Read KapsikiDC Sofoni 1 Bible Online

Sofoni 1 - KapsikiDC bible

Sofoni 1

¹Ghena nya gezete nda Mahwətə ke Sofoni, wəzege ta Kəwshi, wəzege ta Gedaliya, wəzege ta Amariya, wəzege ta Ɛzɛkiyas, vəa ŋkwa nya nza Zhoziyas, wəzege ta Amon kameghe mbe Zhəwda.

²Ma ke Mahwətə: «Kateza sebe 'ya te pɛtɛa wəshi nyi te hɛɗi lema.

³Kateza sebe 'ya te mbeli ba'a wəshi keseɗa, 'yɛ nyi yitea ghweme ba'a kelepe nyi kwa ndərə, kateza sebe 'ya te ka 'yaghwa mehele ba'a slene ta nci nyi ndiremi ndiremi. Wəndə shɛ katesərə 'ya te hɛɗi lema we. 'Ya Mahwətə nde gezete.

⁴'Ya kateɗa Zhəwda ba'a pɛtɛa mbeli nyi mbe Zhɛrəzalɛm. 'Ya kateza sebe te wəshi nyi ketene yitea dzeghe nda melɛ ke Ba'al te ŋkwa nya ba'a sləa ka dzeghe nda melɛ ke shala shɛ.

⁵'Ya kateza sebe te ka dzeme dɛɓere nyi kənəa cɛ kezha hawe va yɛ saseregwa, te ka gwəɗəŋə kwa kema ta Mahwətə le zeme fela te sləa shala Molɛk.

⁶Ma 'ya Mahwətə ne, 'ya kateza sebe te ka zhɛre ɗa wəmbə nyi keɗema kazele ɗa ba'a nyi keɗema kafa ghena va 'ya.»

⁷Nza mə tikə tikə kwa kema ta Shala Mahwətə, kwa nza ŋkɛ takwa takwa vecia Mahwətə kase. Nahe Mahwətə kehite melɛ, nahe ŋkɛ keveyi mbeli nyi hekakɛ ŋkɛ tekeleke.

⁸Ma ke Mahwətə gezete: «Ma te vecia melɛa ɗa ne, kateɗa mbeli nyi te ghə, ŋwalea meghe ba'a pɛtɛa ka seɗe lekwesa kala ka se se 'ya.

⁹Ma te vecia shɛ ne, 'ya kateɗa pɛtɛa ka ŋsle bale dzawa kənəa ŋkwa nya mɛa ghɛa Shala, pɛtɛa ka viɗi ghɛa nde sleke hɛ le wəshi nyi fəke hɛ le berete ba'a mbəɗəkwə.»

¹⁰Ma ke Mahwətə: «Ma te vecia shɛ mbe Zhɛrəzalɛm ne, katekwaɗe yɛ lewela mɛa mɛ degha ta yɛ Kelepe, yɛ ŋgaɗe ghə mbe Meleme Mɛnɛfɛ ba'a gaka nya wəba dzeyi pelɛ yɛ wəmbə.

¹¹Tsa mə lewela, gheyɛ mbeli nyi mbe Meleme nya te ŋwela, kwa nza ŋkɛ katempə pɛtɛa ka zhɛre dzeve, kateza sebe te pɛtɛa ka dzeghe mze kwa tɛawetɛa te kiləwə.

¹²Ma te vəa shɛ ne, katendə ghwə 'ya te wəvəzə kezha zele ŋkwa nya mbe Zhɛrəzalɛm. Kateɗa ka menema slene 'ya, ma ke hɛ sha zəzə: ‹Wəsə kwa ganyɛ keɗema kwa ndiremi shɛ kamenete Mahwətə we!›

¹³Yawa, katefə mcɛləa nci mbeli ba'a kateŋzla yɛ ghɛa nci mbeli. Kateŋa yɛ ghɛ hɛ, ama katenza hɛ ki hɛ we, katemɓe yɛ rɛzɛŋe hɛ, ama katesa tɛa nci hɛ we.»

¹⁴Takwa takwa veci nya wəba ta Mahwətə kase, nahe ŋkɛ kenza takwa takwa, se yase ŋkɛ kahe kahe. Katetsa lewela mbeli kwele kwele te vecia Mahwətə, pa le ka katsala kɛfi kateheka ŋkwa kezha kemane.

¹⁵Katenza vecia shɛ kavecia hwepe wənə, kavecia yaka ba'a yirə, kavecia ndiremi ba'a beze, kavecia ŋkwesle ba'a viɗi, kavecia ləmbə ba'a meləkwə ləkwə,

¹⁶kavecia vɛ tereme ba'a tsa kaka yitea meleme nyi berete berete ba'a yitea cɛ nyi bebiya bebiya ta ka ya ŋkwa.

¹⁷Ma ke Shala gezete: «Katebete mbeli 'ya mbe ndiremi, katetsepe tsepe hɛ kala ka ghwələa kɛfi, va nya menete ɗa jaɗafa hɛ, 'ya Mahwətə. Katenza mimia nci te yayata ŋkwa kala keləwə, katedaɗə geva ta nci kala kəsə.»

¹⁸Katembelete hɛ mze kwa tɛawetɛa ta nci keɗema mze kwa tere tere ta nci te vecia hwepe wənəa Mahwətə we. Kateteremte hɛɗi lema ghwə ta hwepe wənəa ŋkɛ. Kaganda ne, dzawe tenza ŋkɛ, kateza sebe ŋkɛ te pɛtɛa mbeli nyi te hɛɗi lema.