Read KapsikiDC Ɓela 31 Bible Online

Ɓela 31 - KapsikiDC bible

Ɓela 31

²«Kwiɗi vate ɗa te ka Madiyan va wəsə kwa ndiremi nya menete nda hɛ ke ka Israyɛl. Kwa sebe ta ŋkɛ ne, katedzawa na sha ka shihɛ ŋa.»

³Tagha gɛ, ma ke Moyize sha mbeli: «Fəte wəshi kempa ta nci kweci mbelia ŋayɛ kalə kampa le ka Madiyan, yitea ve ɗa nya tarete Mahwətə te hɛ.

⁴Tsehave mə ka sewajɛ slibə shave mbe yayata yita ta Israyɛl.»

⁵Pa mbeli tsehave zhili slibə mbe yayata yita ta Israyɛl, pɛtɛa nci ne, zhili 12.000 kezha dzemte mpa.

⁶Pa Moyize ghweneghe hɛ pɛtɛ kadzemte mpa, zlaɓe le nde dzeghe Shala Pinhas, wəzege ta Ɛlazar. Pa Pinhas fəte wəshi nyi keveyi geva tekeleke, tsagha yɛ veke kevɛ kezha gha mpa.

⁷Pa hɛ have nda mpa ke hɛɗia Madiyan, kala nya gezave nda Mahwətə ke Moyize. Pa hɛ mpəmte pɛtɛa zhili.

⁸Ɓiyitsa ne, pa hɛ mpəmte ka meghea kɛfia ka Madiyan mcɛfe: Ɛvi, Rɛkɛm, Səwr, Həwr ba'a Rɛba, tsagha Balam, wəzege ta Bɛyor.

⁹Pa hɛ fəhwe mi ba'a ŋwalea ka Madiyan. Pa hɛ fəhwe pɛtɛa wəshi keseɗa kefə wəshi ta nci, yɛ wəvəsəa wəshi keseɗa ta nci pɛtɛ ba'a pɛtɛa wəshia nci.

¹⁰Pa hɛ ndəmte pɛtɛa meleme nyi nza hɛ mbe ba'a yɛ ghedəkwəa nci pɛtɛ.

¹¹Kwa sebe ta ŋkɛ, cape hɛ le pɛtɛa wəshi, mbeli ba'a wəshi keseɗa nyi fəhwe hɛ.

¹²Pa hɛ fəke hɛ pɛtɛ kadzembe ghedəkwəa nci nya te ŋwela ta Mowab, takwa yitea Zhəwrdɛŋe ba'a kwa kema ta Zhɛriko. Pa hɛ ncɛte nda hɛ pɛtɛ ke Moyize, ke nde dzeghe Shala Ɛlazar ba'a ke pɛtɛa ka Israyɛl.

¹³Cape Moyize, Ɛlazar ba'a kweci mbeli nyi te ghəa mbeli shave mbe ghedəkwə kezha kemaneve hɛ.

¹⁴Mɓɛke Moyize hwepete wənə va mbeli nyi te ghəa yɛ wəvəsəa ka sewajɛ slibə ba'a va nyi te ghəa yɛ wəvəsəa ka sewajɛ gwəmsə nyi kesheke kwamte mpa shɛ. Ma ke sha hɛ:

¹⁵«Yitea wa sərəakɛ mi yɛ teghweme wa?

¹⁶Ndagwara mia shɛhɛ ka ghwetame ka Israyɛl mbe mene nda fete nyi dzawe dzawe ke Mahwətə, mbe ghena ta Pɛyor, laka ghena nyi kese va Balam. Tagha gɛ, pa ndiremi nya wəba mate te mbelia Mahwətə.

¹⁷Ma tsetsenya gɛ ne, mpəmte mə pɛtɛa ŋwale tezhili, tsagha pɛtɛa mi kese yitea zhili.

¹⁸Ama wərə yɛ kasərəakɛ nda pɛtɛa ŋwalea kwɛ nyi keɗepema zhili ke ghəa ŋayɛ.

¹⁹Ma pɛtɛa mbelia ŋayɛ nyi kepeslekɛ wəndə keɗema nyi kekwaɗakɛ wəndə kemte mte ne, nda hɛ kanza kahɛ mberefaŋe pelɛke te wəmbəa ghedəkwə. Nda yɛ kayaɓemte geva ta ŋayɛ wɛŋe te kwa mahekene ta hɛ ba'a te kwa mberefaŋe ta hɛ, gheyɛ le ghəa ŋayɛ ba'a ŋwale kwɛ nyi fəke hɛ.

²⁰Kateyaɓe yɛ lekwesa, pɛtɛa wəshi nyi menete mbeli le hweta, le shintia kwe keɗema le sheghwə yɛ perə.»

²¹Ma ke nde dzeghe Shala Ɛlazar sha zhili nyi kese kwamte mpa: «Wa nyi wəshi nyi gezave nda Mahwətə ke Moyize nyi:

²²Ma wəshi nyi le mze kwa tere tere, mze kwa tɛawetɛa, mze kwa gheme, lɛ, kwekwərə keɗema dalema,

²³geze ta ŋkɛ, wəshi nyi keɗema katere va ghwə ne, kateyaɓe hɛ yɛ wɛŋe le ghwə. Kwa sebe ta ŋkɛ, kateselame hɛ yɛ hwa yɛmə keyaɓe ŋkwa. Ma wəshi nyi ketere va ghwə ne, deke hwa yɛmə keyaɓe ŋkwa wɛŋe teselame hɛ yɛ.

²⁴Ma kwa sebe ta nya yaɓemte lekwesa ta ŋayɛ yɛ te kwa mberefaŋe ta hɛ ne, katenza yɛ wɛŋe ba'a katezhɛne geva yɛ kadzembe ghedəkwə.»

²⁵Ma ke Mahwətə sha Moyize:

²⁶«Gha, nde dzeghe Shala Ɛlazar ba'a mbeli nyi te ghəa mbeli ne, ɓelate mə pɛtɛa wəshi, mbeli ba'a wəshi keseɗa nyi fəke mbeli.

²⁷Katenehe hɛ na bake mbe: ma kwete ne, kaŋa mbeli nyi kese kwamte mpa, ma kwete, kaŋa mbeli nyi ketene.

²⁸Ma mbe bela nya kaŋa ka sewajɛ ne, katekelemte ɗa ŋa na bela: wəndə kwetɛŋe mbe mbeli gwəmsə mcɛfe, wəsə keseɗa kwetɛ kwetɛ mbe yɛ sla, kwara lɛmə, timɛti ba'a kwi gwəmsə mcɛfe.

²⁹Katefə nda ŋa ɗa na bela, 'ya Mahwətə ke nde dzeghe Shala Ɛlazar.

³⁰Ma shave mbe bela nya kaŋa ka Israyɛl ne, katekelemte wəndə kwetɛŋe na mbe mbeli mcɛfemsə, wəsə keseɗa kwetɛ kwetɛ shave mbe yɛ sla, kwara lɛmə, timɛti, kwi ba'a kweci wəshi keseɗa mcɛfemsə. Katefə nda bela shɛ na ke ka Lɛvi nyi kemene slene ta cɛ lekwesa nya keveyi ɗa geva tekeleke, 'ya Mahwətə.»

³¹Pa yɛ Moyize le nde dzeghe Shala Ɛlazar menete nya gezave nda Mahwətə ke Moyize.

³²Wa nyi wəshi nyi ketene nyi hwa wəshia ka Madiyan nyi fəke ka sewajɛ: timɛti ba'a kwi 675.000,

³³yɛ sla 72.000,

³⁴kwara lɛmə 61.000

³⁵ba'a ŋwalea kwɛ nyi keɗepema zhili 32.000.

³⁶Wa nya bela nya kendeke nda geva ke ka sewajɛ nya: timɛti ba'a kwi 337.500

³⁷nyi kelemte mbeli gwəmsə ŋkwaŋe ba'a mberefaŋemsə mcɛfeghəmbe shave hwa hɛ kaŋa Mahwətə.

³⁸Yɛ sla 36.000 nyi kelemte mbeli mberefaŋemsə bakeghəmbe shave hwa hɛ kaŋa Mahwətə.

³⁹Kwara lɛmə 30.500 nyi kelemte mbeli shave hwa hɛ ŋkwaŋemsə kwetɛŋeghəmbe kaŋa Mahwətə.

⁴⁰Mbeli 16.000 nyi kelemte mbeli mahekenemsə bakeghəmbe shave hwa hɛ kaŋa Mahwətə.

⁴¹Pa Moyize fəave nda zhigə ŋa Mahwətə bela ke nde dzeghe Shala Ɛlazar, kala nya kegezave nda Mahwətə.

⁴²Ma bela nya kaŋa ka Israyɛl, nya veyi Moyize tekeleke le ŋa ka sewajɛ,

⁴³bela nya kendeke geva ke mbeli ne, timɛti ba'a kwi 337.500,

⁴⁴yɛ sla 36.000

⁴⁵kwara lɛmə 30.500

⁴⁶ba'a mbeli 16.000.

⁴⁷Ma mbe bela nya kendeke nda geva ke ka Israyɛl, pa Moyize kelemte wəndə kwetɛŋe mbe mbeli mcɛfemsə, wəsə keseɗa kwetɛŋe mbe wəshi keseɗa mcɛfemsə. Kala gezave nda Mahwətə ne, pa Moyize fəave nda hɛ ke ka Lɛvi nyi kemene slene ta cɛ lekwesa ta Mahwətə.

⁴⁸Pa mbeli nyi te ghəa ka sewajɛ, mbeli nyi te ghəa yɛ wəvəsəa ka sewajɛ slibə ba'a nyi te ghəa wəvəsəa ka sewajɛ gwəmsə tsenete geva yitea Moyize,

⁴⁹ma ke hɛ shɛ: «Nahe ghen'yɛ keɓelate ka sewajɛ nyi kese mbe dzeve ta n'yɛ: wəndə shɛ keza we.

⁵⁰Vatse fəke nda wəshi gəmə ghen'yɛ ke Mahwətə, va nya yakɛ mpia n'yɛ ŋkɛ. Yayata wəndəa n'yɛ kave nda wəshi mze kwa tere tere nyi kemave ŋkɛ kawəshi gəmə ke Mahwətə: yɛ livə, yɛ takase, yɛ ŋgwedɛba, wəshi nyi mbe sleme ba'a wəshi nyi kwa welɛ.»

⁵¹Pa yɛ Moyize le nde dzeghe Shala Ɛlazar fəte pɛtɛa wəshi nyi menete nyi mbeli yitea mze kwa tere tere nyi fəke nyi hɛ.

⁵²Ma ɗaŋeɗa ta wəshi mze kwa tere tere pɛtɛ nyi fəave nda mbeli nyi te ghəa ka sewajɛ ke Mahwətə ne, kiləwə gwəmsə ba'a mberefaŋemsə.

⁵³Ma kaŋa kweci sewajɛ ne, yayata wəndəa nci kasərə nda wəshi nyi fəke ŋkɛ ke ghəa ŋkɛ.

⁵⁴Pa yɛ Moyize le nde dzeghe Shala Ɛlazar beteyi pɛtɛa wəshi mze kwa tere tere nyi fəke mbeli nyi te ghəa ka sewajɛ kawəshi gəmə mbe cɛ lekwesa kebegeme geva, yitea zəzə ka Israyɛl Mahwətə.