Read KapsikiDC Nahəwm 2 Bible Online

Nahəwm 2 - KapsikiDC bible

Nahəwm 2

¹Ka Zhəwda, wa nya wəndə nya kekele ghena mɛnɛfɛ ganyɛ nya kasawa pelɛ ghəa ghweme, ghena ta kwelɛŋe yazlape ŋkɛ. Mene mə yɛ gəsəkəa ŋayɛ, fə mə wəshi nyi meɗeyi nda yɛ ke Shala kase. Kwa nza ŋkɛ katezhɛne nde ndiremia mehele kaŋkeɗe seɗa ta ŋkɛ te hɛɗia ŋayɛ we, nahe sebe keza te berete ta ŋkɛ.

²Ninive, wa nyi ka sewajɛ nyi kadzeme kaha ŋa mpa. Ka sewajɛ, nza mə dzeyi te zli, wəmbɛne mə ŋkwa nyi dzeyi kwa yɛ hweŋkwa, hi mə geva yitea mpa, jikə mə pɛtɛa berete ta ŋayɛ.

³Nahe ka mefətekwə kefəmte wəshi yitea hwelefefia Zhakob. Nahe hɛ kebezemte yɛ dzeve ta rɛzɛŋe. Ndagwara zləvə yave nda Mahwətə ke Zhakob, kaganda ne, nahe ŋkɛ kenza kazləvəa Israyɛl.

⁴Gelə nyi ghɛmɛa ghɛmɛa ya va ka sewajɛa nde ghema, lekwesa nyi ghɛmɛa ghɛmɛa ya kənəa hɛ. Ma te və nya nza hɛ ɗeke ɗeke kampa ne, kaslesla yɛ wəmata gədəwə kala tse ta ghwə, kagegeɓa yɛ megha.

⁵Kahwɛ yɛ wəmata gədəwə kezha mpa dzeyi kwa yɛ hweŋkwa ba'a te yɛ ŋkwa kebeke. Nahe hɛ kenza kala ghwə te wəvəzə, nahe hɛ kenza wɛre wɛre kala slesla ta va.

⁶Kaheka mbeli nyi te ghəa ka sewajɛa ŋkɛ meghe nya mbe Ninive, ama kabete hɛ te hɛɗi mbe dzeghwa ta nci. Kadzeme zli ka jaga kahe kahe, kawəfərə hɛ wəmbəa ŋkwa.

⁷Taghanyɛ ne, pa gelembe nyi laka yɛ hələ fefelaŋemte geva, pa ghɛa meghe ŋzlamte geva.

⁸Laŋe ka ghema te pa ta shala nya kamale, pa hɛ keleghe ŋkɛ kadzete hɛɗia nci. Ntake mi nyi kese kanewe ghweme te kaghwəghwə kala yɛ ghwəɗəŋkwə. Ntake hɛ katsa hate va ndiremi nya te hɛ.

⁹Nahe Ninive kenza kala weta nya kendətsə. «Ghereŋe mə, ghereŋe mə», ke mbeli sha lewela ne, ama wəndə shɛ kazhɛre geva hwa mbeli nyi kehwɛ we.

¹⁰Fə mə mze kwa tere tere, fə mə mze kwa tɛawetɛa! Kakiɗi mcɛlə nyi mbe Ninive we, mama ta wəshi ganji ya mbe.

¹¹Nahe pɛtɛa wəshi kefəhwe geva, kempəmte geva ba'a keŋkeɗemte geva. Nahe mbeli kenza keyirə yirə, kampempa geva yɛ seɗa, kabare bare pɛtɛa geva ta nci ba'a kanza kema ta nci tɛarawe rawe.

¹²Kawa zhɛrenyɛ ghweɓea nivɛrə gɛ wa? Nahe ŋwalea nivɛrə kese kaŋ'we wəshi kezeme ta nci te. Ma vəa ŋkwa nya dzemte pəli nivɛrə ne, wəndə shɛ kakwaɗakɛ ŋwalea ŋkɛ we.

¹³Nahe ŋeza nivɛrə kese kakese ba'a kaslekwe nda wəshi keseɗa ke ŋemalea nivɛrə ba'a ke ŋwalea nivɛrə. Nahe ŋkɛ kese kampɛafe yɛ ghweɓea ŋkɛ le sli nyi keslekwe slekwe ta wəshi keseɗa nyi keseke ŋkɛ.

¹⁴Ma ke Mahwətə nde berete gezete: «Ninive, katesate 'ya te ŋkwa yitea gha, katetere yɛ wəmata kempa ta ŋa 'ya hɛmɗɛke, Katempə mempɛhwetɛtia ŋa nyi kala ŋwalea nivɛrə kwamte mpa. Katefɛa ŋwasle ŋkwa ta ŋa 'ya te hɛɗi, katezhɛne mbeli kafa mɛa ka ghwene ta ŋa we.»