Read KapsikiDC Ɓela 27 Bible Online

Ɓela 27 - KapsikiDC bible

Ɓela 27

¹Ma Mala, Nowa, Hogla, Milka ba'a Tirsa ne, ŋwalea kwɛa Selofad, wəzege ta Hɛfɛr, wəzege ta Gala'ad, wəzege ta Makir, wəzege ta Manasɛ hɛ. Sawa mbe Manasɛ, wəzege ta Zhozɛf sawa hɛ.

²Hwa'a hɛ kwa kema ta Moyize, nde dzeghe Shala Ɛlazar, mbeli nyi te ghə ba'a mbeli pɛtɛ, mɛa cɛ lekwesa kebegeme geva. Ma ke hɛ:

³«Nahe yiteyɛa n'yɛ kemte te ɓerama, ya gheŋkɛ ɗema kese hwa mbeli nyi kejikəte geva le Korɛ yitea Mahwətə. Va jaɗafa ta ŋkɛ mtenyɛ ŋkɛ. Ama wəzege teza shɛ ve we.

⁴Nahe ŋkɛ kehite geva kazamte geva sləa yiteyɛa n'yɛ shave hwelefe ta ŋkɛ, va nya ɗema wəzege teza ve na? Ndeke n'yɛ ŋa n'yɛ wəsə kezeme ghɛ hwa ka kesaka yiteyɛa n'yɛ gi!»

⁵Pa Moyize gezete nda ghena ta nci ke Mahwətə.

⁶Tagha gɛ, ma ke Mahwətə sha Moyize:

⁷«Kaganda ya va ŋwalea kwɛa Selofad. Ndeke nda ŋa nci wəsə kezeme ghɛ ke hɛ kala ŋa ka kesaka yiteyɛa yite nci. Fəave nda wəshia yiteyɛa nci ke hɛ.

⁸Kwa sebe ta ŋkɛ ne, ma pa na sha ka Israyɛl: ‹Ma vəa ŋkwa nya temte wəndə kaɗema wəzege teza ve ne, katezeme ghɛ wəzha ta ŋkɛ yite.

⁹Ma keɗema wəzha makwa ve ne, katezeme ghɛ ka kesaka yitenyɛ yite.

¹⁰Ma keɗema ka kesaka yita ve ne, katezeme ghɛ ŋwalea ka kesaka yitenyɛ yite.

¹¹Ma keɗema ŋwalea ka kesaka yita ve ne, katefə nda wəshia ŋkɛ yɛ ke menənyɛ nya dekwede. Gheŋkɛ nde tezeme ghɛ yitea wəshia shɛhɛ.› Kawəsə nya tiɗiɗi tenza ŋkɛ kaŋa ka Israyɛl, kala nya gezave nda Mahwətə ke Moyize.»

¹²Ma ke Mahwətə sha Moyize: «Dzeme ghweme ta Abarim shɛ na nakɛ hɛɗi nya ve nda 'ya ke ka Israyɛl.

¹³Katenewe hɛɗia shɛ na. Ma kwa sebe ta ŋkɛ ne, katemte na, kala wəza meyɛ ŋa Aron.

¹⁴Kwa nza ŋkɛ ne, nahe yɛ kefatema ghena ta ɗa te ɓerama ta Tsin, vəa ŋkwa nya se jikə ta mbeli kaghəpə le 'ya. Kese na kancɛ kwa ntsə ta nci 'ya ya kaShala nya kaganda, vəa ŋkwa nya 'yɛwakɛ yɛmə hɛ we.» Gheŋkɛ ya kaghena ta yɛməa Mɛriba, geze ta ŋkɛ, “Yɛməa ghəpə” mbe Kadɛs, te ɓerama ta Tsin.

¹⁵Ma ke Moyize sha Mahwətə:

¹⁶«Shala Mahwətə, ma gha nya keve nda mpi ke wəshi nyi pate na ne, ntave wəndə nya ketenza te ghəa pɛtɛa mbeli.

¹⁷Pa ŋkɛ nza kawəndə nya kenza wərə kanzate nza te ghəa nci te yayata ŋkwa ba'a te yayata və. Ma tsagha gɛ ne, katenza mbelia Mahwətə kala timɛti nya ɗema wəndə yitea hɛ we.»

¹⁸Ma ke Mahwətə zhɛnete nda ke Moyize: «Kelete Zhozəwɛ, wəzege ta Nəwn. Wəndə nya nza sefəa ɗa mbe ŋkɛ. Kateve dzeve na kənə.

¹⁹Katekele ŋkɛ na kase kadzawa kema ta nde dzeghe Shala Ɛlazar ba'a kadzawa kema ta jikə ta mbeli. Kateve nda slene ta ŋa na kwa ntsə ta nci.

²⁰Kateve nda kwete bela ta berete ta ŋa na, yitea hawe pɛtɛa ka Israyɛl ve.

²¹Katedzawa kema ta nde dzeghe Shala Ɛlazar ŋkɛ le ghəa ŋkɛ. Nde dzeghe Shala shɛ nde tedzawa kema ta ɗa, 'ya Mahwətə kezha fa ghena laka Əwrim te ghəa ŋkɛ. Katehawe Zhozəwɛ ba'a pɛtɛa ka Israyɛl va ghena nyi gezete ŋkɛ te yayata və ba'a te yayata ŋkwa.»

²²Pa Moyize menete kala nya gezave nda Mahwətə. Pa ŋkɛ kelete Zhozəwɛ ba'a keleke ŋkɛ kadzawa kema ta nde dzeghe Shala Ɛlazar ba'a kadzawa kema ta jikə ta ka Israyɛl.

²³Pa ŋkɛ vaghe dzeve kənə ba'a dapave nda slene ta ŋkɛ kala nya gezave nda Mahwətə.