Read KapsikiDC Ɓela 34 Bible Online

Ɓela 34 - KapsikiDC bible

Ɓela 34

¹Ma ke Mahwətə sha Moyize:

²«Wa nyi ghena nyi tegeze nda na ke ka Israyɛl nyi: Ma vəa ŋkwa tedzete hɛɗia Kanan yɛ ne, wa nya tsetse tenza hɛɗi nya ketenehe ŋayɛ geva, geze ta ŋkɛ, hɛɗia Kanan le yɛ ghala ta ŋkɛ:

³Ma laka bela kwa zeme ne, ɓerama ta Tsin ba'a hɛɗia Ɛdom ka tenza kaghala ta hɛɗia ŋayɛ. Ma laka ŋkwa kesame ta veci ne, kwa zeweve ta ndərə kwa Ghwənəghwə teslə ghala shɛ.

⁴Katezhɛre geva nde kwa zeweve ta wəmbəa yɛ Yɛte, katejive nde laka Tsin, katejive nde laka zeweve ta Kadɛs-Barnɛya, zhɛne, jive laka yɛ Hasar-Adar le Asmon.

⁵Slə mbe Asmon ne, katezhɛne nde kawətəli geva dzawa laka hələa Ɛzhipte kezha ntsehe kwa ndərəa Mɛditɛranɛ.

⁶Ma laka ŋkwa kepəkwə ta veci ne, ndərəa Mɛditɛranɛ ya kaghala.

⁷Ma laka bela kwa gwela, katemɓe ghala yɛ kwelɛ yɛ ndərəa Mɛditɛranɛ le ghweme ta Hor.

⁸Slə mbe ghweme ta Hor ne, katemɓe ghala yɛ hwa'a mbe Lebo-Hamat. Katentsehe ghala shɛ mbe Sedad,

⁹kwa sebe ta ŋkɛ, katejive nde mbe Zifron kezha zhigə mbe Hasar-Ɛnan. Tsetse tenza ghala ta ŋayɛ laka bela kwa gwela.

¹⁰Ma laka ŋkwa kesame ta veci ne, katemɓe ghala yɛ slə mbe Hasar-Ɛnan hwa'a mbe Shefam.

¹¹Slə tagha, katedzawa nde laka Harbɛla nya laka ŋkwa kesame ta veci yitea Ayin. Kwa sebe ta ŋkɛ, katendəkwə geva nde mbe hələbə nya laka ŋkwa kesame ta veci yitea ndərəa Zhɛnɛzarɛt.

¹²Kakwa keɗaŋe ne, katedzawa nde hwa'a kwa Zhəwrdɛŋe kezha zhigə kwa ndərə kwa mte mte. Tsetse tenza yɛ ghala ta hɛɗia ŋayɛ.»

¹³Pa Moyize gezave nda ghena shɛhɛ ke ka Israyɛl. Kwa sebe ta ŋkɛ, ma ke sha hɛ: «Nya ya kahɛɗi nya gezete Mahwətə kezha nehe le kwasheghediɗi kwelɛ hwelefefi mesli ba'a kwa bake ta bela ta hwelefe.

¹⁴Kwa nza ŋkɛ nahe hwelefefia Rəbɛn, ŋa Gad ba'a kwa bake ta bela ta hwelefefia Manasɛ kekemave ŋa nci hɛɗi.

¹⁵Ma hwelefefi nyi bake nyi ba'a kwa bake ta bela ta hwelefe ne, pelɛ kema ta Zhəwrdɛŋe kemave ŋa nci hɛ hɛɗi, kwa kema ta Zhɛriko, laka ŋkwa kesame ta veci.»

¹⁶Ma ke Mahwətə sha Moyize:

¹⁷«Nde dzeghe Shala Ɛlazar ba'a Zhozəwɛ, wəzege ta Nəwn ka tenehe ŋayɛ hɛɗi.

¹⁸Kezha kemane hɛ mbe slenea shɛ ne, kateve wəndə nya te ghə mbe yayata hwelefe yɛ yitea hɛ.

¹⁹Wa nyi sləa nci nyi: Kwa yita ta Zhəwda ne, Kalɛb, wəzege ta Yefəwnɛ.

²⁰Kwa yita ta Simɛyon ne, Sheməwɛl, wəzege ta Amihəwd.

²¹Kwa yita ta Bɛnjamɛn ne, Ɛlidad, wəzege ta Kislon.

²²Kwa yita ta Dan ne, Bəwki, wəzege ta Yogli.

²³Kwa yita ta Manasɛ, wəzege ta Zhozɛf ne, Haniyɛl, wəzege ta Ɛfod.

²⁴Kwa yita ta Ɛfrayim, wəzege ta Zhozɛf ne, Keməwɛl, wəzege ta Shiftan.

²⁵Kwa yita ta Zabəlon ne, Ɛlisafan, wəzege ta Parnak.

²⁶Kwa yita ta Isakar ne, Paltiyɛl, wəzege ta Azan.

²⁷Kwa yita ta Asɛr ne, Ahihəwd, wəzege ta Shelomi.

²⁸Kwa yita ta Nɛftali ne, Pedahɛl, wəzege ta Amihəwd.»

²⁹Nyi ya kambeli nyi ntave Mahwətə kezha nehe nda hɛɗia Kanan ke hwelefefia Israyɛl.