Read KapsikiDC Ɓela 15 Bible Online

Ɓela 15 - KapsikiDC bible

Ɓela 15

¹Ma ke Mahwətə sha Moyize:

²«Wa nya ghena nya tegeze nda na ke ka Israyɛl nya: Ma vəa ŋkwa nya tedzete hɛɗi nya teve ŋayɛ nya 'ya yɛ ba'a nya tenza yɛ te ne,

³katedzeghe ɗa melɛ kwa tere tere keɗema melɛ kejikə ghə yɛ, 'ya Mahwətə kezha yipə meɗe mɛ, keɗema wəsə nya zəzəte wəndə le ɗe ta ŋkɛ, keɗema hwa yɛ gəsəkə. Katekese sla, təmə keɗema kwe yɛ kezha dzeghe melɛa shɛ. Zeɗehwe ɗa tenza n'yia ŋkɛ nya kezəŋwə megela, 'ya Mahwətə.

⁴Ma wəndə nya kekese wəsə keseɗa shɛ kase kadzawa kema ta ɗa, 'ya Mahwətə ne, katekele wəsə gəməa hə nya kehwaɗe hwaɗe le n'yi kakiləwə mahekene ba'a n'yi kalitrə kwetɛŋe ba'a kwa bake ta ŋkɛ ŋkɛ kase yite.

⁵Katekele tɛ ŋkɛ kalitrə kwetɛŋe ba'a kwa bake ta ŋkɛ ŋkɛ kase yitea zhɛgwəa təmə kedzeghe melɛ kwa tere tere keɗema melɛ kejikə ghə.

⁶Ma kenza ŋkɛ kagame ne, katekele kiləwəa hə ŋkwaŋe nya kehwaɗe hwaɗe le litrəa n'yi bake ŋkɛ kase yite,

⁷tsagha tɛ kalitrə bake. Zeɗehwe ɗa tenza n'yia ŋkɛ kezəŋwə megela, 'ya Mahwətə.

⁸Ma kenza nde sla yadzeghe ɗa melɛ kwa tere tere keɗema melɛ kejikə ghə mbeli le, 'ya Mahwətə kezha yipə meɗe mɛ keɗema kezha melɛ nya gəmə ne,

⁹katekele kiləwəa hə mesli nya kehwaɗe hwaɗe le litrəa n'yi mahekene mbeli kase yite,

¹⁰tsagha tɛ kalitrə mahekene. Zeɗehwe ɗa tenza n'yia ŋkɛ nya kezəŋwə megela, 'ya Mahwətə.

¹¹Tsetse temene mbeli vəa ŋkwa nya dzeghe melɛ mbeli le sla, game, zhɛgwəa təmə keɗema zhɛgwəa kwe.

¹²Ya ŋkwini ŋkwini wəshi keseɗa nyi tedzeghe melɛ yɛ le hɛ ne, katefə wəshi nyi yɛ kase yitea yayata wəndəa nci.

¹³Pɛtɛa ka Israyɛl katemene wəshi nyi vəa ŋkwa nya dzeghe ɗa melɛ nyi zəŋwə n'yia nci megela hɛ, 'ya Mahwətə.

¹⁴Ma kenza nde se se nya ketemə ɓahwe hwa gheyɛ keɗema nya ketemə kaka shihɛ kwele kwele kadzeghe nda melɛ nya nza zəŋwə n'yia ŋkɛ megela ke Mahwətə ne, katemene ŋkɛ kala nya mene yɛ.

¹⁵Wəsə nya kwetɛŋe nde tenza kaŋa pɛtɛa mbeli, kaŋa nde Israyɛl keɗema kaŋa nde se se nya hwa gheyɛ. Kawəsə mahalegə nya kaghala ghala tenza ŋkɛ keshi keshi. Kanya kwetɛŋe tenza ŋkɛ kaŋa nde se se ba'a kaŋa nde Israyɛl kwa kema ta Mahwətə.

¹⁶Kanya kwetɛŋe tenza wəshi mahalegə ba'a wəshi nyi kegezete geva kaŋa ŋayɛ ba'a kaŋa ka se se nyi hwa gheyɛ.»

¹⁷Ma ke Mahwətə sha Moyize:

¹⁸«Wa nya ghena nya tegeze nda na ke ka Israyɛl nya: Ma vəa ŋkwa nya tentsehe yɛ te hɛɗi nya tefə ŋayɛ 'ya kadzete,

¹⁹nya tezeme ɗafa nyi te yɛ ne, katekele kwete bela yɛ kezha ve ɗa, 'ya Mahwətə.

²⁰Le hə nya kwatehwaɗe ne, kateta wəsə gəməa ɗafa kwalekwala yɛ. Kateve ŋkɛ yɛ kwa kema ta ɗa kala nya ve ɗa ha mbeli mɛa lane.

²¹Tsetse tedzeghe ɗa melɛ yɛ, 'ya Mahwətə le kwa ghate ta ɗafa kwalekwala nya takɛ yɛ. Kawəsə mahalegə nya kaghala ghala nza ŋkɛ.»

²²Ma kemenete fete yɛ le ɗema ta ŋayɛ laka kwete ghena nyi gezete nda nyi 'ya Mahwətə ke Moyize,

²³laka pɛtɛa wəshi nyi gezave ŋayɛ Mahwətə laka Moyize, se te veci nya gezete ghena shɛhɛ Mahwətə, zhɛne keshi keshi,

²⁴ma nda kaɗema mbeli keɗepe nda menete geva fetea shɛ ne, katedzeghe ɗa melɛ kwa tere tere pɛtɛa mbeli le mca nya tenza zəŋwəa ŋkɛ zeɗehwe ɗa, 'ya Mahwətə. Katekele hə ba'a tɛ hɛ kase yite kala nya keseneve geva, tsagha zhɛfa kedzeghe melɛ keyaɓe jaɗafa.

²⁵Kwa sebe ta ŋkɛ ne, kateɓela gəsəkəa yaɓe jaɗafa nde dzeghe Shala kənəa pɛtɛa ka Israyɛl. Tagha gɛ, kateyaɓemte geva jaɗafa ta nci. Kwa nza ŋkɛ ne, fete nya kemenete geva le ɗema ta wəndə nya dzeghekɛ ɗa melɛ kwa tere tere ba'a melɛ keyaɓe jaɗafa yɛ kezha gheŋkɛ, 'ya Mahwətə.

²⁶Katekelemte geva fete ta pɛtɛa ka Israyɛl ba'a ŋa ka se se nyi hwa hɛ te wənə, kwa nza ŋkɛ ne, pɛtɛa mbeli ya te fete nya kemenete geva nya le ɗema ta wəndəa shɛ.

²⁷Ma kenza ŋkɛ wəndə kwetɛŋe nde menete fete le ɗema ta ŋkɛ ne, katedzeghe melɛ ŋkɛ le kwe nya keva kwetɛŋe kezha yaɓemte geva jaɗafa ta ŋkɛ.

²⁸Kateɓela gəsəkəa kelemte fete nya le ɗema ta wəndəa shɛ nde dzeghe Shala te wənə kənə kwa kema ta ɗa, 'ya Mahwətə. Tagha gɛ, kateyaɓemte geva jaɗafa ta ŋkɛ.

²⁹Kanya kwetɛŋe nza wəsə mahalegəa shɛ kaŋa pɛtɛa mbeli nyi kemenete fete le ɗema ta nci: ka Israyɛl keɗema ka se se nyi hwa hɛ.

³⁰Ama kemenete fete nde Israyɛl keɗema nde se se le ɗe ta ŋkɛ ne, 'ya yabezemte ɗa ghena ŋkɛ, 'ya Mahwətə. Kateŋkamte geva ŋkɛ shave mbe hwelefe ta ŋkɛ.

³¹Kwa ghəa ŋkɛ tenza fete ta ŋkɛ, va nya ɓelama ghena ta ɗa ŋkɛ, 'ya Mahwətə ba'a nya dzawanyɛ ŋkɛ kənəa ghena nyi gezete 'ya.

³²Ma vəa ŋkwa nya nza ka Israyɛl te ɓerama ne, pa mbeli ntsate kwete wəndə kapa sheghwə te veci kezhɛne mpi.

³³Pa hɛ keleke ŋkɛ kase kadzawa kema ta Moyize, Aron ba'a pɛtɛa mbeli.

³⁴Ntake mbeli kaya ŋkɛ megela, kwa nza ŋkɛ ne, kenaka mbeli katarete wəsə nya temene nda mbeli we.

³⁵Tagha gɛ, ma ke Mahwətə sha Moyize: «Peslekɛ wəndəa shɛ mbeli! Jejɛwəmte ŋkɛ pɛtɛa mbeli le pelɛ pelɛke te wəmbəa ghedəkwə.»

³⁶Pa pɛtɛa mbeli kelakave ŋkɛ shave mbe ghedəkwə ba'a jɛwəmte ŋkɛ le pelɛ. Tsetse mte ŋkɛ, kala nya gezave nda Mahwətə ke Moyize.

³⁷Ma ke Mahwətə sha Moyize:

³⁸«Wa nya ghena nya tegeze nda na ke ka Israyɛl nya: Keshi keshi ne, katemene wəshi yɛ gwedze gwedzare dzeyi mɛa lekwesa ta ŋayɛ ba'a katehwepe pawa kwa ndereme ndereme yɛ dzeyi te hɛ.

³⁹Kateseɗe lekwesa nyi nza gwedze gwedzare te yɛ. Ma vəa ŋkwa nya tenakɛ gwedze gwedzarea shɛhɛ yɛ ne, katezəzə ghena nyi gezete ŋayɛ 'ya, 'ya Mahwətə yɛ ba'a katemene slene yɛ le hɛ. Ma tsagha ne, katetsəkwə ŋayɛ wənəa ŋayɛ ba'a ntsə ta ŋayɛ yitea zele kweci shala we.

⁴⁰Katezəzə yɛ kamene slene le ghena nyi gezete 'ya ba'a katenza yɛ tekeleke kaŋa Shala ta ŋayɛ.

⁴¹'Ya ya kaMahwətə Shala ta ŋayɛ nya kefəakave ŋayɛ shave mbe Ɛzhipte kezha nza kaShala ta ŋayɛ. Kaganda ne, 'ya ya kaMahwətə Shala ta ŋayɛ.»