Read KapsikiDC Ɓela 11 Bible Online

Ɓela 11 - KapsikiDC bible

Ɓela 11

¹Ma te kwete hɛ ne, ntake ka Israyɛl kaŋgaɗe ghə kwa kema ta Mahwətə. Ma kwa fate ŋgaɗe ghə ta nci Mahwətə, pa ŋkɛ hwepete wənə. Pa ŋkɛ ghweneke nda ghwə ke hɛ kezha tere ŋkwa nya dzeyi mɛa ghedəkwə.

²Ntake mbeli katsa nda lewela ke Moyize nya kesəkwəte Mahwətə. Tagha gɛ, mtiwə ghwə mtenyɛ.

³Pa mbeli hekate nda slə ke ŋkwa shɛ kaTabɛra, geze ta ŋkɛ, “ghwə yitea ŋkwa”, kwa nza ŋkɛ ne, tagha ndəmte ghedəkwəa ka Israyɛl Mahwətə.

⁴Ma te kwete hɛ ne, pa zhiɗiwəshi zhɛte nda ke ka se se nyi hwa ka Israyɛl. Ntake ka Israyɛl le ghəa nci perə kazhɛne kaŋgaɗe ghə, ma ke hɛ: «Wa nde teve ɓəmə sli kezeme wa?

⁵Zəzə ke gheɓəmə sha wəshi kezeme nyi se gheɓəmə kazeme gəmə kwa Ɛzhipte, yɛ kelepe, yɛ hɛremɛɗɛ, yɛ gwənzə, yɛ hanza, yɛ heyitəmə ba'a yɛ teme sliɗikwə gi!

⁶Ama teke ne, wəshi nyi kala nyighɛ shɛ we. Deke mane yanewe gheɓəmə.»

⁷Ma manea shɛ ne, yipə yipə ŋkɛ le ya ta kwete wəfe ta koriyandre. Kala pa ta ŋ'wa ta wəfe nza ta tɛawetɛa ta ŋkɛ.

⁸Katetaze geva mbeli kezha fə manea shɛhɛ. Kwa sebe ta ŋkɛ ne, kahə hɛ mbeli te vena keɗema kanzəkwə hɛ mbeli kwa nzərə. Kata hɛ mbeli kwa dəghwə ba'a kamene ɗafa kwalekwala mbeli le hɛ. Yipə yipə le gatewe nyi takɛ mbeli le n'yi zeɗea nci.

⁹Ma vəa ŋkwa nya sawa mɛnɛ kadzeghəa ghedəkwə heviɗi ne, kasawa mane kadzeghə perə.

¹⁰Pa Moyize fate ŋgaɗe ghə ta ka Israyɛl nyi ketsenete geva kehwelefe kehwelefe dzeyi mɛa cɛ lekwesa ta nci. Pa Mahwətə hwepete wənə kwele kwele ba'a pa wəsəa shɛ tazemte nda mehele ke Moyize.

¹¹Ma ke Moyize 'yɛwete va Mahwətə: «Wa raberə mene nda wəsə kwa ndiremi na ke nde mene slene ta ŋa wa? Wa raberə ɗema na nza ganyɛke laka 'ya ba'a veyi ɗa mbeli nyi na ɗaŋe ɗaŋe kwa ghə wa?

¹²'Ya nde pate mbeli nyi na? 'Ya nde yake hɛ nda geze ɗa na kafə hɛ kala nya kele velɛnjɛ male nya kedəkwə ŋkɛ, hwa'a te hɛɗi nya meɗeyi nda na ke ka shihɛ nci na?

¹³Tema nza 'ya kakemave sli kezha ve nda ke pɛtɛa mbeli nyi kenehwene nyi wa? Ma ke hɛ sha geze ɗa: Ndeke n'yɛ sli kezha zeme n'yɛ!

¹⁴Kapesle 'ya yitea fə mbeli nyi kwetɛŋe ɗa we. Wəsə nya ɗaŋeɗa hɛ kashasha kaŋa ŋa.

¹⁵Ma kenza nde tsetse mene ɗa na ne, megela ma peslekɛ ɗa na! Ma tsagha ne, nahe na kencɛte ɗa ganyɛa mehele ta ŋa ba'a katezhɛne 'ya kanewe ndiremi nya te 'ya we.»

¹⁶Ma ke Mahwətə zhɛnete nda ke Moyize: «Tsenete zhili nyi nza zləvə te hɛ mberefaŋemsə, nyi ɗepe na kambelia jama ba'a kambeli nyi te ghəa mbeli. Katebeghe hɛ na kase kadzemɛa cɛ lekwesa kebegeme geva. Kateghereŋe na tagha le hɛ.

¹⁷Katesawa 'ya kezha geze ŋa ghena te ŋkwa shɛ. Katekele kwete bela ta sefəa ŋa 'ya kezha ve mbe hɛ. Tagha gɛ, katenza ɗaŋeɗa ta mbeli kwa ghəa ŋayɛ le hɛ, katezhɛne ɗaŋeɗa ta nci kanza kwa ghəa ŋa kwetɛŋe ŋa we.

¹⁸Ma pa na sha tegeze nda ke mbeli: ‹Pɛmte mə ghəa ŋayɛ kezha hendɛ. Katekemave sli kezeme yɛ, kwa nza ŋkɛ ma pe yɛ ŋgaɗete nda ghə ke Mahwətə: Wa nde teve ɓəmə sli kezeme wa? Megela se nza ta ɓəmə kwa Ɛzhipte. Vatse gɛ ne, kateve ŋayɛ sli Mahwətə kezha zeme yɛ.

¹⁹Deke kahɛ kwetɛŋe, hɛ bake, ya hɛ mcɛfe, hɛ meŋe keɗema hɛ bakemsə tezeme yɛ we,

²⁰ama katezeme yɛ katere zake. Katewənə yɛ ve ba'a kateseyi ŋkɛ mbe ŋshi va gheyɛ. Ma pɛtɛa wəshi nyi ne, va nya neghamte Mahwətə yɛ te tepe ta ŋayɛ ba'a va nya ŋgaɗete nda ghə yɛ va shave ta ŋayɛ mbe Ɛzhipte.›»

²¹Ma ke Moyize zhɛkwa: «Ma mbeli nyi dzasle nyi yitea 'ya ne, zhili slibə gwəmsə ŋkwaŋe hɛ. Ama gha ne, ma pa na gezete: ‹'Ya kateve nda sli ke hɛ kezha zeme hɛ katere zake!›

²²Ya mbeli henemte nda pɛtɛa timɛti, kwi ba'a yɛ sla ke hɛ ne, katenza hɛ wərə na? Ya mbeli kesakame pɛtɛa kelepe nyi kwa ndərə ne, katenza hɛ wərə nda ke hɛ na?»

²³Ma ke Mahwətə zhɛnete nda ke Moyize: «Berete ta Mahwətə nza dewə na? Katenewe na tsetsenya kenza ŋkɛ kateyipə geva ghena ta ɗa keɗema kateɗema ŋkɛ kayipə geva.»

²⁴Pa Moyize shave mbe cɛ lekwesa ba'a ɓelate nda ghena ta Mahwətə ke mbeli. Kwa sebe ta ŋkɛ, pa ŋkɛ tsenete mbelia jama ta ka Israyɛl nyi mberefaŋemsə ba'a veveyi hɛ dzeyi yitea cɛ lekwesa.

²⁵Pa Mahwətə sawa hwa geɗeɗe ta meləkwə ləkwə ba'a gezete nda ghena. Pa ŋkɛ ŋave sefə nya mbe Moyize ɓɛhwɛ kezha ve mbe mbelia jama nyi mberefaŋemsə. Dzembema ta sefə mbe hɛ ne, ntake hɛ kageze ghena kala ka mɛ ŋkwa. Ama kegezete hɛ kajive kajive we.

²⁶Pa zhili bake nyi nza sləa nci hwa mbelia jama nyi mberefaŋemsə nzanji mbe ghedəkwə: yɛ Ɛldad le Mɛdad. Kese hɛ kedzembe cɛ lekwesa we. Pa sefəa Shala se ba'a dzembenyɛ mbe hɛ perə, ntake hɛ kageze ghena kala ka mɛ ŋkwa mbe ghedəkwə.

²⁷Tereŋe kwete mempɛhweta le hwɛ kalə sha Moyize, ma ke shɛ: «Wa nya yɛ Ɛldad le Mɛdad kageze ghena kala ka mɛ ŋkwa mbe ghedəkwə!»

²⁸Ma ke Zhozəwɛ, wəzege ta Nəwn, nya kande mene slene ta Moyize se kawəzege zlapete: «Moyize, nde sleke ɗa yawe, fɛake hɛ!»

²⁹Ma ke Moyize zhɛnete: «Kazhɛ ŋa zlɛ va 'ya ka? Take nda kazhɛrenji mbelia Mahwətə kaka mɛ ŋkwa nyi veyi sefəa ŋkɛ Mahwətə mbe hɛ wa?»

³⁰Tagha gɛ, tewətelɛwe yɛ Moyize le mbelia jama nyi mberefaŋemsə zhɛneghe geva kadzembe ghedəkwə.

³¹Pa sefə nya ghweneke Mahwətə vɛte geva. Same kwa ndərə ne, pa sefəa shɛ fəke yɛ fafele ba'a beteyi hɛ mbe ghedəkwə ba'a dzeyi yite, te ŋkwa gare dzeghwa kavəghwə laka yayata bela. Gare mɛtre kwetɛŋe kadzeme yitea ghweme nza təɗəməa fafelea shɛhɛ te hɛɗi.

³²Veci veci mbeli te vecia shɛ, hwencɛke ncɛke pa te hendɛ ta ŋkwa kafə yɛ fafele. Ma wəndə nya kefəve ɓɛhwɛ ne, za ma ke behwe meŋe ŋa ŋkɛ. Pa hɛ beteyi hɛ dzeyi yitea ghedəkwə kezha ghwele.

³³Ama hamema ta ka Israyɛl ke slene mbe slia shɛ, kaɗema hɛ kenaka kampeɗekɛ ne, mɓɛke Mahwətə hwepete wənə va hɛ ba'a pa ŋkɛ vate ndiremi nya wəba te hɛ.

³⁴Pa mbeli hekate nda slə ke ŋkwa shɛ kaKibrot-Tava, geze ta ŋkɛ, “yɛ kwele ta zhiɗiwəshi”, kwa nza ŋkɛ ne, tagha lamte mbeli nyi zhɛte nda zhiɗiwəshi ke hɛ mbeli.

³⁵Kwa sebe ta ŋkɛ ne, ntəŋə ka Israyɛl slə mbe Kibrot-Tava kezha dzembe Hasɛrot nya nzanji hɛ mbe.