Read KapsikiDC Amos 3 Bible Online

Amos 3 - KapsikiDC bible

Amos 3

¹Gheyɛ ka Israyɛl, hwelefe nya zhɛnakame Mahwətə same kwa Ɛzhipte, fa mə ghena nya geze ŋkɛ te ghəa ŋayɛ:

²«Hwa hwelefe nyi te hɛɗi pɛtɛ ne, deke gheyɛ yaɗehwe 'ya. Vatse teme 'ya te gheyɛ te fete nyi menete yɛ pɛtɛ.»

³Kaləte lə zhili bake zlaɓe yitea dzeghwa kaɗema hɛ kegezehwe kaba na?

⁴Kaghwəghwə nivɛrə mbe gamba gəmə kaɗema ŋkɛ kekeseve sli na? Kafate ŋwələa wəzege ta nivɛrə mbeli te ghweɓe kaɗema ŋkɛ kekeseve wəsə na?

⁵Kakeseve 'yɛ keleŋa kaɗema wəsə kezeme ta ŋkɛ mbe na? Kaŋzla keleŋa kaɗema ŋkɛ kekeseve wəsə na?

⁶Kavɛte vəaŋə mbeli yitea mpa kaɗema mbeli nyi mbe meleme kanza benake na? Kasenyɛ ndiremi kadzete meleme kaɗema Mahwətə keghweneke na?

⁷Tsagha shɛ ne, kamene wəsə Shala Mahwətə kaɗema ŋkɛ kencɛte nda zəzə ta ŋkɛ ke ka mene slene ta ŋkɛ nyi kaka mɛ ŋkwa we.

⁸Ma kaghwəghwə nivɛrə ne, wa nde ɗema kaghazlənə wa? Ma kageze ghena Shala Mahwətə ne, wa nde ɗema kazlape ghena ta ŋkɛ wa?

⁹Zlape mə pelɛ ghəa cɛ ganji nyi mbe Asdod ba'a pelɛ ghəa nyi mbe Ɛzhipte, ma pe yɛ sha geze: «Tsene mə geva pelɛ ghweme nyi mbe Samari, newema mə nza ta kwelea yɛ beze ba'a yɛ mene berete nyi mbe.»

¹⁰Ma ke Mahwətə: «Keɗepe mene slene nya tiɗiɗi ka Samari we. Wəshi nyi fəke hɛ kaberete ba'a kaghərə yatsene hɛ dzeyi ki ghɛa nci nyi ganji ganji.»

¹¹Vatse gɛ, wa nya ghena nya geze Shala Mahwətə nya: «Katedzasle hɛɗi nya ka jaga, kateŋzla zli nya yite hɛ, katefə wəshi nyi ki ghɛa ŋa nyi ganji ganji hɛ.»

¹²Wa nya ghena nya geze Mahwətə nya: «Ma kekesehwe təmə nivɛrə ne, seɗa bake keɗema bela ta sleme yazləgwə nde ya wəshi mbe mɛa ŋkɛ. Tsagha tezləgwə geva ka Israyɛl nyi mbe Samari nyi keseserayɛyi geva te gezle keɗema te keshi deyɛte.»

¹³Ma ke Shala Mahwətə nde berete: «Fa mə ba'a geze mə ghena nya te ghəa hwelefe ta Zhakob:

¹⁴Ma te veci nya teɗa ka Israyɛl 'ya va fete ta nci ne, kateme 'ya te reghwetɛ nyi mbe Bɛtɛl. Katefelaŋe tereme nyi te reghwetɛ mbeli ba'a katebete geva hɛ te hɛɗi.

¹⁵Katempə ghɛ nyi nza mbeli mbe hwa ntasle ba'a nyi nza mbeli mbe hwa hwələ 'ya. Kateza sebe 'ya te ghɛ nyi rafekɛ mbeli le slene ta cewe ba'a ghɛ nyi jama jama.» Nya ya kaghena nya gezete Mahwətə.