɛ mbeli sawa pelɛ Siyon. Nahe ŋkwa kezeme gwəzə ta wəshi kebezemte geva, keghwele ghwele ŋkwa nya pelɛ ghəa ghweme ta Karmɛl.»

³Wa nya ghena nya geze Mahwətə nya: «Kwele kwele fete nyi ŋele ka Siri nyi mbe Damas 'ya yite. Wa nya fete nya ndiremi ma nya: nahe hɛ kerahakawa Gala'ad le lɛ nya njaŋa ŋa. Vatse ɗema 'ya katezhɛre zəzə ta ɗa:

⁴Katendə ghwə 'ya yitea ghɛ meghea Hazayɛl, katetere ghɛ nya wəba ta meghe Bɛn-Hadad ŋkɛ.

⁵Katenteɗe wəbəzli nyi te gelembe nyi mɛa Damas 'ya. Katekelemte meghe nya kwa zlərəa Mpə ŋkwa 'ya, katekelemte meghe nya kesleke Bɛt-Ɛdɛn 'ya. Ma ka Siri le ŋa nci ne, katefə hɛ mbeli kadzembe Kir.» 'Ya Mahwətə nde gezete.

⁶Wa nya ghena nya geze Mahwətə nya: «Kwele kwele fete nyi ŋele ka Filisti nyi mbe Gaza 'ya yite. Wa nya fete nya ndiremi ma nya: Nahe hɛ kefəmte mbeli nyi mbe meleme pɛtɛ kezha fə nda hɛ ke ka Ɛdom. Vatse ɗema 'ya katezhɛre zəzə ta ɗa:

⁷Katendə ghwə 'ya yitea zlia meleme ta Gaza, katetere ghɛ ganjia ŋkɛ ŋkɛ.

⁸Kateza sebe 'ya te ka Asdod ba'a te meghe nya kesleke hɛɗia Askalon. Kateɗa meleme ta Ɛkron 'ya, mɛke tempə ka Filisti nyi ketene teghweme.» 'Ya Mahwətə nde gezete.

⁹Wa nya ghena nya geze Mahwətə nya: «Kwele kwele fete nyi ŋele ka Fɛnisi nyi mbe Tir 'ya yite. Wa nya fete nya ndiremi ma nya: keyate jikə geva nya keveyi hɛ kaka kesaka ma le ka Israyɛl hɛ we. Nahe ŋkɛ kefəmte mbeli nyi mbe meleme pɛtɛ kezha fə nda hɛ ke ka Ɛdom. Vatse ɗema 'ya katezhɛre zəzə ta ɗa:

¹⁰Katendə ghwə 'ya yitea zlia meleme ta Tir, katetere ghɛ ganjia ŋkɛ ŋkɛ.»

¹¹Wa nya ghena nya geze Mahwətə nya: «Kwele kwele fete nyi ŋele ka Ɛdom 'ya yite. Wa nya fete nya ndiremi ma nya: Nahe hɛ kese kakeka ka Israyɛl nyi kaka menəhɛ nci le kafayɛ. Kese hɛ kazhɛ heli yitea hɛ we. Mbe hwepe wənəa nci ne, kefɛa hɛ yitea mpə ŋkwa we, nahe hɛ keveyi ghema nya keɗema kakiɗi. Vatse ɗema 'ya katezhɛre zəzə ta ɗa:

¹²katendə ghwə 'ya yitea Tɛman nya kameleme ta nci, katetere ghɛ ganji nyi mbe meleme ta Bosra ŋkɛ.»

¹³Wa nya ghena nya geze Mahwətə nya: «Kwele kwele fete nyi ŋele ka Amon 'ya yite. Wa nya fete nya ndiremi ma nya: ma kwa ɗe hɛ kambake hɛɗia nci ne, nahe hɛ kehehenakame ŋwale kwa hwə va mi mbe Gala'ad. Vatse ɗema 'ya katezhɛre zəzə ta ɗa:

¹⁴katendə ghwə 'ya yitea zlia meleme ta Raba, katetere ghɛ ganjia ŋkɛ ŋkɛ, te vecia mpa hwa kaka ta mpa, mbe sefə nya wəba te vecia mevale vale gwənzə.

¹⁵Katekele meghea nci mbeli kadzete kwete hɛɗi, gheŋkɛ le mbelia ŋkɛ nyi te ghə te veci nya kwetɛŋe.» 'Ya Mahwətə nde gezete.