Read KapsikiDC Ɓela 25 Bible Online

Ɓela 25 - KapsikiDC bible

Ɓela 25

¹Pa ka Israyɛl nzanji mbe Shitim. Tagha ne, pa hɛ ghate ve nda ghə ke mene mefətekwə le mia ka Mowab.

²Pa mia shɛhɛ ghweteyite hɛ yitea dzeghe nda melɛ ke yɛ shala ta nci. Pa ka Israyɛl zehwe wəshi kezeme ta nci nyi keveyi geva tekeleke ba'a gwegwəɗəŋənji kwa kema ta yɛ shala ta nci.

³Pa hɛ ndeke nda ghə ke Ba'al nya mbe Pɛyor. Tagha gɛ, pa Mahwətə hwepete wənə va hɛ.

⁴Ma ke Mahwətə sha Moyize: «Fəte mbeli nyi te ghəa mbeli shɛ na hwehwepeyi hɛ ŋalawe te sheghwə kwa kema ta ɗa, 'ya Mahwətə yitea veci. Tagha gɛ, kategweɗakwe ghwə ta hwepe wənəa ɗa, 'ya Mahwətə va ka Israyɛl.»

⁵Ma ke Moyize gezave nda ke mbeli nyi te ghə hwa ka Israyɛl: «Pa yayata wəndəa ŋayɛ mpə mbeli nyi kwa yita ta ŋkɛ nyi keve nda ghə ke Ba'al nya mbe Pɛyor!»

⁶Ma vəa ŋkwa shɛ ne, hwa'a kwete nde Israyɛl shave hwa ka menəhɛnyɛ le wəzha ta ka Madiyan. Nahe Moyize ba'a pɛtɛa ka Israyɛl nyi kenehwene mɛa cɛ lekwesa kebegeme geva kenakɛ hɛ.

⁷Tagha gɛ, pelɛhetɛme nde dzeghe Shala Pinhas, wəzege ta Ɛlazar ba'a hwelefe ta Aron sate te ŋkwa te tepe ta mbeli. Laŋe ŋkɛ te megha.

⁸Shilimə ŋkɛ mbe cɛ lekwesa nya dzembe wəndəa shɛ le wəzha ta ka Madiyan. Pa Pinhas mpəmte hɛ bake nci laka mpahwe nda megha te hwə ke hɛ. Taghanyɛ ne, pa ndiremi nya wəba nya keghazle ka Israyɛl kiɗinyɛ.

⁹Ma mbeli nyi mpəmte ndiremi nya wəba shɛ ne, mbeli 24.000.

¹⁰Ma ke Mahwətə sha Moyize:

¹¹«Nahe nde dzeghe Shala Pinhas, wəzege ta Ɛlazar ba'a hwelefe ta Aron kezhɛremte hwepe ta wənəa ɗa seyi kənəa ka Israyɛl laka ncɛ nya ncɛte ghəa ŋkɛ ŋkɛ kande zlɛ te ŋkwa ɗa te tepe ta nci. Vatse ɗema 'ya kese kaza sebe te ka Israyɛl va wəba ta ɗe ta ɗa.

¹²Ma tewəmbəreke wəsə nya ne, ma pa na shɛ: 'Ya kamene jikə geva nya kekele kwelɛŋe kase le gheŋkɛ.

¹³Katenza jikə geva shɛ kezha gheŋkɛ ba'a kezha hwelefefia ŋkɛ. Kateve hɛ ŋkɛ kaka dzeghe ɗa melɛ kaghala ghala. Kwa nza ŋkɛ ne, nahe ŋkɛ kencɛte ɗe ta ŋkɛ nya wəba kaŋa Shala ta ŋkɛ ba'a nahe ŋkɛ keɓelate gəsəkəa kelemte jaɗafa ta ka Israyɛl te wənə.»

¹⁴Ma nde Israyɛl nya peslekɛ mbeli zlaɓe le wəzha ta ka Madiyan ne, Zimri, wəzege ta Saləw, wəndə nya te ghəa yita ta Simɛyon.

¹⁵Ma wəzha ta ka Madiyan le ŋa nta ne, Kozbi sləa nta. Ma yitenyɛ nya heka mbeli kaSəwr ne, gheŋkɛ nde se te ghəa yita kwele kwele mbe hwelefe ta ka Madiyan.

¹⁶Ma ke Mahwətə sha Moyize:

¹⁷«Have nda mə mpa ke ka Madiyan ba'a mpəmte mə hɛ!

¹⁸Kwa nza ŋkɛ ne, kala ka ghema se hɛ sha gheyɛ laka mbəɗəkwə nya menete ŋayɛ hɛ mbe ghena nya mbe Pɛyor ba'a mbe ŋa Kozbi, wəzha ta kwete wəndə nya te ghə mbe Madiyan, wəzha ta nci nya peslekɛ mbeli te vecia ndiremi nya wəba mbe Pɛyor.»

¹⁹Ma kwa sebe ta ndiremi nya wəba nya ne,