Read KapsikiDC Ɓela 7 Bible Online

Ɓela 7 - KapsikiDC bible

Ɓela 7

¹Ma te veci nya kiɗimte mɓe ta cɛ lekwesa nya keveyi geva tekeleke Moyize ne, pa ŋkɛ veyi ŋkɛ le wəshi nyi mbe tekeleke laka sheke n'yi kənəa hɛ. Kwa sebe ta ŋkɛ, pa ŋkɛ veyi yɛ reghwetɛ le wəshia ŋkɛ tekeleke le n'yi perə.

²Tagha gɛ, pa mbeli nyi te ghəa hwelefefia Israyɛl fəke ŋa nci wəshi gəmə. Ghenci ya kambeli nyi te ghəa hwelefefi nyi kese kaɓela ŋkwa.

³Pa hɛ fəke nda ŋa nci wəshi gəmə ke Mahwətə: wəmata sla ŋkwaŋe ba'a mcɛmcɛli meŋe bakeghəmbe, geze ta ŋkɛ, wəmata sla kwetɛŋe te mbeli nyi te ghə bake ba'a mca kwetɛŋe te yayata wəndəa nci. Pa hɛ fəke hɛ kase kadzemɛa cɛ lekwesa kebegeme geva.

⁴Ma ke Mahwətə sha Moyize:

⁵«Yɛte wəshi gəməa nci nyi, yitea mene slene mbeli le hɛ kezha cɛ lekwesa kebegeme geva. Katefə nda hɛ na ke ka Lɛvi, ke yayata wəndəa nci kala slene ta ŋkɛ.»

⁶Pa Moyize fəte yɛ wəmata sla ba'a mcɛmcɛlia shɛhɛ. Pa ŋkɛ fəave nda hɛ ke ka Lɛvi.

⁷Pa ŋkɛ nta nda wəmata sla bake ba'a mcɛmcɛli wəfaɗe ke hwelefefia Gɛrshon kala nza ta slene ta nci.

⁸Ma wəmata sla nyi wəfaɗe ba'a mcɛmcɛli nyi deghese nyi ketene ne, pa ŋkɛ fəave nda hɛ ke hwelefefia Merari nya nza Itamar, wəzege ta nde dzeghe Shala Aron te ghəa nci, kala nza slene ta nci.

⁹Kese ŋkɛ kanta nda hɛ ke hwelefefia Kɛhat we, kwa nza ŋkɛ ma slene ta nci ne, kele wəshi nyi keveyi geva tekeleke te bazla ta nci.

¹⁰Pa mbeli nyi te ghə fəke wəshi gəmə kezha ve ta reghwetɛ tekeleke te veci nya shekaghe n'yi mbeli kənə. Pa hɛ fəke wəshi gəməa nci kase kadzawa kema ta reghwetɛ.

¹¹Ma ke Mahwətə sha Moyize: «Katese mbeli nyi te ghə kwetɛŋe zhigə mbe vəghwə le ŋa nci wəshi gəmə kezha ve ta reghwetɛ tekeleke.»

¹²Wa nya tsetse tese hɛ: Ma te kwa ghate ta hɛ ne, Nashon, wəzege ta Aminadab, kwa yita ta Zhəwda nde fə ŋa ŋkɛ wəshi gəmə kase. Ma te kwa bake ta hɛ ne, Netanɛyɛl, wəzege ta Səwar, kwa yita ta Isakar nde fə ŋa ŋkɛ kase. Ma te kwa mahekene ta hɛ ne, Ɛliyab, wəzege ta Hɛlon, kwa yita ta Zabəlon nde fə ŋa ŋkɛ kase. Ma te kwa wəfaɗe ta hɛ ne, Ɛlisəwr, wəzege ta Shedɛwər, kwa yita ta Rəbɛn nde fə ŋa ŋkɛ kase. Ma te kwa mcɛfe ta hɛ ne, Sheləwmiyɛl, wəzege ta Səwrishaday, kwa yita ta Simɛyon nde fə ŋkɛ kase. Ma te kwa ŋkwaŋe ta hɛ ne, Ɛliyasaf, wəzege ta Dɛwəyɛl, kwa yita ta Gad nde fə ŋkɛ kase. Ma te kwa mberefaŋe ta hɛ ne, Ɛlishama, wəzege ta Amihəwd, kwa yita ta Ɛfrayim nde fə ŋkɛ kase. Ma te kwa deghese ta hɛ ne, Gamliyɛl, wəzege ta Pedasəwr, kwa yita ta Manasɛ nde fə ŋkɛ kase. Ma te kwa mesli ta hɛ ne, Abidan, wəzege ta Gidoni, kwa yita ta Bɛnjamɛn nde fə ŋkɛ kase. Ma te kwa meŋe ta hɛ ne, Ahiyɛzɛr, wəzege ta Amishaday, kwa yita ta Dan nde fə ŋkɛ kase. (...)

⁸⁴Ma pɛtɛa wəshi gəmə nyi fəke mbeli nyi te ghəa ka Israyɛl vəa ŋkwa ve ta reghwetɛ tekeleke ne, wa nyi nza ta nci nyi: parantɛ mze kwa tɛawetɛa meŋe bakeghəmbe, kwenə mze kwa tɛawetɛa meŋe bakeghəmbe ba'a helape mze kwa tere tere meŋe bakeghəmbe.

⁸⁵Ma yayata parantɛ mze kwa tɛawetɛa ne, kiləwə kwetɛŋe ba'a kagwəmsə mahekene kwa slibə ta bela ta kiləwə ɗaŋeɗa ta ŋkɛ. Ma yayata kwenə mze kwa tɛawetɛa ne, kagwəmsə mberefaŋe kwa slibə ta bela ta kiləwə ɗaŋeɗa ta ŋkɛ. Ma pɛtɛa nci ne, kiləwəa mze kwa tɛawetɛa bakemsə wəfaɗeghəmbe ɗaŋeɗa ta nci, kala wəsə kedzeghe wəshi nya mbe ŋkwa nya keveyi geva tekeleke.

⁸⁶Ma yayata helape mze kwa tere tere ne, kagwəmsə kwa slibə ta bela ta kiləwə ɗaŋeɗa ta ŋkɛ. Ma helape nyi meŋe bakeghəmbe nyi ne, kiləwə kwetɛŋe ba'a kagwəmsə bake kwa slibə ta bela ta kiləwə ɗaŋeɗa ta nci. Pɛre pɛre hɛ va 'wərdə kezha tere.

⁸⁷Mcɛmcɛli meŋe bakeghəmbe, gamea lɛmə meŋe bakeghəmbe ba'a zhɛgwəa lɛməa timɛti nyi same meŋe bakeghəmbe ya shɛ kezha dzeghe melɛ kwa tere tere, zlaɓe le wəshi nyi kese te wəve nyi yitea hɛ. Zhɛfa lɛmə meŋe bakeghəmbe ya shɛ perə kezha dzeghe melɛ keyaɓe jaɗafa.

⁸⁸Mcɛmcɛli bakemsə wəfaɗeghəmbe, gamea lɛmə ŋkwaŋemsə, zhɛfa lɛmə ŋkwaŋemsə, zhɛgwəa lɛməa timɛti nyi same va ŋkwaŋemsə ya shɛ kezha dzeghe melɛ nya kejikə ghə. Tsetse wəshi gəmə nyi kefəke geva kezha gəsəkəa reghwetɛ, kwa sebe ta ve ta ŋkɛ tekeleke.

⁸⁹Ma vəa ŋkwa dzembe cɛ lekwesa kebegeme geva Moyize kezha geze ghena le Mahwətə ne, kafefa ŋwələa ŋkɛ ŋkɛ kənəa wəsə keŋzle səndəkwə, dzawa kwelɛ ka shɛrəbɛŋe nyi bake te wəsə keŋzle səndəkwəa jikə geva. Tagha gɛ, ntake ŋkɛ kageze nda ghena.