Read KapsikiDC Ɓela 10 Bible Online

Ɓela 10 - KapsikiDC bible

Ɓela 10

¹Ma ke Mahwətə sha Moyize:

²«Gezlate veke bake yitea mze kwa tɛawetɛa. Katevɛ hɛ mbeli kezha tsene mbeli ba'a kezha ncɛ slə ta mbeli mbe ghedəkwə.

³Ma vəa ŋkwa nya tevɛ veke nyi bake nyi mbeli kanya kwetɛŋe ne, katetsene pɛtɛa mbeli yitea gha, mɛa cɛ lekwesa kebegeme geva.

⁴Ma nda veke kwetɛŋe nde vɛte geva ne, katetsene geva mbelia jama, mbeli nyi te ghəa hwelefefia Israyɛl yitea gha.

⁵Ma keghate veke kavɛte geva jikə le kaka ne, kateslə mbeli nyi kenzanji laka ŋkwa kesame ta veci yitea cɛ lekwesa.

⁶Ma kevɛte geva veke jikə le kaka kakwa bake zhigə ne, kateslə mbeli nyi kenzanji laka bela kwa zeme. Katevɛ veke ba'a katetsa kaka mbeli yitea yayata slə ta nci.

⁷Ama kezha tsene mbeli ne, katevɛ geva veke kaɗema kaka yite.

⁸Deke ka dzeghe Shala nyi kaka shihɛnyɛa Aron ka tevɛ veke. Kawəsə mahalegə nya kaghala ghala tenza ŋkɛ sha gheyɛ keshi keshi.

⁹Ma te hɛɗia ŋayɛ vəa ŋkwa nya lə yɛ kampa le ka ghema ta ŋayɛ nyi keha ŋayɛ mpa ne, katetsa kaka yɛ jikə le vɛ ta yɛ veke, yitea zəzəte ŋayɛ 'ya. Ma 'ya Shala Mahwətə ta ŋayɛ gɛ ne, katembele ŋayɛ 'ya va ka ghema ta ŋayɛ.

¹⁰Ma te vecia zlama, yɛ gəsəkə ba'a dzemɛa ghweme ta tere ne, katevɛ vekea shɛhɛ yɛ vəa ŋkwa nya dzeghe melɛ kwa tere tere ba'a melɛ kejikə ghə yɛ. Ma tsagha ne, katezəzə ŋayɛ 'ya, 'ya Shala Mahwətə ta ŋayɛ.»

¹¹Ma te hɛ bakemsə mbe ta tere kwa bake, mbe va kwa bake kwa sebe ta shave mbe Ɛzhipte ne, pa meləkwə ləkwə dzeme kənəa cɛ lekwesa nya nza səndəkwəa jikə geva mbe.

¹²Cape Israyɛl slə te ɓerama ta Sinay kewəvəsə kewəvəsə. Pa meləkwə ləkwə ghereŋenyɛ te ɓerama ta Paran.

¹³Kwa ghate ta zhigəa ka Israyɛl nyagha kaslə kala ghena nya gezave nda Mahwətə ke Moyize.

¹⁴Cape ka sewajɛ nyi ketsenete geva yitea drapea Zhəwda slə kewəvəsə kewəvəsə kakwa ghate. Ma ka sewajɛ nyi kwa yita ta Zhəwda ne, Nashon, wəzege ta Aminadab ya te ghəa nci.

¹⁵Ma ka sewajɛ nyi kwa yita ta Isakar ne, Netanɛyɛl, wəzege ta Səwar ya te ghəa nci.

¹⁶Ma ka sewajɛ nyi kwa yita ta Zabəlon ne, Ɛliyab, wəzege ta Hɛlon ya te ghəa nci.

¹⁷Pa cɛ nya keveyi geva tekeleke pelemte geva. Cape ŋwalea Gɛrshon ba'a ŋa Merari le.

¹⁸Cape ka sewajɛ nyi ketsenete geva yitea drapea Rəbɛn slə kewəvəsə kewəvəsə kwa sebe ta nci. Ma ka sewajɛ nyi kwa yita ta Rəbɛn ne, Ɛlisəwr, wəzege ta Shedɛwər ya te ghəa nci.

¹⁹Ma ka sewajɛ nyi kwa yita ta Simɛyon ne, Sheləwmiyɛl, wəzege ta Səwrishaday ya te ghəa nci.

²⁰Ma ka sewajɛ nyi kwa yita ta Gad ne, Ɛliyasaf, wəzege ta Dɛwəyɛl ya te ghəa nci.

²¹Kwa sebe ta ŋkɛ, cape ŋwalea Kɛhat le wəshi nyi keveyi geva tekeleke. Pa kweci ka Lɛvi mɓete cɛ lekwesa nya keveyi geva tekeleke nda tese ŋwalea Kɛhat.

²²Cape ka sewajɛ nyi ketsenete geva yitea drapea Ɛfrayim slə kewəvəsə kewəvəsə le ŋa nci. Ma ka sewajɛ nyi kwa yita ta Ɛfrayim ne, Ɛlishama, wəzege ta Amihəwd ya te ghəa nci.

²³Ma ka sewajɛ nyi kwa yita ta Manasɛ ne, Gamliyɛl, wəzege ta Pedasəwr ya te ghəa nci.

²⁴Ma ka sewajɛ nyi kwa yita ta Bɛnjamɛn ne, Abidan, wəzege ta Gidoni ya te ghəa nci.

²⁵Kakwa keɗaŋe ne, cape ka sewajɛ nyi ketsenete geva yitea drapea Dan slə kewəvəsə kewəvəsə. Ghenci ya kaka dale nyi keslə mbe ghedəkwə. Ma ka sewajɛ nyi kwa yita ta Dan ne, Ahiyɛzɛr, wəzege ta Amishaday ya te ghəa nci.

²⁶Ma ka sewajɛ nyi kwa yita ta Asɛr ne, Pagiyɛl, wəzege ta Okran ya te ghəa nci.

²⁷Ma ka sewajɛ nyi kwa yita ta Nɛftali ne, Ahira, wəzege ta Ɛnan ya te ghəa nci.

²⁸Kewəvəsə kewəvəsə kala nya slənji ka Israyɛl.

²⁹Ma ke Moyize sha Hobab, madza ŋkɛ nya kawəzege ta Rɛwəyɛl nya kande Madiyan: «Ghen'yɛ kateslə kalə kadzete hɛɗi nya meɗeyi Mahwətə kave n'yɛ. Nde yitea ghen'yɛ, kateve ŋa ghen'yɛ mbe zeɗe nza nya meɗeyi nda Mahwətə ke ka Israyɛl.»

³⁰Ma ke Hobab zhɛnete nda: «Ewə, kalə kadzete hɛɗia ɗa ba'a kadzehwa hwelefe ɗa ɗe 'ya kazhɛre geva.»

³¹Ma ke Moyize zhɛkwa: «Təhwə təhwə ŋa 'ya, sərəma n'yɛ na ma. Nahe na keɗepe ŋkwa nyi nza n'yɛ kamenete ghedəkwəa n'yɛ te hɛ te ɓerama. Gha nde tenza kande ncɛ n'yɛ hweŋkwa.

³²Ma kebeghakɛ n'yɛ na ne, kateve ŋa ghen'yɛ mbe zeɗe nza nya teve n'yɛ Mahwətə.»

³³Cape ka Israyɛl slənji yitea ghweme ta Mahwətə kezha dzeghwa kahɛ mahekene. Te kema ta nci slə səndəkwəa jikə geva ta Mahwətə mbe dzeghwa nya kahɛ mahekene nya yitea ncɛ nda ŋkwa nya nza hɛ wərə kanza te ke hɛ.

³⁴Ma heveci ne, kənəa hɛ nza meləkwə ləkwə ta Mahwətə, vəa ŋkwa nya slə hɛ mbe ghedəkwə.

³⁵Ma vəa ŋkwa nya slə səndəkwəa jikə geva ne, ma ke Moyize gezete: «Sate te ŋkwa gɛ Mahwətə! Ma tsagha ne, katetaze geva ka ghema ta ŋa ba'a katehwɛ ka ɗema ntsə ta ŋa te kema ta ŋa!»

³⁶Ma vəa ŋkwa nya ghereŋe səndəkwə ne, ma ke Moyize sha geze: «Mahwətə, zhɛne geva kase kanza hwa ka Israyɛl nyi tipə tipə nyi!»