Read KapsikiDC Ɓela 4 Bible Online

Ɓela 4 - KapsikiDC bible

Ɓela 4

²«Ma kwa yita ta Lɛvi ne, ɓelate mə ŋwale tezhilia Kɛhat kepelə kepelə ba'a keghɛ keghɛ,

³nyi nza va ta nci se te mahekenemsə hwa'a te mcɛfemsə, pɛtɛa mbeli nyi kenza wərə mene slene mbe cɛ lekwesa kebegeme geva.

⁴Wa nya slene ta ŋwale tezhilia Kɛhat nya mbe cɛ lekwesa kebegeme geva: te dzeve ta nci tenza wəshi nyi keveyi geva tekeleke.

⁵Ma vəa ŋkwa nya slə ka Israyɛl yitea dzeghwa ne, katese yɛ Aron le ŋwalea ŋkɛ kezha pelemte mayafe kenehe ŋkwa nya mbe ŋkwa nya keveyi geva tekeleke. Katedəpə mayafea shɛ hɛ kənəa səndəkwəa jikə geva.

⁶Katepelake hweta nya berete ba'a zlave nya tsate mbeli le shintia təmə nyi kefi fi le yirə kwa ndereme ndereme hɛ kənə. Kwa sebe ta ŋkɛ ne, kateha yɛ geta hɛ kadzembe səndəkwə kezha kele ŋkɛ te.

⁷Katepelake kwete zlave nya tsate mbeli le shintia təmə nyi kefi fi le yirə kwa ndereme ndereme hɛ kənəa tabelea ɗafa nyi kefə nda geva ke Shala. Ma te tabelea shɛ ne, katebete yɛ parantɛ, yɛ kwalekwə, yɛ helape ba'a yɛ jɛŋa kesheke tɛ hɛ. Katebete ɗafa nyi kefə ɗa geva keveci keveci hɛ te perə.

⁸Ma kənəa pɛtɛa wəshia shɛhɛ ne, katepelake zlave nya tsate mbeli le shintia təmə nyi kefi fi le yirə kwa ghɛmɛ ba'a hweta nya berete hɛ. Kwa sebe ta ŋkɛ ne, kateha yɛ geta kadzembe tabelea shɛ kezha kele ŋkɛ te.

⁹Katepelake zlave kwa ndereme ndereme hɛ kənəa wəsə kentare yɛ paterela, yɛ paterela ta ŋkɛ ba'a kweci wəshia ŋkɛ, yɛ mekese, wəshi kefə pəsəɗə ba'a yɛ wəbəzlia n'yi.

¹⁰Katepelake hweta nya berete hɛ kənəa pɛtɛa wəshia shɛhɛ ba'a katebete ŋkɛ hɛ te zelə kezha kele hɛ.

¹¹Katepelake zlave kwa ndereme ndereme hɛ kənəa reghwetɛ mze kwa tere tere. Katepelake hweta nya berete hɛ kənə ba'a kateha yɛ geta hɛ mbe kezha kele ŋkɛ te.

¹²Ma kwa sebe ta ŋkɛ ne, katetsene wəshi kemene slene nyi mbe ŋkwa nya keveyi geva tekeleke hɛ, katepelake zlave kwa ndereme ndereme hɛ kənəa hɛ, katepelake hweta nya berete hɛ kənəa hɛ ba'a katebete hɛ hɛ te zelə.

¹³Katefə pəsəɗə nyi kededənə hɛ same kwa reghwetɛ, katepelake zlave kwa gheme hɛ kənə.

¹⁴Katebete wəshi nyi mene slene mbeli le hɛ vəa ŋkwa nya dzeghe melɛ mbeli hɛ te: wəsə ketere 'wərdə, wəshi kezhɛre sli te ghwə, yɛ pɛlə ba'a yɛ kwenə kesheke mimi. Katepelake hweta nya berete hɛ kənəa pɛtɛa wəshia shɛhɛ ba'a kateha yɛ geta hɛ kadzembe kezha kele ŋkɛ te.

¹⁵Ma vəa ŋkwa nya slə mbeli yitea dzeghwa ne, kase hwelefefia Kɛhat kafə wəshi nyi keveyi geva tekeleke ba'a wəshi nyi te hɛ kaɗema yɛ Aron le ŋwalea ŋkɛ kekiɗimte dəpə hɛ we. Ma tsagha ne, katekwaɗe wəsə nya keveyi geva tekeleke ŋwale tezhilia Kɛhat kata kata yagha hɛ kampə we. Ma kaŋa cɛ lekwesa kabegeme geva ne, te dzeve ŋkɛ va hwelefefia Kɛhat kezha fə wəshi nyi keveyi geva tekeleke mbe.

¹⁶Ma Ɛlazar, wəzege ta nde dzeghe Shala Aron ne, gheŋkɛ ya te ghəa n'yi kegə kwa yɛ paterela, 'wərdə ketere, wəshi nyi kese te wəve nyi fə mbeli kase keveci keveci ba'a n'yi keve ŋkwa tekeleke. Gheŋkɛ nde tenza te ghəa cɛ lekwesa nya keveyi geva tekeleke ba'a wəshi nyi mbe, tsagha wəshi nyi keveyi geva tekeleke ba'a wəshia nci.»

¹⁷Ma ke Mahwətə sha yɛ Moyize le Aron zhɛkwa:

¹⁸«Newe mə ghweme te hwelefefia Kɛhat hwa kweci ka Lɛvi.

¹⁹Ma kezha ɗema hɛ kampə vəa ŋkwa nya hendave nda geva hɛ ke ŋkwa nya keveyi geva tekeleke ne, wa nya tsetse mene nda yɛ ke hɛ: Katese yɛ Aron le ŋwalea ŋkɛ kave yayata wəndəa nci kwa kema ta slene ta ŋkɛ keɗema kwa kema ta wəsə nya tekele ŋkɛ.

²⁰Ma tsagha ne, kalə hɛ kanewe wəshi nyi keveyi geva tekeleke ya kavə ɓɛhwɛ, kaɗema hɛ kampə we.»

²¹Ma ke Mahwətə sha Moyize:

²²«Ɓelate ŋwale tezhilia Gɛrshon keghɛ keghɛ ba'a kepelə kepelə.

²³Katerafe sləa zhili nyi nza va ta nci se te mahekenemsə hwa'a te mcɛfemsə na, pɛtɛa mbeli nyi kenza wərə mene slene mbe cɛ lekwesa kebegeme geva.

²⁴Wa nyi wəshi nyi mene ba'a nyi fə hwelefefia Gɛrshon nyi:

²⁵katekele zlave nya kənəa cɛ lekwesa nya keveyi geva tekeleke hɛ, geze ta ŋkɛ kwa bake ta zlave nya kənə, tsagha wəsə nya kənə nya le hweta ta gamea lɛmə, wəsə nya kənə nya le hweta nyi berete berete, mayafe nya mɛa ŋkwa kedzembe cɛ lekwesa kebegeme geva,

²⁶zlave nyi dzeyi yitea ŋwela nya yitea cɛ lekwesa kebegeme geva ba'a reghwetɛ, mayafe nya mɛa ŋkwa kedzeki ŋwela, tsagha yɛ zewe ta ŋkwa nya dzeyi yitea ŋwela ba'a pɛtɛa kweci wəshia nci. Katemene pɛtɛa slene ta wəshi nyi hɛ.

²⁷Ma wəshi nyi temene ba'a nyi tekele ŋwale tezhilia Gɛrshon ne, va yɛ Aron le ŋwalea ŋkɛ tefa hɛ hɛ. Ghenci ka tegeze nda wəshi nyi temene hɛ ba'a nyi tefə hɛ ke hɛ.

²⁸Nya ya kaslene nya mene hwelefefia Gɛrshon mbe cɛ lekwesa kebegeme geva. Itamar, wəzege ta nde dzeghe Shala Aron nde tenza te ghəa nci.»

²⁹Ɓelate ŋwale tezhilia Merari kepelə kepelə ba'a keghɛ keghɛ perə.

³⁰Katerafe sləa zhili nyi nza va ta nci se te mahekenemsə hwa'a te mcɛfemsə na, pɛtɛa mbeli nyi kenza wərə mene slene mbe cɛ lekwesa kebegeme geva.

³¹Wa nyi wəshi nyi tefə hɛ mbe cɛ lekwesa kebegeme geva nyi: sheghwə nyi slapesla slapesla, sheghwə nyi kejive mbe, yɛ selə ba'a wəshi kentare hɛ,

³²selə nyi dzeyi yitea ŋwela ba'a wəshi kentare hɛ, wəshi nyi baŋe mbeli kwa hɛɗi ba'a yɛ zewe, tsagha kweci wəshi nyi mene slene hɛ le hɛ. Kateɓela nda wəshi nyi tekele yayata wəndə ka dzeghe Shala ke yayata wəndəa nci.

³³Nya ya kaslene ta hwelefefia Merari mbe cɛ lekwesa kebegeme geva. Itamar, wəzege ta nde dzeghe Shala Aron nde tenza te ghəa nci perə.

³⁴Pa Moyize, Aron ba'a mbeli nyi te ghəa ka Israyɛl rafete sləa ŋwale tezhilia Kɛhat kepelə kepelə ba'a keghɛ keghɛ,

³⁵pɛtɛa zhili nyi nza va ta nci se te mahekenemsə hwa'a te mcɛfemsə, nyi kenza wərə mene slene mbe cɛ lekwesa kebegeme geva.

³⁶Ma pɛtɛa mbeli nyi rafete geva sləa nci kepelə kepelə hwa hɛ ne, mbeli 2.750.

³⁷Nyi ya kambeli nyi rafete geva sləa nci hwa ŋwale tezhilia Kɛhat, pɛtɛa mbeli nyi kemene slene mbe cɛ lekwesa kebegeme geva. Pa yɛ Moyize le Aron rafete sləa nci kala nya gezave nda Mahwətə ke Moyize.

³⁸Ma mbeli nyi rafete geva sləa nci hwa ŋwale tezhilia Gɛrshon kepelə kepelə ba'a keghɛ keghɛ,

³⁹pɛtɛa mbeli nyi nza va ta nci se te mahekenemsə hwa'a te mcɛfemsə, nyi kenza wərə mene slene mbe cɛ lekwesa kebegeme geva ne,

⁴⁰mbeli 2.630 yarafete geva sləa nci kepelə kepelə ba'a keghɛ keghɛ.

⁴¹Nyi ya kambeli nyi rafete geva sləa nci hwa ŋwale tezhilia Gɛrshon, pɛtɛa mbeli nyi kemene slene mbe cɛ lekwesa kebegeme geva. Pa yɛ Moyize le Aron rafete sləa nci kala nya gezave nda Mahwətə ke Moyize.

⁴²Ma mbeli nyi rafete geva slə hwa ŋwale tezhilia Merari kepelə kepelə ba'a keghɛ keghɛ,

⁴³pɛtɛa mbeli nyi nza va ta nci se te mahekenemsə hwa'a te mcɛfemsə, nyi kenza wərə mene slene mbe cɛ lekwesa kebegeme geva ne,

⁴⁴mbeli 3.200 yarafete geva sləa nci kepelə kepelə.

⁴⁵Nyi ya kambeli nyi rafete geva sləa nci hwa ŋwale tezhilia Merari. Pa yɛ Moyize le Aron rafete hɛ kala nya gezave nda Mahwətə ke Moyize.

⁴⁶Ma pɛtɛa ka Lɛvi nyi rafete Moyize, Aron ba'a mbeli nyi te ghəa ka Israyɛl kepelə kepelə ba'a keghɛ keghɛ,

⁴⁷pɛtɛa mbeli nyi nza va ta nci se te mahekenemsə hwa'a te mcɛfemsə, nyi kenza wərə mene slene ta mɓe ba'a fə ta cɛ lekwesa kebegeme geva ne,

⁴⁸mbeli 8.580 yarafete geva sləa nci.

⁴⁹Kala nya gezave nda Mahwətə ke Moyize ne, pa mbeli rafete sləa nci laka ncɛ nda wəsə nya mene ŋkɛ ba'a nya kele ŋkɛ ke yayata wəndə. Slene nya gezave nda Mahwətə ke Moyize ya te dzeve va yayata wəndə.