Read KapsikiDC Mishɛ 1 Bible Online

Mishɛ 1 - KapsikiDC bible

Mishɛ 1

¹Ghena nya gezete nda Mahwətə ke Mishɛ nya kande Morɛshɛt, te vəa Yotam, Ahaz ba'a Ɛzɛkiyas, ka meghea kɛfia ka Zhəwda. Wa nyi wəshi nyi ncɛte nda ŋkɛ te ghəa yɛ Samari le Zhɛrəzalɛm nyi.

²Fa mə, gheyɛ mbeli pɛtɛ. Ntsehwele mə, gha hɛɗi le wəshi nyi te gha. Shala Mahwətə katesla ghena te gheyɛ sawa pelɛ ŋkwa nya keveyi nda geva tekeleke.

³Kaganda ne, wa nya Mahwətə keshave mbe ŋkwa kenza ta ŋkɛ. Kasawa ŋkɛ, kadzeghwa ŋkɛ pelɛ ghəa wəmbə nyi te hɛɗi.

⁴Kadedase yɛ ghweme mbe hwə seɗa ta ŋkɛ, kanɛnɛa ŋkwa nyi kwelɛ yɛ zlərə kala ɗəkə va ghwə, kala yɛmə nya kehwɛ dzawa vare wəmbə.

⁵Ma nda mene geva wəshi nyi pɛtɛ ne, va fama ghena ta hwelefe ta Zhakob, va jaɗafa ta ka Israyɛl. Wa nde tsəkwə Zhakob yitea fama ghena wa? Ashɛ Samari wəka? Wa nde tsəkwə Zhəwda kahawe va kweci shala wa? Ashɛ Zhɛrəzalɛm wəka?

⁶Ma ke Shala: «Tewəmbəreke wəsə nya ne, 'ya katezhɛre Samari kakwəfi, kawəve nya temɓe rɛzɛŋe mbeli te. Katetsetsəkwə yɛ pelɛa ŋkɛ 'ya kadzawa zlərə, dedeghərə teve yɛ shihəa ŋkɛ 'ya te ŋwela.

⁷Pɛtɛ tempəmte geva wəshi nyi zhɛrete ŋkɛ kashala, pɛtɛ tebete geva wəshi gəmə nyi kemave ŋkɛ mbe ghwə. Katenzenzere wəshi nyi zhɛrete ŋkɛ kashala 'ya. Ma kwa nza ŋkɛ le meleɓe ta yɛ mene mefətekwəa ŋkɛ tsenete wəshia shɛhɛ ŋkɛ ne, kameleɓe ta mene mefətekwə tenza hɛ perə.»

⁸'Ya Mishɛ ne, 'ya kateŋgaɗe ghə ba'a kateŋələvə. 'Ya katedzeghwa kaɗema tsahwa mbe seɗa ba'a mederelaŋe. Kala kelɛ gamba tembɛahwɛ 'ya, kala zhenɛgə tenehwene 'ya.

⁹Kwa nza ŋkɛ kampi zhi nya te Samari we, pa te Zhəwda dzete ŋkɛ, pa te mɛ degha nyi te Zhɛrəzalɛm nya nza mbelia ɗa ntsehe ŋkɛ.

¹⁰Mba yɛ kezlape mbe Gat. Mba yɛ kenehwene mbe Ako. Mbe Bɛt-Lɛyafra ne, devələ mə geva dzate hwa keləwə.

¹¹Mbeli nyi mbe Shafir, kele mə seɗa kadzete kwete hɛɗi le hawe ba'a mederelaŋe. Kazhɛne mbeli nyi mbe Sa'anan kashave mbe meleme ta nci we. Ghə yaŋgaɗe mbeli nyi mbe Bɛt-Ɛsɛl. Mba melemea shɛ kakemanakɛ ŋayɛ we.

¹²Heha yaheha mbeli nyi mbe Marot yitea wəshia nci. Kwa nza ŋkɛ ne, nahe ndiremi nya ghweneke Mahwətə kentsehe te mɛ degha nyi te Zhɛrəzalɛm.

¹³Ma gheyɛ mbeli nyi mbe Lakish ne, hwepe mə yɛ gədəwə yitea wəmata. Nahe yɛ ketekeve fama ghena ta ka Israyɛl, nahe ka Zhɛrəzalɛm ketekeve jaɗafa ta ŋayɛ perə.

¹⁴Vatse hi yɛ kanehe geva le ka Morɛshɛt-Gat. Katekemanakɛ ka meghea ka Israyɛl meleme ta Akzib we.

¹⁵Mbeli nyi mbe Marɛsha, kateghwene ŋayɛ nde ghema 'ya. Dzeyi mbe zlera ta Adəwlam tewəfərə mbeli nyi te ghə nyi nza zləvə te mbe Israyɛl.

¹⁶Ŋkwətsə mə shintia ghəa ŋayɛ, ŋsə mə ghə dɛrɛŋe rɛŋe kala ghəa zleŋa yitea ŋwale nyi ɗehwe yɛ. Kwa nza ŋkɛ ne, katefəmte geva hɛ cakeɗake le gheyɛ.