Read KapsikiDC Ɓela 22 Bible Online

Ɓela 22 - KapsikiDC bible

Ɓela 22

¹Cape ka Israyɛl slənji, pa hɛ nzanji te ŋwela ta Mowab pelɛ kema ta hələa Zhəwrdɛŋe, pelɛ wəmbəa Zhɛriko.

²Nahe Balak, wəzege ta Sipor kenakɛ pɛtɛa wəshi nyi menete nda ka Israyɛl ke ka Amor.

³Kwetɛ kwetɛŋe mehele ta ka Mowab tazenji kwa nakɛ mbeli kwele kwele hɛ, pa ghazlənə zhɛte nda ke ka Mowab kwa kema ta ka Israyɛl.

⁴Ma ke hɛ sha mbelia jama ta ka Madiyan: «Wa nyi mbeli nyi kwele kwele nyi katezeme pɛtɛa wəshi nyi dzeyi yitea gheɓəmə kala nya zeme gwəzə sla kwamte.» Balak, wəzege ta Sipor ya kameghea ka Mowab te vəa shɛ.

⁵Pa ŋkɛ ghwenakɛ mbeli kalə sha Balam, wəzege ta Bɛyor, nya mbe Petor nya mɛa Efrate, nya kahɛɗia ŋkɛ. Ma ke shɛ: «Wa nyi kweci mbeli nyi keshave mbe Ɛzhipte, nya nza ŋkwa nya te hɛɗi bətə va hɛ nyi teke. Nahe hɛ kenzanji dekwe yitea 'ya.

⁶Nde təhwə təhwə ŋa 'ya shɛ na bezlamte ɗa mbelia shɛhɛ. Kwa nza ŋkɛ ne, berete ma hɛ ke 'ya. Nda kwete kateɗate hɛ 'ya ba'a kateŋkamte hɛ 'ya te hɛɗi nya. Kwa nza ŋkɛ nahe 'ya keɗepe, ma wəndə nya wəpikɛ na ne, kewəpi wəpi nza ŋkɛ, ma nya bezlakɛ na ne, kebezla bezla nza ŋkɛ.»

⁷Cape mbelia jama ta ka Mowab ba'a ŋa ka Madiyan kalə le wəshi gəmə sha nde ŋa zlera. Ntsehema ta nci ki ghɛa Balam ne, pa hɛ ɓelate nda ghena ta Balak.

⁸Ma ke Balam sha hɛ: «Hɛ ŋayɛ mə teke. Katezhɛne ŋayɛ ghena nya tegeze ɗa Mahwətə 'ya.» Pa mbelia jama ta ka Mowab nzanji ki ghɛa Balam.

⁹Tagha gɛ, pɛkwe Shala sha Balam, ma ke shɛ: «Wa mbeli nyi ki ghɛa ŋa nyi wa?»

¹⁰Ma ke Balam sha Shala: «Balak, wəzege ta Sipor, meghea ka Mowab nde ghweneke ɗa mbeli nyi. Ma ke sha 'ya:

¹¹‹Wa nyi kweci mbeli nyi keshave mbe Ɛzhipte nya nza ŋkwa nya te hɛɗi bətə va hɛ nyi teke. Nde təhwə təhwə ŋa 'ya shɛ na bezlamte ɗa mbelia shɛhɛ. Nda kwete kateɗate hɛ 'ya ba'a kateŋkamte hɛ 'ya.›»

¹²Ma ke Shala sha Balam: «Katelə na yitea hɛ, katebezla mbelia shɛhɛ na we, kwa nza ŋkɛ ne, kewəpi wəpi hɛ.»

¹³Ma te hendɛ ta ŋkwa masheke ne, pelɛhetɛme Balam sate te ŋkwa, ma ke sha mbelia jama ta Balak: «Zhɛne mə geva kalə sha hɛɗia ŋayɛ, kwa nza ŋkɛ kafɛa ɗa Mahwətə keslə le gheyɛ.»

¹⁴Pa mbelia jama ta ka Mowab zhɛneke geva sha Balak, ma ke hɛ shɛ: «Nahe Balam keɗema se yitea ghen'yɛ.»

¹⁵Ama pa Balak ghwenakɛ kweci mbelia jama nyi kwele kwele ma ba'a nyi nza zləvə za ma te hɛ ke ka ghate zhɛkwa.

¹⁶Hwa'a hɛ ki ghɛa Balam, ma ke hɛ shɛ: «Wa nya ghena nya geze Balak, wəzege ta Sipor nya: Tehwə tehwə nzama ŋa na kese sha 'ya ma.

¹⁷Kwa nza ŋkɛ kateve zləvə 'ya te gha ba'a katemene yayata wəsə nya tegeze ɗa na 'ya. Nde shɛ na bezlamte ɗa mbelia shɛhɛ.»

¹⁸Ma ke Balam zhɛnete nda ke mbeli nyi ghweneke Balak: «Ya Balak fəave ɗa mze kwa tɛawetɛa ba'a mze kwa tere tere nyi ki ghɛa ŋkɛ pɛtɛ ne, kateshɛ 'ya mene wəsə nya ɓɛhwɛ keɗema nya wəba tekeleke le ghena nya gezave Shala Mahwətə ta ɗa we.

¹⁹Hɛ ŋayɛ mə teke, gheyɛ perə, nda tefave ghena nya tegeze ɗa Mahwətə 'ya.»

²⁰Hwa'a Shala sha Balam heviɗi, ma ke shɛ: «Ma nda kezha heka ŋa se mbeli nyi ne, kwiɗi yitea hɛ. Ama deke wəsə nya tegeze ŋa 'ya yatemene na.»

²¹Ma te hendɛ ta ŋkwa masheke ne, pelɛhetɛme Balam sate te ŋkwa, pa ŋkɛ pate ŋemalea kwara ta ŋkɛ, cape ŋkɛ le mbelia jama ta ka Mowab.

²²Pa Shala hwepete wənə va slə ta Balam. Pa nde ghwene ta Mahwətə ghereŋenyɛ kwa hweŋkwa kezha fɛa nda ŋkwa. Pelɛ kwara ta ŋkɛ Balam ba'a kwa sebe ta ŋkɛ ka mene slene ta ŋkɛ bake.

²³Dəkwə kwara te nde ghwene ta Mahwətə nya meghereŋe kwa hweŋkwa le kafayɛ tenteɗe yitea dzeve. Pa kwara samenyɛ kwa hweŋkwa kadzembe gamba. Ntake Balam kaɗa kwara kezha zhɛre ŋkɛ kadzawa hweŋkwa.

²⁴Tagha gɛ, pa nde ghwene ta Mahwətə lə kaghereŋenyɛ kwa kwete hweŋkwa mentɛawe jive mbe yɛ wəvea rɛzɛŋe. Zli ya laka yayata bela ta hweŋkwa shɛ.

²⁵Pa kwara nakɛ nde ghwene ta Mahwətə. Pa ŋkɛ slapeyi geva vare zli. Ma kwa masliyi seɗa ta Balam ŋkɛ vare zli ne, ntake Balam kaɗa ŋkɛ zhɛkwa.

²⁶Pa nde ghwene ta Mahwətə dzatenyɛ te kema ma zhɛkwa ba'a ghereŋenyɛ kwelɛ ŋkwa nya mentɛawe nya ɗema ŋkwa kewətəli geva jive te kwa zeme keɗema te kwa gwela shɛ.

²⁷Ma kwa nakɛ nde ghwene ta Mahwətə kwara ne, ɓelahe nde ɓelahenyɛ mba Balam pelɛ. Mɓɛke Balam hwepete wənə, zhibədikə ŋkɛ kənə le geta.

²⁸Tagha gɛ, pa Mahwətə ndeke nda geze ghena ke kwara, ma ke sha Balam: «Wa wəsə nya menete ŋa 'ya nda ɗate ɗa na mahekene zhigə wa?»

²⁹Ma ke Balam zhɛnete nda: «Zləvə yakelemte na te 'ya! Ma ya kafayɛ ya yitea dzeve va 'ya ne, nza nahe 'ya kepeslekɛ ŋa tsetsenya!»

³⁰Ma ke kwara sha Balam: «Ashɛ 'ya ya kakwara ta ŋa, kwara nya dzeme na se vəashi wəka? Tsetse seneve mene ŋa 'ya na?» Ma ke Balam zhɛnete: «Ewə!»

³¹Tagha gɛ, pa Mahwətə pelemte nda ntsə ke Balam, pa ŋkɛ nakɛ nde ghwene ta Mahwətə meghereŋe kwa hweŋkwa le kafayɛ tenteɗe yitea dzeve. Gwəɗəŋə ŋkɛ ba'a ntiŋə ŋkɛ sha ghə mbe hɛɗi.

³²Ma ke nde ghwene ta Mahwətə shɛ: «Wa raberə ɗate kwara ta ŋa na mahekene zhigə wa? Kanewe na 'ya nde se kafɛa ŋa hweŋkwa, kwa nza ŋkɛ ne, dzeghwa ganyɛ dzeghwa ta ŋa nya newe 'ya we.

³³Nahe kwara ta ŋa kenakɛ ɗa ba'a kezhɛremte geva mahekene zhigə va 'ya. Ma ya kaɗema ŋkɛ kemenete kala nyagha ne, nza nahe 'ya kepeslekɛ ŋa, ama gheŋkɛ ne, katesərə ŋkɛ 'ya le mpi.»

³⁴Ma ke Balam sha nde ghwene ta Mahwətə: «Nahe 'ya kemenete jaɗafa, kwa nza ŋkɛ ne, keɗepete 'ya nahe na kese meghereŋe te kema ta ɗa kwa hweŋkwa we. Ma kenza nde kaɗema dzeghwa shɛ zeɗehwe ŋa ne, katezhɛne geva 'ya sha ghɛ.»

³⁵Ma ke nde ghwene ta Mahwətə shɛ: «Kwiɗi yitea mbeli nyi, ama deke ghena nya tegeze ŋa 'ya yategeze na.» Tagha gɛ, cape Balam yitea mbelia jama ta Balak.

³⁶Ma kwa fate Balak se yase Balam ne, cape ŋkɛ kalə shɛ mbe Ar, te hɛɗia Mowab, nya mɛa hələa Arnon, nya kwa ghala ta hɛɗia ŋkɛ.

³⁷Ma ke Balak shɛ: «Keghwenakɛ mbeli 'ya kezha heka ŋa wəka? Va wa ɗema na kese kase wa? Dewə 'ya kezha ve zləvə te gha na?»

³⁸Ma ke Balam zhɛnete nda ke Balak: «Tsetsenya ne, wa nya 'ya nya kese sha gha. Ama wa ghena nya nza 'ya kagezete tse wa? Deke ghena nya teve Shala kwa mɛ ɗa yategeze 'ya.»

³⁹Cape yɛ Balam le Balak, pa hɛ ntsehe mbe Kiriyat-Həwsot.

⁴⁰Pa Balak dzeghekɛ melɛ le yɛ sla ba'a yɛ timɛti. Pa ŋkɛ ghweneghe nda ŋa yɛ Balam le mbelia jama nyi yite bela.

⁴¹Ma te hendɛ ta ŋkwa masheke ne, pa Balak keleghe Balam kadzeme Bamot-Ba'al nya nza mbeli kanakɛ bela ta ka Israyɛl tagha.