Read KapsikiDC Ɓela 16 Bible Online

Ɓela 16 - KapsikiDC bible

Ɓela 16

¹Pa kwete nde Lɛvi nya nza sləa ŋkɛ kaKorɛ, wəzege ta Isar, mbe hwelefe ta Kɛhat tsəkwəyite yɛ Datan le Abiram, ŋwalea Ɛliyab ba'a On, wəzege ta Pɛlɛt, nyi kwa yita ta Rəbɛn

²yitea zhɛne nda ghə ke Moyize, tsagha kweci ka Israyɛl gwəmsə bake ba'a mcɛfemsə. Ma mbelia shɛhɛ ne, mbeli nyi te ghəa mbeli ba'a mbeli nyi nza zləvə te hɛ nyi ghwene mbeli yitea tsene hɛ.

³Pa hɛ tseneyite geva yitea yɛ Moyize le Aron, ma ke hɛ sha hɛ: «Wərə kala nya! Nahe pɛtɛa mbeli keveyi geva tekeleke ba'a nahe Mahwətə kenza tepe ta nci. Yitea wa veyi ghəa ŋayɛ yɛ kwele ma ke kweci mbelia Mahwətə wa?»

⁴Ma kwa fate ghena shɛ Moyize ne, gwəɗəŋə ŋkɛ ntiŋə ghə mbe hɛɗi.

⁵Kwa sebe ta ŋkɛ, ma ke sha yɛ Korɛ le mbeli nyi yite: «Ma hendɛ masheke ne, katencɛ wəndə nya keveyi geva tekeleke kezha dzawa kema ta ŋkɛ Mahwətə. Ma wəndə nya tenta ŋkɛ ne, katedzawa kema ta ŋkɛ ŋkɛ.

⁶Ma gheyɛ gɛ Korɛ le mbeli nyi yitea gha, menete mə wəsə nya: fəte mə wəshi ketere 'wərdə.

⁷Ma hendɛ ne, katenta laɗe ta ghwə yɛ te hɛ ba'a katekwərə kwərə 'wərdə yɛ kənəa hɛ kwa kema ta Mahwətə. Ma wəndə nya tenta Mahwətə tagha gɛ ne, gheŋkɛ ya kawəndə nya keveyi geva tekeleke. Wərə kala nya ka Lɛvi!»

⁸Ma ke Moyize sha Korɛ zhɛkwa: «Fa mə gɛ, gheyɛ, ka Lɛvi!

⁹Dewə ŋayɛ ve nya veyi ŋayɛ Shala ta ka Israyɛl tekeleke hwa ka Israyɛl kezha dzawa kema ta ŋkɛ kamene slene mbe cɛ lekwesa ta Mahwətə ba'a kezha ghereŋe yɛ kwa kema ta ka Israyɛl yitea dzeghe nda melɛ ke hɛ na?

¹⁰Pa ŋkɛ pelave ŋayɛ hweŋkwa kahende nda geva, gha Korɛ le ka menəhɛ ŋa nyi kaka Lɛvi. Ama tsetsenya ne, nza kaka dzeghe Shala yaɗe yɛ!

¹¹Vatse zhɛne nda ghə yɛ ke Mahwətə, gha le mbeli nyi yitea gha. Ama Aron ne, wa ŋkɛ ŋkɛ nda ɗema ghena ta ŋkɛ yɛ wa?»

¹²Kwa sebe ta ŋkɛ ne, pa Moyize ghwenakɛ ŋkwa kaheka yɛ Datan le Abiram, ŋwalea Ɛliyab, ama ma ke hɛ zhɛnete nda: «Kadzeme hɛɗia shɛ n'yɛ we.

¹³Dewə ŋa fə nya fəakame n'yɛ na same kwa hɛɗi nya hwɛ yɛ ŋ'wa le yɛməa mze kezha mpə n'yɛ te ɓerama na? Gha kaɗe kanza kawəndə nya te ghəa n'yɛ na?

¹⁴Kaganda ne, kebegheghe n'yɛ na kadzete hɛɗi nya hwɛ yɛ ŋ'wa le yɛməa mze te we! Kendeke n'yɛ yɛ wəve ba'a yɛ wəvea rɛzɛŋe na kawəsə kezeme ghɛ we! Kaka ghwələa kɛfi newe n'yɛ na na? Kadzeme n'yɛ we!»

¹⁵Pa wənəa Moyize zhɛte nda kwele kwele. Ma ke sha Mahwətə: «Yɛma wəsə gəməa nci na ma. Kegha 'ya kakelete ya kwara va hɛ we, kegha 'ya kamenete nda fete ke kwete wəndəa nci we.»

¹⁶Ma ke Moyize sha Korɛ: «Ma gha le mbeli nyi yitea gha ne, se mə hendɛ kadzawa kema ta Mahwətə, gha, ghenci ba'a Aron.

¹⁷Katekele wəsə ketere 'wərdəa ŋkɛ yayata wəndəa ŋayɛ. Katebete 'wərdə kwa hə hə yɛ te ba'a kateve ŋkɛ yayata wəndəa ŋayɛ kwa kema ta Mahwətə, geze ta ŋkɛ wəshi ketere 'wərdə gwəmsə bake ba'a mcɛfemsə. Tsagha na ba'a Aron, yayata wəndə le wəsə ketere 'wərdəa ŋkɛ.»

¹⁸Pa yɛ Korɛ le mbeli nyi yite fəte wəshi ketere 'wərdəa nci, ntate laɗe te, kwərə kwərəyi 'wərdə kənə ba'a ghereŋenji mɛa cɛ lekwesa kebegeme geva zlaɓe le Moyize ba'a Aron.

¹⁹Pa Korɛ tsenete mbeli nyi yite kwa kema ta ka Israyɛl, mɛa cɛ lekwesa kebegeme geva. Tagha gɛ, pa zləvəa Mahwətə ncɛte nda geva ke mbeli pɛtɛ,

²⁰ma ke Mahwətə sha yɛ Moyize le Aron:

²¹«Hendemte mə geva yitea mbeli nyighɛ, kwa nza ŋkɛ ne, 'ya kateza hɛ kala metɛ ta ntsə.»

²²Pa yɛ Moyize le Aron gwəɗəŋənji ntiŋə ghə mbe hɛɗi, ma ke hɛ tsate lewela: «Shala yawe, Shala nya kendeke nda mpi ke pɛtɛa wəshi nyi kepate geva, gha kahwepe wənə va pɛtɛa mbeli, tewəmbəreke wəndə kwetɛŋe nya kemenete jaɗafa na?»

²³Ma ke Mahwətə sha Moyize:

²⁴«Gezete nda ke mbeli kezha hendemte geva hɛ seyi yitea cɛ lekwesa ta yɛ Korɛ, Datan ba'a Abiram.»

²⁵Pelɛhetɛme Moyize sate te ŋkwa kalə sha yɛ Datan le Abiram. Ntəŋə mbelia jama ta ka Israyɛl kwa sebe ta ŋkɛ.

²⁶Ma ke sha mbeli: «Hendemte mə geva seyi yitea cɛ lekwesa ta ka 'yaghwa mehelea shɛhɛ. Mba yɛ kekwaɗe kwete hwa wəshia nci, yagha yɛ kampə tewəmbəreke pɛtɛa jaɗafa ta nci.»

²⁷Pa mbeli hendemte geva seyi yitea yɛ cɛ lekwesa ta Korɛ, Datan ba'a Abiram. Pa yɛ Datan le Abiram shave ba'a ghereŋenji mɛa cɛ lekwesa ta nci zlaɓe le mia nci, ŋwalea nci ba'a kweci mbeli nyi ki ghɛa nci.

²⁸Ma ke Moyize gezete: «Te wəsə nya ne, kateɗepe yɛ Mahwətə nde ghwenakɛ ɗa kezha mene wəshi nyi, wəsə shɛ kamene 'ya le ghəa ɗa we:

²⁹Ma kempənji mbeli nyi kala nya mpə mbeli pɛtɛ, ma kemenete nda geva ŋkɛ ke hɛ kala nya mene nda geva ŋkɛ ke mbeli pɛtɛ ne, Mahwətə nde ghweneke ɗa tsagha we.

³⁰Ama kemenete wəsə meŋele Mahwətə, ma keghwenemte geva hɛɗi kezha nda hɛ le wəshia nci, ma kedzawa hɛ teghweme sha mbelia kwahɛɗi ne, kateɗepe yɛ nahe hɛ kekelemte zləvə te Mahwətə.»

³¹Miɗima ta ghena shɛ te mɛ va Moyize ne, pa hɛɗi ghwenemte geva yitea seɗa ta yɛ Datan le Abiram.

³²Pa hɛɗi ghwenemte geva ba'a ndahwe hɛ le mbeli nyi ki ghɛa nci, tsagha mbeli nyi yitea Korɛ ba'a pɛtɛa wəshia nci.

³³Pa hɛ dzawa sha mbelia kwahɛɗi teghweme, ghenci ba'a pɛtɛa wəshia nci. Pa hɛɗi zhiɓəaghe geva kənəa hɛ. Tagha gɛ, zlɛcɛ sebe te hɛ hwa jikə ta ka Israyɛl.

³⁴Pɛtɛa ka Israyɛl nyi dzeyi yitea hɛ hwɛnji va lewela ta nci, kwa nza ŋkɛ ne, ma ke hɛ sha ghəa nci: «Hwɛ ɓəmə, yagha hɛɗi kandahwe ɓəmə!»

³⁵Tagha gɛ, pa Mahwətə tsete ghwə nya keteremte zhili nyi gwəmsə bake ba'a mcɛfemsə nyi ketere 'wərdə nyi.