Read KapsikiDC Mishɛ 3 Bible Online

Mishɛ 3 - KapsikiDC bible

Mishɛ 3

¹Yawa, ma 'ya sha gheyɛ: «Fa mə ghena ta ɗa, gheyɛ mbeli nyi te ghəa ghɛa Zhakob, gheyɛ ka meha ghwə nyi te ghəa ka Israyɛl. Ashɛ gheyɛ ka hi kaɗepe wəsə nya tiɗiɗi wəka?

²Ama pa yɛ ɗema wəsə nya ganyɛ yitea nya ndiremi, pa yɛ kwaɓemte hweta seyi te mbeli ba'a pasemte sli seyi te 'yɛ'yɛa nci.»

³Kaganda ne, slia mbelia ɗa yazeme hɛ, hweta yakwaɓe hɛ seyi kənəa hɛ, 'yɛ'yɛa nci yampə hɛ, kasleslave hɛ mbe kala sli kwa shaga.

⁴Vatse gɛ, ma ketetsave nda lewela hɛ ke Mahwətə ne, katezhɛne nda ŋkɛ ke hɛ we. Katewəfərə kema ta ŋkɛ ŋkɛ va hɛ te vəa shɛ, va wəshi nyi ndiremi ndiremi nyi menete hɛ.

⁵Wa nya ghena nya geze Mahwətə te ghəa ka mɛ ŋkwa nyi keghwete mbelia ŋkɛ nya: «Ma kezehwe nda wəshi kezeme mbeli megela ke hɛ ne, kwelɛŋe ya shɛ ke hɛ sha geze. Ama ma ke mbeli nyi kezehwe nda ma wəshi kezeme ke hɛ ne, mpa yaha nda hɛ.

⁶Vatse gɛ, heviɗi tenza ŋkwa sha gheyɛ ka mɛ ŋkwa, wəsə shɛ katezhɛne yɛ kanakɛ we. Ŋkwesle nde tenza kənəa gheyɛ, katezhɛne yɛ kaɗepe wəsə nya ketemene geva we. Rayɛ teza ŋayɛ za veci, zhikwətəkwə tenza ŋkwa kənəa gheyɛ.»

⁷Hawe nde tenza te ka ŋa zlera ba'a ka mene ghwɛ. Pɛtɛ tedəpə kema ta nci hɛ, kwa ɗema Shala mba kazhɛne nda ghena ke hɛ.

⁸Ma 'ya le ŋa ɗa te zlaɓa ta sefəa Mahwətə ne, kwele kwele berete, kaganda ba'a hwepe ghə va 'ya kezha ncɛ nda fama ghena ta ŋkɛ ke ghɛa Zhakob, jaɗafa ta nci ke ka Israyɛl.

⁹Fa mə ghena nya, gheyɛ mbeli nyi te ghəa ghɛa Zhakob, gheyɛ ka meha ghwə nyi te ghə ka Israyɛl. Nahe yɛ keɗema kaganda ba'a ketələmte wəsə nya tiɗiɗi.

¹⁰Pa yɛ ŋate Siyon le mpə ŋkwa ba'a Zhɛrəzalɛm le beze ghena.

¹¹Te wəshi gəmə meha ghwə ka meha ghwə, te zhɛme teke nda wəshi mahalegə ka dzeghe Shala ke mbeli, te cɛdɛ geze wəshi nyi ketemene geva ka mɛ ŋkwa. Ya tsagha shɛ ŋkɛ ne, te Mahwətə dɛŋe geva hɛ. Ma ke hɛ sha geze: «Ashɛ hwa gheɓəmə Mahwətə wəka? Katekekave ɓəmə ndiremi we.»

¹²Vatse gɛ, kawəve kwa wəza wəza tezhɛre Siyon, kakwəfi tenza Zhɛrəzalɛm ba'a katigə tenza ghweme ta ghɛa Shala tewəmbəreke gheyɛ.