Read KapsikiDC Mishɛ 7 Bible Online

Mishɛ 7 - KapsikiDC bible

Mishɛ 7

¹Aya ndiremi 'ya! Kala wəndə nya kedzemte kanda ya ta rɛzɛŋe vəa ŋkwa nda ta ŋkɛ kaɗema wəsə te 'ya. Kesləyi rɛzɛŋe ŋkɛ ya kwetɛŋe kezha zeme, ya kwa ghate ta ya ta dasekwa nya mawe ŋkɛ we.

²Nahe ka ganjia mehele kezanji te hɛɗi, mba wəndə nya tiɗiɗi shɛ te we. Pɛtɛa nci ɗeke ɗeke yitea mpə ŋkwa. Yayata wəndə kaŋa nda keleŋa ke nde ghedəkwəa ŋkɛ.

³Wəsə kwa ndiremi yamene dzeve ta nci. Kezha mene wəsə kwa ganyɛ ne, nda mbeli kaɗave nda wəshi ke mbelia jama, wəshi gəmə ya'yɛwe ka meha ghwə, dazhɛ dazhɛ geze wəshi nyi ɗe hɛ mbeli nyi nza zləvə te. Pa hɛ jikəte mɛ kezha mene wəsə kwa ndiremia nci.

⁴Ma wəndə nya ganyɛ ma hwa hɛ ne, kala tigə kwara nya ken'yi ŋkwa ŋkɛ, ndiremi ma ke hwele wəndə nya tiɗiɗi. Wa nya vecia ɗa ta ŋayɛ nya zlapete ka newe ŋayɛ ŋkwa mɛa ghweme nyi kaka mɛ ŋkwa nya kase. Kwetɛ kwetɛŋe mehele ta ŋayɛ tsetsenya.

⁵Vema ghə yɛ te ka ghedəkwəa ŋayɛ ma, ndeke nda ma mehele yɛ ke ka mcɛhɛ ŋayɛ ma. Ntsehwele mə yitea geze ghena ya kwa kema ta mia ŋayɛ.

⁶Kwa nza ŋkɛ kaŋele yitenyɛ wəzege, kazhɛne nda ghə wəzha makwa ke meghekɛ, kampa yɛ makwa le meghekɛa za nta. Mbeli nyi ki ghɛa nci ya kaka ghema ta yayata wəndə.

⁷Ama 'ya ne, 'ya kazhɛre nda geva ke Mahwətə, Shala nya ketembele ɗa yaneghe 'ya. Gheŋkɛ nya kaShala ta ɗa nde tefa ghena ta ɗa.

⁸Ma gheyɛ ka jaga ta n'yɛ ne, zlamama yɛ yitea ghen'yɛ ma. Ya ghen'yɛ teɗe n'yɛ ne, katesate n'yɛ ghen'yɛ te ŋkwa. Ya ghen'yɛ nza mbe ŋkwesle, Mahwətə ya kawaŋe ta n'yɛ.

⁹Nda n'yɛ kazereghehwe hwepe wənəa Mahwətə, va nya menete nda jaɗafa ghen'yɛ. Ama katese veci nya tewa n'yɛ dewa ŋkɛ ba'a nya teve n'yɛ ŋkɛ kambeli nyi tiɗiɗi. Katekele n'yɛ ŋkɛ kashave te waŋe ba'a kateve n'yɛ wəshi ganji ŋkɛ.

¹⁰Ma vəa ŋkwa nya tenakɛ wəshi nyi ka jaga ta n'yɛ ne, shewə tenza hɛ va hawe. Ma ke hɛ sha se ka'yɛwe va ghen'yɛ: «Tema Shala Mahwətə ta ŋayɛ gɛ wa?» Kateŋkeɗe geva hɛ mbe hwə seɗa kala rekɛ dzeyi kwa yɛ hweŋkwa, katenewe newe gheɓəmə.

¹¹Katese veci nya tezhɛne mbeli kaŋa zli nya yitea meleme ta ŋayɛ nya wəba. Ma te vecia shɛ ne, mtsehe tenza ghala ta hɛɗia ŋayɛ.

¹²Tagha gɛ, katezhɛne geva ka menəhɛ ŋayɛ kase sha gheyɛ, shave mbe Asiri ba'a same kwa Ɛzhipte, se mɛa Nil ba'a se mɛa Efrate, se mɛa yɛ ndərə ba'a se hwa ghweme.

¹³Ma bela ta hɛɗi lema nya ketene ne, kaɓerama tenza ŋkɛ va 'yaghwa mehele ta mbeli nyi te.

¹⁴Shala, ya mbelia ŋa le geta keya wəshia ŋa. Kaghəa nci hɛ te hɛɗi kwa ghwele ghwele nya dzasle kwa yɛ wəfe. Ya hɛ kala nya vəashi mbe Bashan ba'a mbe Gala'ad!

¹⁵Kala nya te və nya fəakave n'yɛ na mbe Ɛzhipte ne, ncɛte n'yɛ wəshi meŋelea ŋa!

¹⁶Katenakɛ kweci hwelefefi ba'a katenza hɛ shewə va hawe, ya kwela nza hɛ kaka berete. Kateɗepe ghena kegeze hɛ ba'a kateɗe hɛ kafa ghena we.

¹⁷Keləwə yatenini hɛ kala shishi ba'a kala wəshi nyi kentsehe geva dzate te hɛɗi. Kateshave hɛ le bare bare mbe ŋkwa kewəfərə ta nci sha gha Shala Mahwətə ta n'yɛ. Kateghazlənə hɛ va berete ta ŋa.

¹⁸Kwete Shala shɛ kala gha na? Ma gha ne, kayaɓe beze ghena na, kakelemte jaɗafa ta mbelia ŋa nyi ketene teghweme na te wənə. Kanza hwepe wənəa ŋa ndimə ndimə we, ama kancɛ n'yɛ ganyɛa mehele ta ŋa na.

¹⁹Zhɛne ne, katezhɛ heli na yitea ghen'yɛ, kateɓela yɛ jaɗafa ta n'yɛ na we, katebete yɛ fete ta n'yɛ na kwa ŋkwəɗəa ndərə.

²⁰Katencɛ nda ɗe ta ŋa na ke hwelefe ta Zhakob, ganyɛa ŋa na ke hwelefe ta Abraham, kala nya meɗeyi nda na ke ka shihɛ n'yɛ vəashi.