Read KapsikiDC Ɓela 1 Bible Online

Ɓela 1 - KapsikiDC bible

Ɓela 1

¹Pa Mahwətə gezete nda ghena ke Moyize mbe cɛ lekwesa kebegeme geva, te ɓerama ta Sinay te kwa ghate ta hɛ mbe tere kwa bake, mbe kwa bake ta va kwa sebe ta shave ta nci mbe Ɛzhipte. Ma ke shɛ:

²«Ma gha le Aron ne, ɓelate mə pɛtɛa ka Israyɛl, keyita keyita ba'a keghɛ keghɛ. Katerafe sləa zhili yɛ pɛtɛ, kwetɛ kwetɛ.

³Ɓelate mə pɛtɛa zhili nyi nza va ta nci se te va bakemsə kajive mbe kema, nyi kenza wərə kadzemte mpa hwa ka sewajɛa ka Israyɛl. Ma gha le Aron ne, rafete mə sləa nci kewəvəsə kewəvəsəa ka sewajɛ.

⁴Katenza wəndə nya te ghəa yayata yita yitea gheyɛ.

⁵Wa nyi sləa mbeli nyi ketenza yitea gheyɛ nyi: ma kwa yita ta Rəbɛn ne, Ɛlisəwr, wəzege ta Shedɛwər.

⁶Ma kwa yita ta Simɛyon ne, Sheləwmiyɛl, wəzege ta Səwrishaday.

⁷Ma kwa yita ta Zhəwda ne, Nashon, wəzege ta Aminadab.

⁸Ma kwa yita ta Isakar ne, Netanɛyɛl, wəzege ta Səwar.

⁹Ma kwa yita ta Zabəlon ne, Ɛliyab, wəzege ta Hɛlon.

¹⁰Ma kwa yita ta Ɛfrayim, wəzege ta Zhozɛf ne, Ɛlishama, wəzege ta Amihəwd. Ma kwa yita ta Manasɛ, wəzege ta Zhozɛf ne, Gamliyɛl, wəzege ta pedasəwr.

¹¹Ma kwa yita ta Bɛnjamɛn ne, Abidan, wəzege ta Gidoni.

¹²Ma kwa yita ta Dan ne, Ahiyɛzɛr, wəzege ta Amishaday.

¹³Ma kwa yita ta Asɛr ne, Pagiyɛl, wəzege ta Okran.

¹⁴Ma kwa yita ta Gad ne, Ɛliyasaf, wəzege ta Dɛwəyɛl.

¹⁵Ma kwa yita ta Nɛftali ne, Ahira, wəzege ta Ɛnan.»

¹⁶Ma mbeli nyi te ghəa yita nyi tsehave nyi mbeli ne, ghenci ya kambeli nyi te ghəa ka sewajɛa ka Israyɛl perə.

¹⁷Pa yɛ Moyize le Aron veyite mbeli nyi tsehave nyi mbeli meŋe bakeghəmbe yitea ghəa nci.

¹⁸Rəkwə hɛ tsenete mbeli pɛtɛ te kwa ghate ta hɛ mbe tere kwa bake. Pɛtɛa ka Israyɛl nyi nza va ta nci se te bakemsə kajive mbe kema rafete sləa nci kwetɛ kwetɛ, keyita keyita ba'a keghɛ keghɛ.

¹⁹Kala nya gezave nda Mahwətə ke Moyize ne, kwamte te ɓerama ta Sinay rafete sləa nci ŋkɛ.

²⁰Ma kaŋa ŋwalea Rəbɛn, tezhɛa wəzege ta Israyɛl nyi rafete geva sləa zhili nyi nza va ta nci se te bakemsə kajive mbe kema, nyi wərə dzemte mpa, kwetɛ kwetɛ, kepelə kepelə ba'a keghɛ keghɛ ne,

²¹mbeli 46.500 yarafete geva sləa nci kwa yita ta Rəbɛn.

²²Ma kaŋa ŋwalea Simɛyon nyi rafete geva sləa nci kwetɛ kwetɛ, kepelə kepelə ba'a keghɛ keghɛ, pɛtɛa zhili nyi nza va ta nci se te bakemsə kajive mbe kema, nyi wərə dzemte mpa ne,

²³mbeli 59.300 yarafete geva sləa nci kwa yita ta Simɛyon.

²⁴Ma kaŋa ŋwalea Gad nyi rafete geva sləa nci kwetɛ kwetɛ, kepelə kepelə ba'a keghɛ keghɛ, pɛtɛa zhili nyi nza va ta nci se te bakemsə kajive mbe kema, nyi wərə dzemte mpa ne,

²⁵mbeli 45.650 yarafete geva sləa nci kwa yita ta Gad.

²⁶Ma kaŋa ŋwalea Zhəwda nyi rafete geva sləa nci kwetɛ kwetɛ, kepelə kepelə ba'a keghɛ keghɛ, pɛtɛa zhili nyi nza va ta nci se te bakemsə kajive mbe kema, nyi wərə dzemte mpa ne,

²⁷mbeli 74.600 yarafete geva sləa nci kwa yita ta Zhəwda.

²⁸Ma kaŋa ŋwalea Isakar nyi rafete geva sləa nci kwetɛ kwetɛ, kepelə kepelə ba'a keghɛ keghɛ, pɛtɛa zhili nyi nza va ta nci se te bakemsə kajive mbe kema, nyi wərə dzemte mpa ne,

²⁹mbeli 54.400 yarafete geva sləa nci kwa yita ta Isakar.

³⁰Ma kaŋa ŋwalea Zabəlon nyi rafete geva sləa nci kwetɛ kwetɛ, kepelə kepelə ba'a keghɛ keghɛ, pɛtɛa zhili nyi nza va ta nci se te bakemsə kajive mbe kema, nyi wərə dzemte mpa ne,

³¹mbeli 57.400 yarafete geva sləa nci kwa yita ta Zabəlon.

³²Ma kaŋa ŋwalea Zhozɛf nyi rafete geva sləa nci kwetɛ kwetɛ, kepelə kepelə ba'a keghɛ keghɛ, pɛtɛa zhili nyi nza va ta nci se te bakemsə kajive mbe kema, nyi wərə dzemte mpa ne,

³³mbeli 40.500 yarafete geva sləa nci kwa yita ta Zhozɛf.

³⁴Ma kaŋa ŋwalea Manasɛ nyi rafete geva sləa nci kwetɛ kwetɛ, kepelə kepelə ba'a keghɛ keghɛ, pɛtɛa zhili nyi nza va ta nci se te bakemsə kajive mbe kema, nyi wərə dzemte mpa ne,

³⁵mbeli 32.200 yarafete geva sləa nci kwa yita ta Manasɛ.

³⁶Ma kaŋa ŋwalea Bɛnjamɛn nyi rafete geva sləa nci kwetɛ kwetɛ, kepelə kepelə ba'a keghɛ keghɛ, pɛtɛa zhili nyi nza va ta nci se te bakemsə kajive mbe kema, nyi wərə dzemte mpa ne,

³⁷mbeli 35.400 yarafete geva sləa nci kwa yita ta Bɛnjamɛn.

³⁸Ma kaŋa ŋwalea Dan nyi rafete geva sləa nci kwetɛ kwetɛ, kepelə kepelə ba'a keghɛ keghɛ, pɛtɛa zhili nyi nza va ta nci se te bakemsə kajive mbe kema, nyi wərə dzemte mpa ne,

³⁹mbeli 62.700 yarafete geva sləa nci kwa yita ta Dan.

⁴⁰Ma kaŋa ŋwalea Asɛr nyi rafete geva sləa nci kwetɛ kwetɛ, kepelə kepelə ba'a keghɛ keghɛ, pɛtɛa zhili nyi nza va ta nci se te bakemsə kajive mbe kema, nyi wərə dzemte mpa ne,

⁴¹mbeli 41.500 yarafete geva sləa nci kwa yita ta Asɛr.

⁴²Ma kaŋa ŋwalea Nɛftali nyi rafete geva sləa nci kwetɛ kwetɛ, kepelə kepelə ba'a keghɛ keghɛ, pɛtɛa zhili nyi nza va ta nci se te bakemsə kajive mbe kema, nyi wərə dzemte mpa ne,

⁴³mbeli 53.400 yarafete geva sləa nci kwa yita ta Nɛftali.

⁴⁴Wa nya tsetse nza ta mbeli nyi rafete sləa nci yɛ Moyize le Aron ba'a mbeli nyi te ghəa yitehɛ nyi meŋe bakeghəmbe te ŋkwa hwelefefia Israyɛl.

⁴⁵Ma pɛtɛa ka Israyɛl nyi rafete geva sləa nci keghɛ keghɛ, zhili nyi nza va ta nci se te bakemsə kajive mbe kema, nyi wərə dzemte mpa ne,

⁴⁶mbeli 603.550.

⁴⁷Ma mbeli nyi kwa yita ta Lɛvi ne, kerafete hɛ mbeli te və nya rafete kweci ka Israyɛl mbeli we.

⁴⁸Kwa nza ŋkɛ ne, ma ke Mahwətə gezete nda ke Moyize:

⁴⁹«Rafema mbeli nyi kwa yita ta Lɛvi na te və nya kwetɛŋe le kweci ka Israyɛl ma.

⁵⁰Katedape nda cɛ lekwesa nya keveyi geva tekeleke nya nza səndəkwəa jikə geva mbe na ke hɛ. Katenza wəshi kemene slene ba'a kweci wəshi nyi mbe te dzeve ta nci perə. Katekele cɛ lekwesa shɛ ba'a pɛtɛa wəshi nyi mbe hɛ. Katemene slene hɛ mbe ba'a katenza hɛ dzeyi yite.

⁵¹Ma vəa ŋkwa nya teslə yɛ ne, katepele cɛ lekwesa nya keveyi geva tekeleke ka Lɛvi. Ma vəa ŋkwa nya tezhɛne yɛ kamene ghedəkwə ne, katemɓe ŋkɛ hɛ. Ma kehendave nda geva wəndə ŋkwərə ke cɛ lekwesa shɛ ne, katepesle ŋkɛ mbeli.

⁵²Katenza yayata nde Israyɛl mbe ghedəkwəa ŋkɛ, yayata wəndə terasle yitea drapea wəvəsəa ka sewajɛa ŋkɛ.

⁵³Ma kaŋa ka Lɛvi ne, katenza hɛ dzeyi yitea cɛ lekwesa nya keveyi geva tekeleke nya nza səndəkwə jikə geva mbe. Ghenci ka temene slene mbe. Ma tsagha ne, katemtseke hwepe wənəa ɗa ka Israyɛl we.»

⁵⁴Pa ka Israyɛl menete tserame kala nya gezave nda Mahwətə ke Moyize.