Read KapsikiDC Sofoni 2 Bible Online

Sofoni 2 - KapsikiDC bible

Sofoni 2

¹Gheyɛ ka tsewema hawe, tsene mə geva, zəzə mə ghena,

²nda teŋkamte geva yɛ kala cɛkəvə nyi ketaze geva te veci kwetɛŋe, nda teme ghwə ta hwepe wənəa Mahwətə te gheyɛ, nda tedzeghəa gheyɛ vecia hwepe wənəa Mahwətə.

³Gheyɛ pɛtɛa ka dewə ŋeli nyi te hɛɗi lema, zhɛre nda mə geva ke Mahwətə, gheyɛ nyi kehawe va ghena nyi gezete ŋkɛ. Mene mə wəsə nya tiɗiɗi, shifə mə ghəa ŋayɛ kwa kema ta Shala, ya kwete katentaghe geva shimpə kənəa gheyɛ te vecia hwepe wənəa Mahwətə.

⁴Katenza Gaza kewəfə wəfə, katenza Askalon keŋzla ŋzla. Kateŋkamte geva ka Asdod kwa ghə veci, ba'a kateŋzlamte geva meleme ta Ɛkron.

⁵Wa nya ndiremi te gheyɛ, gheyɛ nyi kese mbe Kaftor, nyi kenza ŋayɛ dzeyi mɛa ndərə gɛ! Ma ke Mahwətə gezete ghena te gheyɛ: «Gha Kanan, hɛɗia ka Filisti, 'ya kateza sebe 'ya te gha, katezhɛne mbeli kanza te gha we.

⁶Katezhɛre hɛɗia ŋa nya mɛa ndərə kaŋkwa keya wəshi keseɗa, kagamba kezha ka ya wəshi ba'a kagəzhi kezha timɛti.»

⁷Katenza ka Zhəwda nyi ketene teghweme hɛɗia shɛ. Kateya wəshi keseɗa ta nci hɛ te, ma hetɛhwɛɗi ne, kahɛ hɛ dzeyi ki ghɛ nyi mbe Askalon. Kwa nza ŋkɛ ma Shala Mahwətə ta nci ne, katezhɛ heli ŋkɛ yitea hɛ ba'a katezhɛre nza ta nci ŋkɛ.

⁸Nahe 'ya kefate yɛ ŋele ta ka Mowab ba'a yɛ yiɗə ta ka Amon. Nahe hɛ keŋelekɛ mbelia ɗa ba'a kemtsehete hɛɗia nci laka kele hɛɗia mbelia ɗa.

⁹Vatse gɛ, wa nya ghena nya geze 'ya gheci gheci, 'ya Mahwətə nde berete, Shala ta Israyɛl nya: Katezhɛre Mowab kala Sodome ba'a katezhɛre ka Amon kala Gomore. Katenza hɛɗia nci katigə ba'a kantərəa ghwene. Katenza ŋkɛ kaɓerama kaghala ghala. Katefə wəshia nci mbelia ɗa nyi ketene teghweme ba'a katekele hɛɗia nci hɛ.

¹⁰Nya ya kaɗa nya teŋ'we hɛ tewəmbəreke kele ghə ta nci. Kaganda ne, nahe hɛ keŋelekɛ mbelia Mahwətə nde berete ba'a kemtsehete hɛɗia nci laka kele hɛɗia mbelia ɗa.

¹¹Katenza Mahwətə dzawe sha hɛ, kateza sebe ŋkɛ te pɛtɛa shala nyi te hɛɗi. Tagha gɛ, kategwəɗəŋə pɛtɛa hwelefefi nyi cakeɗa cakeɗa kwa kema ta ŋkɛ, yayata hwelefe te hɛɗia ŋkɛ.

¹²Ma gheyɛ ka Ɛtiyopi perə ne, katempə ŋayɛ 'ya kwamte mpa.

¹³Kateɗa hɛɗi nya laka bela kwa gwela ŋkɛ, katezhɛre Asiri ŋkɛ kakwəfi. Katebeze meleme ta Ninive nya ketezhɛre kaɓerama nya keghwele ghwele ŋkɛ.

¹⁴Ma te ŋkwa nya se meleme ne, katenza mama wəshi keseɗa. Katehɛ yɛ təwəvəŋə ba'a yɛ sheware dzeyi kwa ghəa yɛ seləa ŋkɛ. Katefa yɛ kwaɗe ta yɛ 'yɛ mbeli mɛa wəfela nyi dzeyi te yɛ cɛ. Mɛ ŋkwa kedzeki ne, deke kwəfi yanewe mbeli. Katefelaŋemte geva yɛ za ta lekeleke.

¹⁵Wa nya tsetse tenza meleme nya nza nya zlama mbe, nya newe ghəa nci nya mbeli nyi mbe gwezlayɛ, ma ke hɛ sha se kageze: «Wəndə shɛ kala gheɓəmə we!» Yawa, wa nya ŋkɛ kezhɛrenyɛ kakwəfi, kaŋkwa kewəfərə ta wəshi keseɗa gɛ! Pɛtɛa mbeli nyi kedzeyi vare kavɛ figwə ba'a kagagəzə ghə.