Read KapsikiDC Amos 2 Bible Online

Amos 2 - KapsikiDC bible

Amos 2

¹Wa nya ghena nya geze Mahwətə nya: «Kwele kwele fete nyi ŋele ka Mowab 'ya yite. Wa nya fete nya ndiremi ma nya: nahe hɛ keteremte yɛ 'yɛ'yɛa meghea ka Ɛdom, hɛmɗɛke teremte hɛ hɛ kapəsəɗə. Vatse ɗema 'ya katezhɛre zəzə ta ɗa:

²Katendə ghwə 'ya yitea hɛɗia Mowab, katetere ghɛ ganji nyi mbe Kɛriyot ŋkɛ. Te tepe ta lewela, kaka ta mpa ba'a vɛ ta vəaŋə temte Mowab.

³Tseɗake tekelemte meghea ŋkɛ 'ya, pɛtɛ tempə mbelia ŋkɛ nyi te ghə 'ya zlaɓe le.» 'Ya Mahwətə nde gezete.

⁴Wa nya ghena nya geze Mahwətə nya: «Kwele kwele fete nyi ŋele ka Zhəwda 'ya yite. Wa nya fete nya ndiremi ma nya: nahe ŋkɛ keneghamte wəshi nyi tekete nda 'ya ke hɛ, kese hɛ kahawe va ghena nyi gezete 'ya we. Werete hɛ pelave nda ghəa nci ke shala tseŋwə nyi keghwetehwe ka shihɛ nci. Vatse ɗema 'ya katezhɛre zəzə ta ɗa:

⁵Katendə ghwə 'ya yitea hɛɗia Zhəwda, katetere ghɛ ganji nyi mbe Zhɛrəzalɛm ŋkɛ.»

⁶Wa nya ghena nya geze Mahwətə nya: «Kwele kwele fete nyi ŋele ka Israyɛl 'ya yite. Vatse ɗema 'ya katezhɛre zəzə ta ɗa. Wa nya fete nya ndiremi ma nya: nahe hɛ kepamte wəndə nya tiɗiɗi kamava kezha kemave cɛdɛ, nahe hɛ kepamte nde titikwə kezha kemave tsahwa meslɛcɛ.

⁷Njinjitə hɛ ŋame ghəa ka titikwəa kɛfi mbe hɛɗi. Kaɓela ka dewə ŋeli hɛ we. Male nya kwetɛŋe yavale yɛ yita le wəzege. Ma tsagha ne, zləvə yakelemte hɛ te 'ya.

⁸Ma te yayata ŋkwa kesəkwə ghə ne, lekwesa ta ka titikwəa kɛfi nyi veyi hɛ kwa jiŋgina yaɓelahe hɛ te. Ki ghɛa shala ta nci ne, tɛ nya zhɛnaghe ghə hɛ kənə yasa hɛ.

⁹Ndagwara nahe 'ya kezamte ŋayɛ sebe te ka Amor. Kewəba wəbanji kala ŋa lekeleke ba'a keberete beretenji kala yɛ cɛana se mbelia shɛhɛ. Nahe 'ya kezamte sebe te hɛ se kwa ghə pa te slərə.

¹⁰Vəashinyɛ ne, nahe 'ya kefəakave ŋayɛ shave mbe Ɛzhipte ba'a kebeghakɛ ŋayɛ kava wəfaɗemsə kwamte te ɓerama kezha kakelehwe hɛɗia Amor yɛ.

¹¹Ma kwa sebe ta ŋkɛ ne, nahe 'ya kentave ka mɛ ŋkwa hwa ŋwalea ŋayɛ, nahe 'ya kehekakɛ kweci hwa ka mempɛhwetɛtia ŋayɛ kezha ve hɛ tekeleke. Na, tseŋwəa ɗa na ka Israyɛl? 'Ya Mahwətə nde gezete.

¹²Ama pa yɛ sahwe nda tɛ ke mbeli nyi kezemete fela kaɗema kasa, pa yɛ fɛake ka mɛ ŋkwa kegeze ghena ta ɗa.

¹³Wa nya 'ya nya kateŋkeɗe ŋayɛ tsetsenya kala nya ŋkeɗe wəshi wəmata gədəwə nya nza ghəa ha viɗi te.

¹⁴Katekekave ŋkwa kewəfərə mbeli nyi wɛrewɛ ma we, katemene slene mbeli nyi berete ma le berete ta nci we, katembelete mpia nci ka katsala kɛfia ka sewajɛ we.

¹⁵Katezhɛne ghə nde he have we, katembelenyɛ wəndə nya kehwɛ tsape we, katembelete mpia ŋkɛ nde zleɗe gədəwə we.

¹⁶Ma te vecia shɛ ne, katebete wəshi kempa ta ŋkɛ wəndə nya katsala ma hwa ka katsala ka sewajɛ kezha hwɛ.» Nya ya kaghena nya gezete Mahwətə.