Read KapsikiDC Mishɛ 5 Bible Online

Mishɛ 5 - KapsikiDC bible

Mishɛ 5

¹Ma ke Shala: «Gha Bɛtelɛhɛm Ɛfrata, meleme nya ɓɛhwɛ na hwa meleme nyi mbe Zhəwda. Ama shave mbe gha tekele wəndə nya ketesleke ka Israyɛl te sləa ɗa 'ya, shave mbe hwelefe nya vəashi.»

²Katewəfə mbelia ŋkɛ Shala pa te və nya teya wəzege teza male. Ma mbeli nyi ketetene teghweme hwa mbeli nyi fəhwe mbeli ne, katese hɛ kajikə geva le kweci ka Israyɛl.

³Ma wəndə nya te ghəa shɛ ne, katesate ŋkɛ meslete kaya wəshia ŋkɛ laka berete ta Mahwətə, laka kwelea Shala Mahwətə ta ŋkɛ. Gwezlayɛ tenza hwelefe ta ŋkɛ, kwa nza ŋkɛ ne, pa te mendɛkwe ta hɛɗi tenza berete ta ŋkɛ.

⁴Gheŋkɛ nde teve nda kwelɛŋe ke mbeli. Ma ketese ka Asiri kaɗa hɛɗia ɓəmə ba'a kadzeki ghɛa ka meghea kɛfia ɓəmə ne, kateghwene nda mbeli nyi te ghə gheɓəmə kwele kwele ke hɛ.

⁵Le kafayɛa nci ne, kateɗa Asiri, hɛɗia Nɛmrod hɛ, kateve ŋkɛ hɛ mbe seɗa ta nci. Ama wəndə nya te ghəa shɛ nde tembele ɓəmə va ka Asiri kedzembe hɛɗia ɓəmə hɛ ba'a kezlakemte ghala ta ɓəmə hɛ.

⁶Ma ka Israyɛl nyi ketene teghweme hwa hwelefefi kwele kwele ne, katenza hɛ kala mɛnɛ nya kese va Mahwətə, kala va nya keme te gwəzə kaɗema ka'yɛwe kwete wəsə va wəndə ŋelɛ ba'a kaneghe kwete wəsə va mbeli.

⁷Ma ka Israyɛl nyi ketene teghweme hwa hwelefefi kwele kwele ne, kambeli nyi berete berete tenza hɛ kala nivɛrə hwa wəshi keseɗa nyi hwa gamba, kala wəzege ta nivɛrə hwa timɛti. Ma te yayata ŋkwa nya lə nde ne, kakese wəshi ŋkɛ ba'a kaslekwe hɛ ŋkɛ. Wəndə shɛ kambeleke hɛ ve we.

⁸Ka Israyɛl, ɗa mə ka ghema ta ŋayɛ, za mə sebe te hɛ pɛtɛ!

⁹Ma ke Mahwətə: «Wa nya wəsə nya ketemene geva te vecia shɛ nya: mɛke teza sebe 'ya te yɛ gədəwəa ŋayɛ, kateza yɛ wəmata gədəwəa ŋayɛ 'ya.

¹⁰Kateŋzla meleme nyi te hɛɗia ŋayɛ 'ya, katempə zli nya yitea meleme ta ŋayɛ 'ya pɛtɛ.

¹¹Pɛtɛ teza sebe 'ya te ka mene ghwɛ hwa gheyɛ, katezhɛne mbeli kasləyi nde ka ŋa zlera hwa gheyɛ we.

¹²Kateza sebe 'ya te wəshi nyi zhɛrete yɛ kashala ba'a te yɛ gɛaŋa ta ŋayɛ. Katezhɛne yɛ kahawe va wəshi nyi menete yɛ le dzeve ta ŋayɛ we.

¹³Katenteɗe selə nyi mɓete yɛ ba'a kateŋzla yɛ meleme ta ŋayɛ 'ya.

¹⁴Kwa sebe ta ŋkɛ ne, katewa dewa 'ya le wənə le wənə te hwelefe nyi keɗema kayɛ ɗa fete.»