Read KapsikiDC Ɓela 23 Bible Online

Ɓela 23 - KapsikiDC bible

Ɓela 23

¹Ma ke Balam sha Balak: «Pate ɗa reghwetɛ mberefaŋe teke shɛ na fəke ɗa mcɛmcɛli mberefaŋe ba'a gamea lɛmə mberefaŋe.»

²Pa Balak menete kala nya gezete nda Balam. Kwa sebe ta ŋkɛ, pa hɛ bake nci dzeghekɛ melɛ le mca ba'a game te yayata reghwetɛ.

³Ma ke Balam sha Balak: «Ghereŋe ŋa takwa yitea melɛ kwa tere terea ŋa, vəa ŋkwa nya tehendemte geva 'ya. Nda kwete katese Mahwətə sha 'ya. Ma ghena nya tegeze ɗa ŋkɛ ne, kategeze ŋa ŋkɛ 'ya ya tsema tsemanyɛ ŋkɛ.» Pa ŋkɛ dzemenyɛ pelɛ wəmbə nya dɛrɛŋe rɛŋe.

⁴Tagha gɛ, pa Shala se sha Balam, ma ke shɛ: «Nahe 'ya kepate reghwetɛ mberefaŋe ba'a kedzeghekɛ melɛ le mca ba'a game te yayata ŋkɛ.»

⁵Pa Mahwətə veyi nda ghena kwa mɛ ke Balam, ma ke shɛ: «Zhɛneghe geva kadzawa sha Balak kezha tegeze nda ghena.»

⁶Pa Balam zhɛnakawa geva sha Balak ba'a sləyi ŋkɛ meghereŋe yitea melɛ kwa tere terea ŋkɛ, zlaɓe le mbelia jama ta ka Mowab.

⁷Ma ke Balam gezete ghena ŋela: «Nahe Balak kekeleke ɗa se mbe Aram. Sawa pelɛ ghweme nyi laka ŋkwa kesame ta veci hekakawa ɗa meghea ka Mowab. Ma ke sha 'ya: Nde shɛ na bezlamte ɗa ka Israyɛl! Kaganda ne, nde shɛ na bezlamte ɗa ŋwalea Zhakob!

⁸Tsema bezla mbeli nyi ɗema Shala kebezlakɛ 'ya wa? Tsema ve ndiremi 'ya te mbeli nyi ɗema Mahwətə kevate ndiremi te hɛ wa?

⁹Kanewe newe mbelia shɛhɛ 'ya sawa pelɛ ghəa yɛ keleɓa, dazhɛ dazhɛ ntsə ta ɗa te hɛ sawa pelɛ ghəa yɛ wəmbə. Mbeli nyi kenzanji te ŋa nci ŋkwa ba'a nyi keɗema kenza kala kweci hwelefefi hɛ.

¹⁰Wa nde nza kaɓelate ka Israyɛl, hwelefefia Zhakob nyi kala ndaleghe wa? Kamawe 'ya kamte kala mbeli nyi tiɗiɗi nyi, kakiɗi nza ta ɗa kala ŋa ka Israyɛl.»

¹¹Ma ke Balak sha Balam: «Wa wəsə nya menete ɗa nya na wa? Pa 'ya hekake ŋa kezha bezla ka ghema ta ɗa, ama wəpi yawəpi hɛ na!»

¹²Ma ke Balam zhɛnete nda: «Ashɛ deke geze nda ghena nya gezete Mahwətə ke mbeli ya kaslene ta ɗa wəka?»

¹³Ma ke Balak zhɛkwa: «Zele ɗa kalə kadzete kwete ŋkwa nya nza na kanakɛ pɛtɛa ka Israyɛl. Ma teke ne, deke bela ta nci yanakɛ na, kenakɛ hɛ na pɛtɛ we. Ma se te ŋkwa shɛ ne, katebezla ɗa hɛ na.»

¹⁴Pa ŋkɛ keleghe ŋkɛ kadzeme ŋkwa ka newe ŋkwa, pelɛ ghəa ghweme ta Pisga. Tagha ne, pa ŋkɛ pate reghwetɛ mberefaŋe ba'a dzeghekɛ melɛ le mca ba'a game te yayata ŋkɛ.

¹⁵Ma ke Balam sha Balak: «Nza ŋa teke, takwa yitea melɛ kwa tere tere nyi dzeghekɛ na, nda telə 'ya kafave ghena va Shala.»

¹⁶Pa Mahwətə ncɛte nda geva ke Balam ba'a veyi nda ghena kwa mɛ, ma ke shɛ: «Zhɛneghe geva kalə sha Balak kezha tegeze nda ghena.»

¹⁷Pa Balam zhɛneke geva kase sha Balak nya meghereŋe takwa yitea melɛ kwa tere tere ta ŋkɛ zlaɓe le mbelia jama nyi mbe Mowab. Ma ke Balak 'yɛwete ve: «Wa yagezete Mahwətə gɛ wa?»

¹⁸Tagha gɛ, ma ke Balam gezete ghena ŋela: «Sate ŋa Balak, wəzege ta Sipor, veyite sleme megela yitea ghena ta ɗa!

¹⁹Kenza Shala kawəndə kezha sla tseŋwə we. Kenza ŋkɛ kawəndə ŋelɛ kezha zhɛre zəzə we. Kageze ghena ŋkɛ kaɗema ŋkɛ kayipə kwa we. Kameɗe wəsə ŋkɛ kaɗema ŋkɛ kamene we.

²⁰'Ya ne, nahe 'ya keyɛte kawəpi mbeli nyi, kwa nza ŋkɛ ne, nahe Mahwətə kewəpikɛ hɛ. Wəsə shɛ kazhɛremte 'ya mbe we.

²¹Kenakɛ ndiremi ŋkɛ hwa mbelia Zhakob we, kenakɛ yaka ŋkɛ te ka Israyɛl we. Nahe Shala Mahwətə ta nci kenza le hɛ. Kala meghe tsa nda gaghwe hɛ.

²²Shala nde fəakave hɛ mbe Ɛzhipte. Kala sla gamba berete nya mbe hɛ.

²³Ŋa zlera shɛ hwa mbelia Zhakob we, mene ghwɛ shɛ hwa ka Israyɛl we. Mbe vəa ŋkɛ ne, kageze nda geva yayata wəsə nya mene Shala ke hɛ.

²⁴Kasate hwelefe ta Israyɛl te ŋkwa kala nivɛrə: kaslekwe wəsə nya keseve ŋkɛ ŋkɛ, kasa mimia wəsə keseve ŋkɛ ŋkɛ. Kwa sebe ta ŋkɛ ne, kaɓelahe ŋkɛ.»

²⁵Ma ke Balak sha Balam: «Ma keɗema bezla hɛ na ne, sərəakɛ wəpi hɛ ɓetəkə gi!»

²⁶Ma ke Balam zhɛnete nda: «Ndagwara nahe 'ya kegezete ŋa kezha mene wəshi nyi gezave ɗa Mahwətə nahe!»

²⁷Ma ke Balak sha Balam zhɛkwa: «Zele ɗa kalə kadzete kwete ŋkwa. Nda kwete kateyɛ Shala kezha bezlamte ɗa mbeli nyi na.»

²⁸Pa Balak keleghe Balam kadzeme ghəa ghweme ta Pɛyor nya nza newe ŋkwa nya te ɓerama mbeli pelɛ.

²⁹Ma ke Balam shɛ: «Pate ɗa reghwetɛ mberefaŋe teke shɛ na fəke ɗa mcɛmcɛli mberefaŋe ba'a gamea lɛmə mberefaŋe.»

³⁰Pa Balak menete kala nya gezete nda Balam. Kwa sebe ta ŋkɛ, pa dzeghekɛ melɛ le mca ba'a game te yayata reghwetɛ.