Read KapsikiDC Ɓela 5 Bible Online

Ɓela 5 - KapsikiDC bible

Ɓela 5

¹Ma ke Mahwətə sha Moyize:

²«Geze nda ke ka Israyɛl kaŋka mbeli nyi wale wale shave mbe ghedəkwə: mbeli nyi shewə va derena, va gezhɛkɛni keɗema mbeli nyi kekwaɗakɛ wəndə kemte mte.

³Ya gheŋkɛ nza kaza keɗema male ne, kateŋka hɛ yɛ shave mbe ghedəkwə. Kateŋkamte hɛ yɛ yagha hɛ kazhɛrete ghedəkwəa ka Israyɛl nya nza 'ya mbe hwa hɛ wale wale.»

⁴Pa ka Israyɛl menete slene le ghena nya gezave nda Mahwətə ke Moyize. Pɛtɛ hɛ ŋkamte mbeli nyi wale wale shave mbe ghedəkwə.

⁵Ma ke Mahwətə sha Moyize:

⁶«Ma pa na sha ka Israyɛl: Ma kebezemte nda ghena za keɗema male ke Mahwətə laka mene kwete hwa jaɗafa nyi mene wəndə ŋelɛ ne, nahe wəndəa shɛ kemenete fete.

⁷Katencɛ jaɗafa nya menete ŋkɛ ŋkɛ. Kwa sebe ta ŋkɛ ne, katezhɛne nda wəsəa ŋkɛ ŋkɛ ke wəndə ke wəsə ba'a katemtsehe kwa mcɛfe ta bela ta zləvəa wəsəa shɛ ŋkɛ yite.

⁸Ma kenza nde nahe wəndə ke wəsə kemte ba'a kaɗema menə nya dekwe shɛ kezha kele wəsəa shɛ ne, kateve nda wəsəa shɛ mbeli ke Mahwətə, geze ta ŋkɛ, ke nde dzeghe Shala. Pa wəndə nya kemenete fetea shɛ zhɛne kakeleke game kedzeghe melɛ kedimə ghə kezha ɓelate gəsəkə kelemte jaɗafa nde dzeghe Shala kezha gheŋkɛ.

⁹Ma yayata wəsə nya kelemte ka Israyɛl seyi kənəa wəshi nyi fə hɛ kase ne, kaŋa nde dzeghe Shala nza ŋkɛ.

¹⁰Ma vəa ŋkwa nya ve nda wəsə wəndə ke Mahwətə ne, ke nde dzeghe Shala ve nda ŋkɛ. Ma wəsə nya ndeke nda wəndə ke nde dzeghe Shala ne, kaŋa nde dzeghe Shala shɛ nza ŋkɛ.»

¹¹Ma ke Mahwətə sha Moyize:

¹²«Ma pa na sha ka Israyɛl: Wərə kamenete geva kanza male ta wəndə kamene wəsə kwa ndiremi laka mene vale tahe.

¹³Ma kenza kwete wəndə kaɓelahe le ghenta kaɗema za nta keɗepe, ma kezhɛrete ghəa nta nde wale wale tewəfərə kaɗema kwete wəndə kenakɛ ŋkɛ ba'a kaɗema mbeli kekeseve ŋkɛ,

¹⁴ma kezhɛte nda zlɛ ke za shɛ ba'a kenza ghəa ŋkɛ tsəmə tsəmə va male ta ŋkɛ, nda nahe nde kekelemte zləvə te ghəa nta, keɗema ne, ma kezhɛte nda zlɛ ke za shɛ ba'a kenza ghəa ŋkɛ tsəmə tsəmə va male ta ŋkɛ, nda kaɗema nde kekelemte zləvə te ghəa nta ne,

¹⁵tagha gɛ, katekele nda male ta ŋkɛ wəndəa shɛ ke nde dzeghe Shala ba'a katekele hə ta megi ŋkɛ kase kakiləwə mahekene kezha ghenta. Katesheke n'yi ba'a kateve 'wərdə kwa hə hə ŋkɛ kənə we. Kwa nza ŋkɛ ne, wəsə gəməa zlɛ nde. Va nya ɗe za male kaɗepete fete kele wəsəa shɛ ŋkɛ kase.

¹⁶Katehende malea shɛ nde dzeghe Shala kase kezha ghereŋe nde kwa kema ta Mahwətə.

¹⁷Kategə yɛmə nya keveyi geva tekeleke nde dzeghe Shala same kwa ghwelepe. Katenta hɛɗi nya mbe cɛ lekwesa nya keveyi geva tekeleke ŋkɛ kezha bete hwa yɛməa shɛ.

¹⁸Kateghereŋe malea shɛ nde dzeghe Shala kwa kema ta Mahwətə. Kapele shintia ghəa nta ŋkɛ ba'a kateve wəsə gəmə kencɛ fete ŋkɛ mbe dzeve ta nta, geze ta ŋkɛ, wəsə gəməa zlɛ, vəa ŋkwa nya tenza yɛmə kwa 'yaghwa nya kekele bezla kase mbe dzeve ta ŋkɛ.

¹⁹Ma ke nde dzeghe Shala sha tegeze nda ke malea shɛ kazeme fela: ‹Ma kenza ŋkɛ kaganda ɗema kwete wəndə keɓelahehwe ɓelahe le gha, ɗema na kemenete wəsə kwa ndiremi ba'a ɗema na kekelemte zləvə te ghəa ŋa laka ghwete za ŋa ne, mba bezla nya hwa yɛmə kwa 'yaghwa nya kekese ŋa.

²⁰Ama kenza ŋkɛ kaganda kelemte zləvə na te ghəa laka ghwete za ŋa, ma kenza ŋkɛ nahe kwete wəndə keɓelahehwe ɓelahe le gha ne,

²¹zhɛrete ŋa Mahwətə kajɛŋa ba'a zleŋəte ŋa hwə ŋkɛ kezha kele ŋa ka menəhɛ kaghena keyipə pa kenza hɛ kabezla ŋkwa te tepe ta mbeli.

²²Dzawa hwəa ŋa yɛmə nya kekele bezla nya kase kezha zleŋə ŋa hwə ba'a kezha zhɛre ŋa kajɛŋa.› Ma ke malea shɛ sha tezhɛne: ‹E'e, menete geva ŋkɛ tsagha!›

²³Katerafe ghena ta bezla ŋkwa shɛhɛ nde dzeghe Shala, kwa sebe ta ŋkɛ, kateyaɓe ghena shɛhɛ ŋkɛ hwa yɛmə kwa 'yaghwa.

²⁴Katesa nda yɛmə kwa 'yaghwa nya kekele bezla kase ŋkɛ ke malea shɛ. Katedzawa hwəa nta yɛməa shɛ kezha zhɛre ŋkwa nya kwa 'yaghwake.

²⁵Katekele wəsə gəməa zlɛ nya mɛa dzeve va malea shɛ nde dzeghe Shala, kateve nda ŋkɛ ŋkɛ ke Mahwətə laka ɓela gəsəkəa ve nda wəsə ba'a katekele ŋkɛ ŋkɛ kase kadzete reghwetɛ.

²⁶Katenta həa shɛ ŋkɛ demake mbe dzeve ‹kawəsə kezəzə› kezha tere te reghwetɛ. Ma kwa sebe ta ŋkɛ ne, katesa nda yɛməa shɛ ŋkɛ ke malea shɛ.

²⁷Ma vəa ŋkwa nya tesahwe ŋkɛ ne, wa nya wəsə nya ketemene geva nya: ma kenza ŋkɛ kaganda kelemte zləvə nde te ghəa nta laka ghwete za ne, katedzawa hwəa nta yɛmə nya kekele bezla kase kezha zhɛre ŋkwa nya kwa 'yaghwake. Katezleŋə hwəa nta ba'a katezhɛre nde kajɛŋa. Tagha gɛ, katekele ŋkɛ ka menəhɛ nta kaghena keyipə pa kenza hɛ kabezla ŋkwa te tepe ta mbeli.

²⁸Ama keɗema malea shɛ kekelemte zləvə te ghəa nta, ma kenza nde wɛŋe ne, katekese ŋkɛ bezla we. Kateya ŋwale nde.»

²⁹Nya ya kaghena nya kegeze geva te ghəa zlɛ, kezha male nya kemenete wəsə kwa ndiremi laka ghwete za nta ba'a nya kezhɛrete ghəa nta wale wale.

³⁰Tsagha ghena shɛ perə kaŋa wəndə nya kezlɛ, va nya nza ghəa ŋkɛ tsəmə tsəmə va male ta ŋkɛ. Kateghereŋe male ta ŋkɛ ŋkɛ kwa kema ta Mahwətə ba'a kateɓela pɛtɛa gəsəkəa ghena shɛ nde dzeghe Shala kənə.

³¹Fete shɛ kateve nda mbeli ke za we. Ama male nde tefa ghwene nya mbe fete ta nta.