Read KapsikiDC Zhonas 4 Bible Online

Zhonas 4 - KapsikiDC bible

Zhonas 4

¹Pa ghəa Zhonas ɗema tɛape kala nyagha, pa hwepete wənə.

²Pa səkwəte ghə sha Mahwətə le geze: «Mahwətə, wəsə nya yase 'ya kaghazlənə ve shɛ 'ya mba mbe meleme ta ɗa, vatse se 'ya kahwɛ kadzawa Tarsis. Nahe 'ya keɗepe Shala nya ganyɛa mehele nya kezhɛ heli na, nya ɗema wənəa ŋkɛ kahwepe kahe kahe, nya nza ɗe kwele kwele ve, nya ɗeke ɗeke kazhɛre geva seyi te ndiremi nyi tarete na.

³Tsetsenya gɛ Mahwətə, kelete mpia ɗa va nya nza nde megela ma nya mte ɗa 'ya kenya nza 'ya teghweme.»

⁴Ma ke Mahwətə shɛ: «Nahe ŋkɛ kehi kahwepe wənə na na?»

⁵Pa Zhonas shavenyɛ mbe meleme ba'a nzanyɛ laka ŋkwa kesame ta veci yitea Ninive. Pa ŋkɛ pate ghwəli tagha ba'a ntishɛnyɛ yitea shenaŋkwe ta ŋkɛ kezha newe wəsə nya ketemene geva mbe meleme.

⁶Pa Shala Mahwətə pesete kwete wəfe kahe kahe kakelenyɛ kənəa Zhonas yitea nza shenaŋkwe kənəa ghəa ŋkɛ ba'a kezha mbelemte shave mbe zəzə kwa ndiremi ta ŋkɛ. Kwele kwele ndeke nda zlama wəfea shɛ Zhonas.

⁷Ama te hendɛ ta ŋkwa masheke masheke, pa Shala ghwenakɛ kwete menteɗa kazememte wəfea shɛ, pa ghwelenyɛ.

⁸Kwetere wəmbəa ŋkɛ kwa same veci kwa ghɛ, pa Shala ghweneke sefə nya ghyana same kwa zeweve ta ghweme. Pa veci ndəkɛ Zhonas kwa ghə, yare keɓerezle ŋkɛ. Pa ŋkɛ 'yɛwete mte, ma ke gezete: «Megela ma mte kaŋa ɗa ke nza teghweme.»

⁹Ma ke Shala sha Zhonas ɓiyitsa: «Nahe ŋkɛ kehi kahwepe wənə na te ghəa wəfe nya na?» Ma ke Zhonas zhɛnete: «E'e, zlɛcɛ hwepe wənə 'ya pa te mte.»

¹⁰Ma ke Mahwətə gezete nda zhɛkwa: «Gha ne, kazhɛ ŋa helia ŋa yitea wəfe nya ɗema na kese kamene wəsə kezha kele ŋkɛ. Mbe viɗi kwetɛŋe pese geva ŋkɛ, mbe kwete viɗi mtenyɛ ŋkɛ.

¹¹Ma 'ya le ŋa ɗa ne, kaɗema heli ɗa kazhɛ ɗa yitea Ninive, meleme nya wəba, nya nza mbeli mbe kwele ma ke 120.000 nyi keɗepema nehe wəsə nya ganyɛ le nya ndiremi ba'a wəvəsəa wəshi keseɗa nyi kwele kwele gɛ na?»