Read KapsikiDC Ɓela 18 Bible Online

Ɓela 18 - KapsikiDC bible

Ɓela 18

¹Ma ke Mahwətə sha Aron: «Ma gha, ŋwale tezhilia ŋa ba'a ka menəhɛ ŋa nyi kwa yita ta Lɛvi ne, kwa ghəa ŋayɛ tenza fete nyi kemenete geva laka ŋkwa nya keveyi geva tekeleke. Ama gha le ŋwale tezhilia ŋa ne, kwa ghəa ŋayɛ tenza fete nyi kemenete geva vəa ŋkwa nya dzeghe melɛ yɛ.

²Katesərə ka menəhɛ ŋa nyi kwa yita ta Lɛvi, peləa yiteyɛ ŋa na kahende nda geva ke ŋkwa nya keveyi geva tekeleke yitea gha. Katekemane ŋa hɛ ba'a katenza hɛ yitea gha. Ama gha le ŋwale tezhilia ŋa ne, katenza yɛ kwa kema ta cɛ lekwesa nya nza səndəkwəa jikə geva mbe.

³Katenza hɛ kaka mene ŋa slene ba'a kaka mene slene ta cɛ lekwesa pɛtɛ, ama mba hɛ kehende nda geva ke wəshi nyi keveyi geva tekeleke keɗema ke reghwetɛ. Ma tsagha ne, katempə yɛ, ya ghenci, ya gheyɛ we.

⁴Katenza hɛ kaka kemane ŋa ba'a kaka mene slene ta cɛ lekwesa kebegeme geva, pɛtɛa slene nyi mbe cɛ lekwesa. Wəndə ŋkwərə shɛ katehende ŋayɛ geva we.

⁵Ma gheyɛ le ŋa ŋayɛ ne, katemene slene yɛ mbe ŋkwa nya keveyi geva tekeleke ba'a te reghwetɛ. Ma tsagha ne, katezhɛne ghwə ta hwepe wənəa ɗa kame te ka Israyɛl we.

⁶Newema mə, nahe 'ya kentave ka menəhɛ ŋayɛ nyi kaka Lɛvi hwa ka Israyɛl, ŋa ɗa hɛ, 'ya Mahwətə. Nahe 'ya kefəave ŋayɛ hɛ kezha mene slene ta cɛ lekwesa kebegeme geva.

⁷Ama gha le ŋwale tezhilia ŋa ne, katemene slene ta dzeghe melɛ yɛ te reghwetɛ ba'a katemene slene yɛ kwetere wəmbəa mayafe. Gheŋkɛ nde tenza kaslene ta ŋayɛ. 'Ya nde ndeke ŋayɛ slenea shɛ. Ma wəndə ŋkwərə nya ketehende nda geva ke ŋkwa nya keveyi geva tekeleke ne, katepesle ŋkɛ mbeli.»

⁸Ma ke Mahwətə sha Aron: «Newema, 'ya kadape ŋa wəshi gəmə nyi ve ɗa ka Israyɛl tekeleke te dzeve. 'Ya kave ŋa hɛ. Ghenci ya kaŋa ŋa zhɛme, kaghala ghala tenza hɛ kaŋa ŋwale tezhilia ŋa.

⁹Wa nyi ŋa ŋa nyi zhɛme mbe wəshi gəmə nyi keveyi ɗa geva tekeleke tsape nyi keɗema keteremte geva: pɛtɛa wəshi gəməa hə, pɛtɛa wəshi melɛ keyaɓe jaɗafa ba'a pɛtɛa wəshi melɛ kedimə ghə nyi dzeghekɛ ɗa ka Israyɛl. Kaŋa ŋayɛ tenza wəshi gəmə nyi keveyi geva nyi tekeleke tsape, gha le ŋwale tezhilia ŋa.

¹⁰Katezeme hɛ yɛ mbe ŋkwa nya keveyi geva tekeleke. Ama deke zhili ba'a ŋwale tezhili ka tezeme hɛ, va nya nza ŋkɛ kawəsə kezeme nya keveyi geva tekeleke.

¹¹Wa nya kwete wəsə nya ketenza kaŋa ŋa nya: wəshi nyi kentamte geva kənəa wəshi gəməa ka Israyɛl, seyi kənəa pɛtɛa wəshi nyi fə ɗa hɛ kase. Kaghala ghala teve ŋayɛ hɛ 'ya, gha, ŋwale tezhilia ŋa ba'a ŋwalea kwɛa ŋa. Wərə yayata wəndə nya wɛŋe ki ghɛa ŋa kazeme hɛ.

¹²'Ya kave ŋayɛ ka ghate ta wəshi nyi kese te wəve, n'yi, tɛ mɛnɛfɛ ba'a ha nyi ve ɗa ka Israyɛl tekeleke, 'ya Mahwətə perə.

¹³Ma pɛtɛa ka ghate ta wəshi nyi kese te wəve nyi te hɛɗia nci nyi fə ɗa hɛ kase, 'ya Mahwətə ne, kaŋa ŋa tenza hɛ. Wərə yayata wəndə nya wɛŋe ki ghɛa ŋa kazeme hɛ.

¹⁴Ma pɛtɛa wəshi nyi ve ɗa ka Israyɛl tekeleke kaghala ghala ne, kaŋa ŋayɛ tenza hɛ.

¹⁵Ma pɛtɛa tezhɛa kɛfi nyi kendeke ɗa geva, ŋa wəndə ŋelɛ keɗema ŋa wəshi keseɗa ne, kaŋa ŋayɛ tenza hɛ. Ama katesərə na kambeɗe tezhɛa wəndə ŋelɛ mbeli, tsagha tezhɛa wəsə keseɗa nya wale wale.

¹⁶Katesərə na kambeɗe ŋwale tezhili nyi kemenete tere kwetɛŋe mbeli. Ma səkəməa mbeɗe ta ŋkɛ ne, dəɓərəa mze kwa tɛawetɛa mcɛfe, nya nza ɗaŋeɗa ta yayata ŋkɛ gare meŋe kwa slibə ta bela ta kiləwə, kala nya mbe ŋkwa nya keveyi geva tekeleke.

¹⁷Ama katesərə na kambeɗe tezhɛa wəzege ta sla, ŋa təmə keɗema ŋa kwe mbeli we. Wəshi keseɗa nyi keveyi geva tekeleke hɛ. Katesheke mimia nci na kadzete reghwetɛ ba'a katetere ɗa bela ta nci nyi nza merege te hɛ na. Zeɗehwe ɗa tenza n'yia nci nya kezəŋwə megela, 'ya Mahwətə.

¹⁸Kwa sebe ta ŋkɛ ne, kaŋa ŋa tenza slia wəshi keseɗa shɛhɛ kala nya nza medzeŋezle nya ve ɗa mbeli le ɓela gəsəkə ba'a seɗa kwa zeme kaŋa ŋa.

¹⁹'Ya kave ŋayɛ pɛtɛa wəshi nyi ve ka Israyɛl kawəshi gəmə nyi keveyi geva tekeleke kwa kema ta ɗa. Kaghala ghala tenza hɛ kaŋa ŋayɛ, gha, ŋwale tezhilia ŋa ba'a ŋwalea kwɛa ŋa, laka jikə geva nya keɗema kanehemte geva nya menete 'ya le gha ba'a hwelefefia ŋa, 'ya Mahwətə.»

²⁰Ma ke Mahwətə sha Aron zhɛkwa: «Katenza bela ta hɛɗi keɗema wəsə va gha te hɛɗi nya teve nda 'ya ke ka Israyɛl we. 'Ya nde tenza kaŋa ŋa bela ba'a kaŋa ŋa wəsə hwa ka Israyɛl.»

²¹Ma ke Mahwətə mtsehete: «Wa nyi zhɛme nyi teŋ'we ka Lɛvi nyi te slene ta cɛ lekwesa kebegeme geva nyi mene ɗa hɛ nyi: 'ya kave nda kwa meŋe ta bela ta wəshi nyi mene mbeli mbe Israyɛl ke hɛ.

²²Katehende nda geva kweci Israyɛl ke cɛ lekwesa kebegeme geva we. Ma tsagha ne, katemene fete hɛ ba'a katempə hɛ we.

²³Deke ka Lɛvi ka temene slene ta cɛ lekwesa kebegeme geva. Kwa ghəa nci tenza fete nyi menete hɛ mbe. Kawəsə mahalegə nya kaghala ghala tenza ŋkɛ keshi keshi. Katenza yɛ wəve va ka Lɛvi kala kweci ka Israyɛl we.

²⁴Ama kwa meŋe ta bela ta wəshi nyi fə ɗa ka Israyɛl, 'ya Mahwətə yateve nda 'ya ke hɛ. Vatse gezete nda 'ya ke hɛ kaɗema hɛ kakemave yɛ wəve kala kweci ka Israyɛl.»

²⁵Ma ke Mahwətə sha Moyize:

²⁶«Wa nya ghena nya tegeze nda na ke ka Lɛvi nya: Ma vəa ŋkwa nya tefəke ŋayɛ kwa meŋe ta bela ta wəshi nyi ve ŋayɛ 'ya kaŋa ŋayɛ ka Israyɛl ne, katekelemte kwa meŋe ta bela ta wəshia shɛhɛ yɛ kaŋa ɗa, 'ya Mahwətə.

²⁷Gheŋkɛ nde tenza kaŋa ŋayɛ bela nya ve ɗa yɛ kala bela ta ha nya dzeghe kweci Israyɛl mɛa lane keɗema bela ta tɛ mɛnɛfɛ kezha ve ɗa.

²⁸Tsagha shɛ tefə ɗa ŋa ŋayɛ yɛ bela kase, 'ya Mahwətə perə. Katekele bela shɛ yɛ seyi kənəa kwa meŋe ta bela ta wəshi nyi kemave yɛ va Israyɛl. Kateve nda bela nya kaŋa ɗa yɛ, 'ya Mahwətə ke nde dzeghe Shala Aron.

²⁹Ma mbe pɛtɛa wəshi nyi keteve ŋayɛ geva ne, katekele bela nya kaŋa ɗa, 'ya Mahwətə yɛ. Ma mbe pɛtɛa wəshi ganji ne, katekelemte bela nya keveyi geva tekeleke yɛ.

³⁰Ma pa na sha tegeze nda ke hɛ ɓiyitsa: Ma vəa ŋkwa nya tekele wəshi ganjia shɛhɛ yɛ ne, kateve nya ketene yɛ kaŋa ŋayɛ, gheyɛ ka Lɛvi, kala nya ve ha ta nci, tɛ mɛnɛfɛa nci ba'a n'yia nci nya ketene ka Israyɛl.

³¹Wərə yɛ kazeme wəshia shɛhɛ te yayata ŋkwa, gheyɛ le mbeli nyi ki ghɛa ŋayɛ, kwa nza ŋkɛ ne, gheŋkɛ ya kazhɛme ta ŋayɛ te slene nyi mene yɛ mbe cɛ lekwesa kebegeme geva.

³²Kelemtema ta ŋayɛ ke bela ganji kaŋa ɗa ne, katemene fete yɛ laka zeme nya ketene we. Katekelemte zləvə yɛ te wəshi gəmə nyi ve ɗa ka Israyɛl tekeleke ba'a katempə yɛ we.»