Read KapsikiDC Ɓela 21 Bible Online

Ɓela 21 - KapsikiDC bible

Ɓela 21

¹Pa meghea Arad, nde Kanan nya te Nɛgɛv fate se ta ka Israyɛl laka hweŋkwa ta Atarim. Pa ŋkɛ have nda mpa ke ka Israyɛl ba'a keseve kweci mbelia nci.

²Tagha gɛ, ma ke ka Israyɛl meɗeyi nda ke Mahwətə: «Ma kevame mbeli nyi na mbe dzeve ta n'yɛ ne, kateŋzla yɛ meleme ta nci pɛtɛ n'yɛ.»

³Pa Mahwətə fate ghena ta ka Israyɛl ba'a vame ka Kanan mbe dzeve ta nci. Pa ka Israyɛl mpəmte hɛ ba'a ŋzlamte yɛ meleme ta nci pɛtɛ. Pa hɛ hekate nda slə ke ŋkwa shɛ kaHorma, geze ta ŋkɛ, “Ŋzla”.

⁴Cape ka Israyɛl slənji hwa ghweme ta Hor kadzawa laka ndərəa ghwəvərə kezha wətəli hɛɗia Ɛdom. Ama kwa hweŋkwa ne, pa geva ta mbeli mpənji.

⁵Ntake mbeli kageze ghena te yɛ Moyize le Shala, ma ke hɛ: «Kezha wa fəakame n'yɛ yɛ same mbe Ɛzhipte wa? Kezha mpə n'yɛ n'yɛ te ɓerama nya na? Teke ne, ya ɗafa, ya yɛmə shɛ we, ba'a ne, wənəakwe n'yɛ va wəsə kezeme nya ɗema nya deme te!»

⁶Tagha gɛ, pa Mahwətə ghweneke nda shishi nyi ghyana ghyana ke mbeli. Pa hɛ hehalakawa mbeli. Kwele kwele nyi kempənji hwa ka Israyɛl.

⁷Pa mbeli nyi ketene se sha Moyize, ma ke hɛ shɛ: «Nahe n'yɛ kemenete jaɗafa laka geze ghena te Mahwətə ba'a te gha. Səkwəte Mahwətə kezha ŋkamte shishi nyi ŋkɛ cakeɗake le ghen'yɛ gi!» Ntake Moyize kasəkwə ghə kezha mbeli.

⁸Ma ke Mahwətə shɛ: «Vɛsəte shishi yitea mze kwa ghwə ghwə shɛ na vate te sheghwə. Ma yayata wəndə nya tehaleve ŋkɛ shishi ba'a nya ketenewe shishia shɛ ne, katenza ŋkɛ teghweme.»

⁹Pa Moyize vɛsəte shishi yitea mze kwa ghwə ghwə ba'a veyi te sheghwə. Ma yayata wəndə nya haleve shishi nda newakɛ shishi mze kwa ghwə ghwə ŋkɛ ne, teghweme nza ŋkɛ.

¹⁰Cape ka Israyɛl kwa hweŋkwa, pa hɛ nzanji mbe Obot.

¹¹Kwa sebe ta ŋkɛ, cape hɛ slə mbe Obot, pa hɛ nzanji mbe Yɛ-Abarim, te ɓerama nya laka ŋkwa kesame ta veci yitea Mowab.

¹²Cape hɛ slə tagha, pa hɛ nzanji mɛa hələa Zɛrɛd.

¹³Ma kwa slə hɛ tagha ne, pa hɛ nzanji pelɛ kwete kema ta hələa Arnon, nya kehwɛ dzeyi te ɓerama dzawa laka hɛɗia ka Amor. Kwa nza ŋkɛ ne, Arnon ya kaghala nya kwelɛ yɛ hɛɗia Mowab le ŋa ka Amor.

¹⁴Vatse ne, ma ke mbe palepa ta yɛ mpa ta Mahwətə: «Vahɛb mbe Səwfa ba'a yɛ hələa ŋkɛ, Arnon

¹⁵ba'a yɛ dzeve ta ŋkɛ, nya kehwɛ dzawa laka meleme ta Ar ba'a nya kaghala ta hɛɗia Mowab.»

¹⁶Slə tagha ne, hwa'a hɛ mbe Bɛyɛr, geze ta ŋkɛ, “Belageji”. Te ŋkwa shɛ ne, ma ke Mahwətə sha Moyize: «Tsenete mbeli kezha ve nda yɛmə 'ya ke hɛ.»

¹⁷Tagha gɛ, ma ke ka Israyɛl sha cimə: «Yɛmə kagwezha gwezha same kwa belageji! Tsahe ɓəmə ŋkɛ!

¹⁸Belageji nya late mbeli nyi te ghə, nya late mbeli nyi nza zləvə te hɛ le yɛ geta meghea nci ba'a yɛ geta kwa slekwa ta nci!» Slə te ɓerama ne, hwa'a ka Israyɛl mbe Matana,

¹⁹kwa sebe ta ŋkɛ, mbe Nahaliyɛl, zhɛne, mbe Bamot.

²⁰Kakwa keɗaŋe ne, hwa'a hɛ kwa zlərə nya kejive mbe hɛɗia Mowab, jive laka ghəa ghweme ta Pisga, nya newe ŋkwa nya te ɓerama mbeli pelɛ.

²¹Pa ka Israyɛl ghwenakɛ nda mbeli ke Sihon, meghea ka Amor, ma ke hɛ shɛ:

²²«Pelave n'yɛ hweŋkwa kajive mbe hɛɗia ŋa. Katejive n'yɛ mbe wəve nyi kewəza wəza, ya mbe yɛ wəvea rɛzɛŋe we. Katesa yɛmə n'yɛ kwa yɛ ghwa we. Hweŋkwa nya beŋwe yatedzeghwa n'yɛ kwa nda tejive n'yɛ n'yɛ mbe hɛɗia ŋa.»

²³Ama kaɗe Sihon kapele nda hweŋkwa ke ka Israyɛl kajive mbe hɛɗia ŋkɛ we. Pa ŋkɛ tsenete ka sewajɛa ŋkɛ ba'a se sha ka Israyɛl te ɓerama. Pa ŋkɛ ntsehe mbe Yahas ba'a have nda mpa ke ka Israyɛl.

²⁴Pa ka Israyɛl hərəte ŋkɛ ba'a kelehwe hɛɗia ŋkɛ pɛtɛ, se mɛa Arnon hwa'a mbe Yabok ba'a hwa'a kwa ghala ta ka Amon. Kwa nza ŋkɛ ne, zli ya kaghala ta ka Amon.

²⁵Pa hɛ fəhwe yɛ meleme ta ka Amor pɛtɛ. Pa hɛ ntishɛnji dzeyi mbe melemea shɛhɛ, mbe Hɛshebon ba'a mbe meleme nyi dzeyi yite.

²⁶Kwa nza ŋkɛ ne, Hɛshebon nde se kameleme ta Sihon, meghea ka Amor nya kese kampa le meghea ka Mowab ba'a nya kekelehwe hɛɗia ŋkɛ pɛtɛ hwa'a mɛa Arnon.

²⁷Vatse ne, ma ke ka ɗepe gha cimə ghate: «Se mə kadzembe Hɛshebon, ŋate mə meleme ta Sihon zhɛkwa, zhɛneyi mə ŋkɛ te ŋkwa ŋkɛ!

²⁸Nahe ghwə keshave mbe Hɛshebon, nahe ghwə ketsete geva shave mbe meleme ta Sihon. Nahe ŋkɛ keteremte Ar nya mbe Mowab ba'a shala tseŋwə nyi pelɛ yɛ wəmbəa Arnon.

²⁹Wa nya ndiremi te gheyɛ ka Mowab gɛ! Rayɛ sebe te gheyɛ, gheyɛ mbelia Kemosh! Nahe hɛ kezhɛrete ŋwale tezhilia nci kambeli nyi kehwɛnji ba'a ŋwalea kwɛa nci kaŋwalea kwɛ nyi kefəhwe geva kaŋa Sihon, meghea ka Amor.

³⁰Ama nahe n'yɛ kehehakawa ka Amor le have. Rayɛ sebe te Hɛshebon hwa'a mbe Dibon. Nahe n'yɛ keŋzlakawa ŋkwa hwa'a mbe Nofa, vəa ŋkwa nya tse ghwə mbe Mɛdeba.»

³¹Tsetse nzanji ka Israyɛl te hɛɗia ka Amor.

³²Pa Moyize ghwenakɛ mbeli kalə kanewe meleme ta Yazɛr. Pa ka Israyɛl fəhwe meleme nyi dzeyi yite. Pa Moyize ŋkamte ka Amor nyi dzeyi mbe hɛ.

³³Kwa sebe ta ŋkɛ, pa hɛ kelete kwete hweŋkwa ba'a dzemenji kwa hweŋkwa ta Bashan. Pa Og, meghe nya mbe Bashan se sha ka Israyɛl, gheŋkɛ le pɛtɛa ka sewajɛa ŋkɛ kezha mpa le hɛ mbe Ɛdrɛyi.

³⁴Ma ke Mahwətə sha Moyize: «Ghazlənəma na ve ma! Kateve ŋkɛ 'ya mbe dzeve ta ŋa, gheŋkɛ, pɛtɛa ka sewajɛa ŋkɛ ba'a hɛɗia ŋkɛ. Katemene nda na kala nya menete nda na ke Sihon, meghea ka Amor nya mbe Hɛshebon.»

³⁵Pa ka Israyɛl hərəte Og, ŋwalea ŋkɛ ba'a pɛtɛa ka sewajɛa ŋkɛ. Kese hɛ kasərə wəndə ya kwetɛŋe teghweme we. Pa hɛ kelehwe hɛɗia ŋkɛ.