Read KapsikiDC Ɓela 35 Bible Online

Ɓela 35 - KapsikiDC bible

Ɓela 35

¹Pa Mahwətə gezete nda ghena ke Moyize te ŋwela ta Mowab, takwa yitea Zhəwrdɛŋe ba'a kwa kema ta Zhɛriko. Ma ke shɛ:

²«Geze nda ke ka Israyɛl kanta nda yɛ meleme nyi te hɛɗia nci ke ka Lɛvi yitea nza hɛ mbe hɛ. Pa hɛ ŋave nda ŋkwa keya wəshi ke hɛ dzeyi yitea melemea shɛhɛ ɓiyitsa.

³Katenza ka Lɛvi dzeyi mbe melemea shɛhɛ ba'a katenza ŋkwa nyi dzeyi yitea hɛ kaŋa wəshi keseɗa ta nci ba'a kaŋa wəshi keseɗa kefə wəshi ta nci.

⁴Ma ŋkwa keya wəshi nyi teve nda shɛhɛ yɛ ke ka Lɛvi ne, kamɛtre gwəmsə mcɛfe tenza hɛ slə mbe zli nya yitea meleme kajive ŋwela, dzasle dzeyi yite.

⁵Ma pelɛke te wəmbəa meleme ne, katedzeghe ŋkwa yɛ kamɛtre slibə laka ŋkwa kesame ta veci, mɛtre slibə laka bela kwa zeme, mɛtre slibə laka ŋkwa kepəkwə ta veci ba'a mɛtre slibə laka bela kwa gwela kezha nza meleme te tepe ta ŋkɛ. Nyi ya kaŋkwa nyi ketenza dzeyi yitea meleme ta nci.

⁶Katenta nda meleme kewəfərə yɛ ŋkwaŋe ke ka Lɛvi kezha wəfərə wəndə nya kepeslekɛ ŋkwa le ɗema ta ŋkɛ mbe. Katenta nda kweci meleme yɛ wəfaɗemsə bakeghəmbe ke hɛ ɓiyitsa.

⁷Ma pɛtɛa nci ne, meleme wəfaɗemsə degheseghəmbe, yayata meleme le ŋkwa keya wəshi nyi dzeyi yite.

⁸Yayata hwelefe katenta nda meleme ke hɛ kala nza ta wəba ta hɛɗia ŋkɛ: ma hwelefe nya kwele kwele ne, kwele kwele nta nda ŋkɛ ke hɛ, ma nya ɓɛhwɛ ne, ɓɛhwɛ nta nda ŋkɛ ke hɛ.»

⁹Ma ke Mahwətə sha Moyize:

¹⁰«Wa nya ghena nya tegeze nda na ke ka Israyɛl nya: Ma vəa ŋkwa nya tejive ŋayɛ yɛ te Zhəwrdɛŋe ba'a nya tedzembe hɛɗia Kanan yɛ ne,

¹¹katenta kweci meleme yɛ kameleme kewəfərə. Katewəfərə wəndə nya kepeslekɛ ŋkwa le ɗema ta ŋkɛ mbe.

¹²Ma tsagha ne, katembele ŋkɛ va wəndə nya kewa wəndə nya peslekɛ ŋkɛ. Katepesle ŋkɛ mbeli keɗema jikə ta mbeli kamehate ghwə te we.

¹³Katenza meleme kewəfərəa shɛhɛ ŋkwaŋe:

¹⁴meleme kewəfərə mahekene laka ŋkwa kesame ta veci yitea Zhəwrdɛŋe ba'a mahekene te hɛɗia Kanan.

¹⁵Ma yayata wəndə nya peslekɛ ŋkwa le ɗema ta ŋkɛ, nde Israyɛl, nde se se keɗema mentiɓə nya hwa ka Israyɛl ne, wərə ŋkɛ kawəfərə mbe kwete hwa meleme nyi ŋkwaŋe nyi.

¹⁶Ma kenza nde le wəsə kwa lɛ lɛ peslekɛ ŋkwa ŋkɛ ne, nde pesle ŋkwa ŋkɛ. Tsagha ne, katepesle ŋkɛ mbeli.

¹⁷Ma kenza nde le pelɛ nya kenza kapeslekɛ ŋkwa bezave ŋkɛ, nda mtenyɛ ŋkɛ ne, nde pesle ŋkwa ŋkɛ. Tsagha ne, katepesle ŋkɛ mbeli.

¹⁸Ma kenza nde le wəsə kwa sheghwə sheghwə nya kenza kapeslekɛ mpave ŋkɛ ŋkɛ, nda mtenyɛ ŋkɛ ne, nde pesle ŋkwa ŋkɛ. Tsagha ne, katepesle ŋkɛ mbeli.

¹⁹Wəndə nya keveyi geva kawa wəndə nya kemte nde tepesle wəndə nya kepeslekɛ ŋkwa, vəa ŋkwa nya tebegeme ŋkɛ le.

²⁰Ma ketsəkwəte ŋkwa wəndə va zlɛ keɗema kebezave ŋkwa ŋkɛ le kwete wəsə le zəzə nya ndiremi, nda mtenyɛ wəndəa shɛ,

²¹keɗema kempave ŋkɛ ŋkɛ le balema le zlɛ le zlɛ, nda mtenyɛ ŋkɛ ne, nde pesle ŋkwa ŋkɛ. Tsagha ne, katepesle ŋkɛ mbeli. Wəndə nya keveyi geva kawa wəndə nya kemte nde tepesle wəndə nya kepeslekɛ ŋkwa, vəa ŋkwa nya tebegeme ŋkɛ le.

²²Ama ketsəkwəte ŋkwa wəndə le ɗema ta ŋkɛ ba'a kaɗema le zlɛ, keɗema kebezave ŋkwa ŋkɛ le kwete wəsə kaɗema le zəzə nya ndiremi,

²³kesərəakɛ pelɛ nya kenza kapeslekɛ wəndə ŋkɛ le ɗema ta ŋkɛ kame te wəndə, nda mtenyɛ wəndəa shɛ, ndagwara kaɗema ŋkɛ kande ghema ta ŋkɛ ba'a kaɗema ŋkɛ kazele kamene nda wəsə kwa ndiremi ne,

²⁴katemeha ghwə ta yɛ wəndə nya kepeslekɛ ŋkwa le wəndə nya kewa wəndə nya kemte jikə ta mbeli, kala ghena nyi kegezete geva.

²⁵Katembele wəndə nya kepeslekɛ ŋkwa jikə ta mbeli shave mbe dzeve ta wəndə nya kewa wəndə nya kemte. Katezhɛne ŋkɛ jikə ta mbeli kalə kadzembe meleme kewəfərə nya se ŋkɛ tewəfərə mbe. Katenza ŋkɛ mbe pa te mte ta wəndə kwelea ka dzeghe Shala nya keveyi geva tekeleke laka n'yi keve ŋkwa tekeleke.

²⁶Ama kezlakemte ghala ta meleme kewəfərə nya nza ŋkɛ mbe ŋkɛ,

²⁷nda begeme nde wa wəndə nya kemte le ne, wərə wəndəa shɛ kapeslekɛ ŋkɛ kaɗema fete ta mte ta wəndə ve.

²⁸Kwa nza ŋkɛ ne, mbe meleme kewəfərə nza wəndə nya kepeslekɛ ŋkwa pa te mte wəndə kwelea ka dzeghe Shala. Ma kwa sebe ta mte ta ŋkɛ ne, katezhɛne geva ŋkɛ kadzete hɛɗia ŋkɛ.

²⁹Kaghala ghala tehawe yɛ va ghena nyi, te yayata ŋkwa nya tenza yɛ.

³⁰Ma kepeslekɛ ŋkwa wəndə ne, katepesle ŋkɛ mbeli te ghena ta ka negha fete kwele kwele. Katepesle wəndə mbeli te ghena ta nde negha fete kwetɛŋe we.

³¹Kateyɛ cɛdɛ yɛ kezha mbeɗe mpia wəndə nya kepeslekɛ ŋkwa nya hi mbeli kapesle ŋkɛ we. Ama katepesle ŋkɛ mbeli.

³²Kateyɛ cɛdɛ yɛ ɓiyitsa kezha sərə ŋkɛ kahwɛ kalə kadzembe meleme kewəfərə keɗema kazhɛne geva kase kanza te hɛɗia ŋkɛ, tewə wəndə kwelea ka dzeghe Shala kemte we.

³³Katezhɛre hɛɗi nya tenza nya yɛ te wale wale we. Kwa nza ŋkɛ ne, wəsə nya kezhɛre hɛɗi wale wale pesle ŋkwa. Ma nda nza mbeli kayaɓemte hɛɗi wɛŋe va mimi nya keshekeyi geva te ne, nda mbeli kapeslekɛ wəndə nya keshekeyi mimia shɛ.

³⁴Katezhɛre hɛɗi nya tenza yɛ te, nya tenza 'ya te hwa gheyɛ le ghəa ɗa yɛ wale wale we. Kaganda ne, 'ya ya kaMahwətə, hwa ka Israyɛl nza 'ya.»