Read KapsikiDC Ɓela 13 Bible Online

Ɓela 13 - KapsikiDC bible

Ɓela 13

¹Ma ke Mahwətə sha Moyize:

²«Ghweneghe mbeli kalə kanewe hɛɗia Kanan nya ve nda 'ya ke ka Israyɛl. Shave hwa yayata yita ghwene ŋkwa mbeli. Shave hwa mbeli nyi te ghəa ka Israyɛl tenta geva hɛ.»

³Pa Moyize yɛte fete yitea ghena nya gezete Mahwətə. Pa ŋkɛ ghwenakɛ mbeli nyi te ghəa pɛtɛa ka Israyɛl se te ɓerama ta Paran.

⁴Wa nyi sləa nci nyi: Shaməwa, wəzege ta Zakəwr, kwa yita ta Rəbɛn.

⁵Shafat, wəzege ta Hori, kwa yita ta Simɛyon.

⁶Kalɛb, wəzege ta Yefəwnɛ, kwa yita ta Zhəwda.

⁷Igal, wəzege ta Zhozɛf, kwa yita ta Isakar.

⁸Ozɛ, wəzege ta Nəwn, kwa yita ta Ɛfrayim.

⁹Palti, wəzege ta Rafəw, kwa yita ta Bɛnjamɛn.

¹⁰Gadiyɛl, wəzege ta Sodi, kwa yita ta Zabəlon.

¹¹Gadi, wəzege ta Səwsi, kwa yita ta Manasɛ, wəzege ta Zhozɛf.

¹²Amiyɛl, wəzege ta Gemali, kwa yita ta Dan.

¹³Setəwr, wəzege ta Mikayɛl, kwa yita ta Asɛr.

¹⁴Nabi, wəzege ta Vofsi, kwa yita ta Nɛftali.

¹⁵Gəwyɛl, wəzege ta Maki, kwa yita ta Gad.

¹⁶Nyi ya kasləa mbeli nyi ghwenakɛ Moyize kalə kanewe hɛɗia Kanan. Pa Moyize ndeke nda slə ke Ozɛ, wəzege ta Nəwn kaZhozəwɛ.

¹⁷Ma vəa ŋkwa nya ghwene mbeli nyi Moyize ne, ma ke sha hɛ: «Dzembe mə Kanan same laka Nɛgɛv. Kwa sebe ta ŋkɛ ne, katedzeme ghweme yɛ.

¹⁸Pelɛagha gɛ, katenewe yɛ tsema tsema nza ta hɛɗia shɛ, kenza nde kaka berete berete keɗema kaka dewə ŋeli mbeli nyi te, kenza nde ɓɛhwɛ keɗema kwele kwele hɛ.

¹⁹Katenewe yɛ megela kenza ŋkɛ nahe hɛɗi nya nza mbelia shɛhɛ te kenza megela keɗema ndiremike ba'a kenza ŋkɛ nahe meleme nyi nza hɛ mbe hɛ kenza kaghedəkwə nyi gəmə gəmə keɗema kameleme nyi nza zli yitea hɛ.

²⁰Katenewe yɛ kenza nde kahɛɗi nya mene wəshi te keɗema kahɛɗi nya kemte mte nde, kenza nde wəfe ya te keɗema kaɗema wəfe te. Hwepe mə. Ndake mə ya ta wəfe nyi te hɛɗia shɛ.» Kwa nza ŋkɛ ne, vəa ka ghate ta rɛzɛŋe ŋkɛ.

²¹Pa mbelia shɛhɛ slə te ɓerama ta Tsin kezha dzeme kanewe hɛɗia Kanan hwa'a mbe Rehob, takwa yitea Lebo-Hamat.

²²Pa hɛ dzembenji same laka Nɛgɛv ba'a ntsehenji mbe Hɛbron nya nza Ahiman, Shɛshay ba'a Talmay nyi kahwelefefia Anak nya kawəndə nya biya mbe. Va mberefaŋe meleme ta ka Hɛbron keŋzle ŋsle nda teŋslete geva meleme ta Sowan mbe Ɛzhipte.

²³Kwa sebe ta ŋkɛ, pa hɛ dzawa hwa'a kwa zlərəa Ɛshekol nya tsasleve dzeve ta wəfe ta rɛzɛŋe nya ghwedzekwe hɛ kwagha. Pa hɛ ndendave yɛ ya ta kwakweme ba'a yɛ ya ta dasekwa perə. Pa hɛ menate hɛ te geta nya nza mbeli bake yite kezha kele.

²⁴Pa mbeli hekate nda slə ke ŋkwa shɛ kazlərəa Ɛshekol, geze ta ŋkɛ, “zlərəa ghwedzekwe”, va nya tsasleve ghwedzekwe ta rɛzɛŋe ka Israyɛl kwagha.

²⁵Ma kwa sebe ta hɛ wəfaɗemsə ne, pa mbeli nyi kelə nyi kanewe hɛɗi zhɛneke geva.

²⁶Pa hɛ zhɛneke geva kase sha Moyize, Aron ba'a pɛtɛa ka Israyɛl mbe Kadɛs nya te ɓerama ta Paran. Pa hɛ ɓelate nda wəshi nyi nakɛ hɛ ke hɛ ba'a ke pɛtɛa ka Israyɛl, pa hɛ ncɛte nda ya ta wəfe nyi kese te hɛɗia shɛ ke hɛ.

²⁷Wa nya ghena nya ɓelate nda hɛ ke Moyize nya: «Nahe ghen'yɛ kese te hɛɗi nya ghweneghe n'yɛ na kadzete. Kaganda nza ŋkɛ kahɛɗi nya hwɛ ŋ'wa ba'a yɛməa mze te. Wa nyi ya ta wəfe nyi kese nyi te.

²⁸Ama mbeli nyi te ne, keberete beretenji hɛ, kejama jamanji yɛ meleme ba'a yɛ zli ya yitea hɛ. Te hɛɗia shɛ ne, pa le hwelefefia Anak, wəndə nya biya nakɛ ghen'yɛ.

²⁹Ka Amalɛk ya te hɛɗia Nɛgɛv. Ka Hɛt, ka Zhɛbəs ba'a ka Amor ya dzeme hwa ghweme. Ka Kanan ya terasle yitea ndərəa Mɛditɛranɛ ba'a dzeyi mɛa Zhəwrdɛŋe.»

³⁰Pa Kalɛb gweɗakwete mbeli nyi keɗema ghena ta Moyize. Kwa sebe ta ŋkɛ, ma ke zlapete: «Mbi ɓəmə! Dzeme ɓəmə shɛ mə kelehwe hɛɗia shɛ. Katehərə ŋkɛ gheɓəmə!»

³¹Ama ma ke kweci mbeli nyi kese pelɛagha le sha Kalɛb: «Kahave nda mpa gheɓəmə ke mbelia shɛhɛ we, kwa nza ŋkɛ ne, berete ma hɛ ke gheɓəmə!»

³²Kwa kema ta ka Israyɛl ne, ntake hɛ kakele zləvə te hɛɗi nya se hɛ kanewe. Ma ke hɛ: «Ma hɛɗi nya se nya ghen'yɛ kanewe ne, hɛɗi kempə mbeli nyi te ŋkɛ. Ma pɛtɛa mbeli nyi nakɛ nyi ghen'yɛ te ne, mbeli nyi bebiya bebiya hɛ.

³³Pa le mbeli nyi bebiya bebiya, nyi kahwelefefia Anak nakɛ ghen'yɛ. Kala hegi se ghen'yɛ kanewe ghəa n'yɛ, ba'a ne, tsagha shɛ se hɛ kanewe n'yɛ.»