Read KapsikiDC Ɓela 12 Bible Online

Ɓela 12 - KapsikiDC bible

Ɓela 12

¹Pa Moyize wəmeve wəzha ta ka Kəwsh. Ntake yɛ Miriyam le Aron kaŋele Moyize va nya wəmeve malea shɛ ŋkɛ.

²Ma ke hɛ: «Deke ke Moyize gezete nda ghena Mahwətə na? Ashɛ ŋkɛ kegezete ɓə ghena perə wəka?» Pa Mahwətə fate ghena ta nci.

³Ndagwara ma Moyize ne, gwedə ma ŋkɛ ke kweci mbeli nyi te hɛɗi lema.

⁴Taghanyɛ ne, ma ke Mahwətə sha Moyize, Aron ba'a Miriyam: «Kwiɗi mə mahekene ŋayɛ kadzembe cɛ lekwesa kebegeme geva.» Cape hɛ kadzembe mahekene nci.

⁵Pa Mahwətə sawa hwa geɗeɗe ta meləkwə ləkwə ba'a ghereŋenyɛ mɛa cɛ lekwesa. Pa ŋkɛ hekakɛ yɛ Aron le Miriyam nyi kehendeke geva bake nci.

⁶Ma ke sha hɛ: «Fa mə ghena nya geze 'ya megela: Ma kenza ŋkɛ nde mɛ ŋkwa ya hwa gheyɛ ne, 'ya Mahwətə katencɛ nda ghəa ɗa ba'a kategeze nda ghena laka kelɛŋə.

⁷Ama kenza ŋkɛ kala nya le Moyize, nde mene slene ta ɗa we. Gheŋkɛ ya kawəndə nya vate ghə pɛtɛa mbelia ɗa te.

⁸Kata kata geze nda ghena 'ya, kenza tewəfərə we. Kancɛ nda ghəa ɗa 'ya, 'ya Mahwətə, kanewe newe ŋkɛ nda nca 'ya kwa kema ta ŋkɛ. Tagha gɛ ne, va wa ɗema yɛ kese kaghazlənə va geze ghena te nde mene slene ta ɗa Moyize wa?»

⁹Pa Mahwətə hwepete wənə kwele kwele va hɛ ba'a dzeghwanyɛ.

¹⁰Ma kwa dzeme meləkwə ləkwə kənəa cɛ lekwesa ne, bətə geva ta Miriyam nzanyɛ mbe derena. Nahe nde kezhɛrenyɛ tɛawe tɛawe kala kwacakelɛ. Newe ke Aron ne, bətə nde mbe derena.

¹¹Tagha gɛ, ma ke Aron sha Moyize: «Təhwə təhwə ŋa 'ya nde sleke ɗa yawe, vema jaɗafa nyi menete nyi n'yɛ na kwa ghəa n'yɛ, ghen'yɛ nyi kaka dewə mehele ba'a kaka jaɗafa ma!

¹²Təhwə təhwə ŋa 'ya, mba Miriyam kenza kala wəzege nya kemtenyɛ kwa hwə, nya nza bela ta geva ta ŋkɛ kezeme zeme vəa ŋkwa nya sawa ŋkɛ kwa hwəa meghekɛ!»

¹³Tagha gɛ, ma ke Moyize səkwəte Mahwətə: «Shala yawe, təhwə təhwə mbelete ŋkɛ!»

¹⁴Ma ke Mahwətə zhɛnete nda: «Ma nda nahe yitenyɛ kentifəyi nda ndɛghwɛɗɛ kwa kema kezha bezla ŋkɛ ne, kateɗema hawe kanza te kashikwə zake na? Tsetsenya gɛ ne, ŋkamte geva nde shave mbe ghedəkwə kashikwə zake. Kwa sebe ta ŋkɛ ne, katezhɛne geva nde kase kadzembe.»

¹⁵Pa mbeli ŋkamte Miriyam shave mbe ghedəkwə kashikwə zake. Kese ka Israyɛl kaslə nda tenza hweŋkwa ve kazhɛne geva kase we.

¹⁶Ma kwa sebe ta ŋkɛ ne, ntəŋə hɛ slə mbe Hasɛrot kezha lə kanza te ɓerama ta Paran.