Read KapsikiDC Zhonas 1 Bible Online

Zhonas 1 - KapsikiDC bible

Zhonas 1

¹Ma te kwete veci, ma ke ghena ta Mahwətə gezeke nda geva ke Zhonas, wəzege ta Amitay:

²«Sate, kwiɗi kadzawa Ninive, meleme nya wəba. Zlapave nda ke mbeli nyi mbe, kwa nza nde nahe 'yaghwa mehele ta nci kesame sha 'ya.»

³Ama pa Zhonas sate te ŋkwa, kezha hwɛnyɛ kadzawa Tarsis, cakeɗake va Mahwətə. Cape ŋkɛ kadzawa Zhafa kasepa kwambelə nya kejive Tarsis, pa ŋkikɛ, shilimə ŋkɛ kwa yitea slə le ka zleɗe kwambelə kajive, cakeɗake va Mahwətə.

⁴Ama pa Mahwətə menete sefə kavɛ kwele kwele te ndərə. Pa masefafele nya wəba menete geva yare kepesle kwambelə.

⁵Pa ghazlənə zhɛte nda ke mbeli nyi kwa kwambelə, ntake hɛ katsa lewela le səkwə, yayata wəndə yitea kemane shala ta ŋkɛ. Kwetere wəmbəa ŋkɛ, pa hɛ beteyi wəshi nyi kwa kwambelə kwa yɛmə yitea nza ŋkɛ kɛfe kɛfe. Ma Zhonas le ŋa ŋkɛ, pa dzawanyɛ kwa zeweve ta kwambelə ba'a ɓelahenyɛ, shelɛŋe yitea hɛ.

⁶Pa wəndə nya te ghəa mbeli nyi kezleɗe kwambelə hendave nda geva, ma ke shɛ: «Wa yamene na wa wəndə? Hɛ yahɛ na na? Sate, səkwə shala ta ŋa nda kwete kazəzəte ɓə ŋkɛ yagha mə kaza.»

⁷Ma ke hɛ kwelɛ ghəa nci: «Nde ɓəmə kasla kwasheghediɗi yitea ɗepete wəndə nya kekeleke ɓə wəsə kwa ndiremi nya kənəa gheɓə nya.» Pa hɛ slate kwasheghediɗi, pa vate geva te Zhonas.

⁸Ma ke hɛ shɛ ɓiyitsa: «Gha nde keleke ghena nya kadzete ghen'yɛ. Gezete n'yɛ wəsə nya mene na teke. Se tema se na wa? Wa hɛɗi nya se na te wa? Wa hwelefe ta ŋa wa?»

⁹Ma ke Zhonas zhɛnete nda ke hɛ: «Nde Ɛbrə 'ya, Mahwətə yahawe 'ya ve, Shala nya pelɛ ghweme, nya kepate yɛ ndərə le hɛɗi.»

¹⁰Kwetere wəmbəa ŋkɛ, pa gezete nda ghena ta ŋkɛ ke hɛ. Ntake mbeli nyighɛ kaghazlənə kwele kwele, ma ke hɛ shɛ: «Yitea wa menete na kala nya wa?» Kwa nza ŋkɛ ne, nahe hɛ keɗepete hwɛ yahwɛ ŋkɛ va Mahwətə. Ma ke hɛ shɛ:

¹¹«Wa yanza n'yɛ kamenete ŋa nda nza ndərə kagweɗakwete n'yɛ geva wa?» Va nya nza ŋkɛ mbake yambake geva gaŋkeɓe ta ndərə.

¹²Ma ke sha hɛ: «Kelete ɗa mə shɛ yɛ negheyi ɗa kwa ndərə nda nza ŋkɛ kagweɗakwe ŋayɛ geva. Nahe 'ya keɗepe, se te beze ghena ta ɗa nda se sefə nya ndiremi nya kamene geva kənəa gheyɛ.»

¹³Ama ntake mbeli nyighɛ kazleɗe kwambelə kezha kekave hələbə. Shaŋe hɛ, va nya nza nde mbake yambake geva ndərə kagaŋkeɓe kwele ma.

¹⁴Tagha gɛ, ntake hɛ katsa nda lewela ke Mahwətə, ma ke hɛ: «Mahwətə, təhwə təhwə ŋa n'yɛ, mba na kezamte n'yɛ tewəmbəreke wəndə nya. Mba na keve n'yɛ ghena kadzawa ghə te mte ta wəndə nya keɗema kebezemte n'yɛ ghena! Va nya nza ŋkɛ, gha Mahwətə nde mene kala nya ɗe na.»

¹⁵Kwetere wəmbəa ŋkɛ, pa hɛ kelete Zhonas kanegheyi kwa ndərə, taghanyɛ, pa gaŋkeɓe ta ndərə gweɗakwete geva.

¹⁶Ma tagha gɛ, pa mbeli nyighɛ ghazlənənji kwele kwele va Mahwətə. Pa hɛ dzeghekɛ nda melɛ ba'a pa hɛ menete nda meɗe mɛ le zeme fela.