Read KapsikiDC Zakari 10 Bible Online

Zakari 10 - KapsikiDC bible

Zakari 10

¹'Yɛwe mə va Mahwətə kezha me ŋayɛ va cimə ŋkɛ. Gheŋkɛ nde me va nyi jama jama. Kateme ŋayɛ va Mahwətə kwele kwele ba'a katepese wəshi mbe wəvea yayata wəndə.

²Ma wəshi nyi zhɛrete nyi yɛ kashala ne, tseŋwə yasla ŋayɛ hɛ. Ghena tseŋwə yaɓela ka ŋa zlera, Slə kwa ghena nyi geze ŋayɛ hɛ we, kasefə gweɗakwe ŋkwa ta nci. Vatse nda ndendeŋe mbeli kala wəshi keseɗa nyi te yaka, kwa ɗema nde ya wəshi shɛ.

³Ma ke Shala: «Nahe wənəa ɗa kehwepe va ka ya wəshi nyi kesleke mbelia ɗa, 'ya kateve ɗa te zhɛfa lɛməa shɛhɛ. Kaganda ne, 'ya katekemane mbelia ɗa nyi kaka Zhəwda, 'ya Mahwətə nde berete. 'Ya katepa gədəwə kempa ta ɗa nya nza zləvə te.

⁴Mbe Zhəwda teshave pelɛa shihə, sheghwəa cɛ lekwesa ba'a rəgi kempa. Shave mbe teshave mbeli nyi te ghə pɛtɛ.

⁵Kala ka katsala kɛfi tenza hɛ, kateŋkeɗe mbeli nyi kempa le hɛ hɛ kala rekɛ nya dzeyi kwa yɛ hweŋkwa. Katempa hɛ kala nyagha, kwa nza ŋkɛ ne, le hɛ 'ya, 'ya Mahwətə. Shewə tenza ka zleɗe gədəwəa lɛməa ka jaga va hawe.

⁶Kateve nda berete 'ya ke ka Zhəwda, katembele ka Israyɛl 'ya. Katezhɛne hɛ 'ya kase va nya zhɛ heli 'ya yitea hɛ. Katenza hɛ kala wəsə nya ghama 'ya kaneghakɛ hɛ. Kwa nza ŋkɛ ne, 'ya ya kaMahwətə Shala ta nci, katefa səkwə ta nci 'ya.

⁷Katenza ka Ɛfrayim kaka katsala kɛfi. Katezlama hɛ kala wəsə nya sahwe tɛ hɛ. Ma ketenakɛ hɛ ŋwalea nci ne, katezlama hɛ ba'a katenza wənəa nci fare fare te Mahwətə.

⁸Kateheka mbelia ɗa 'ya ba'a katetsene hɛ 'ya, kwa nza ŋkɛ ne, nahe 'ya ketarete kambele hɛ. Kwele kwele tenza hɛ kala nya vəashi.

⁹Nahe 'ya keŋkiŋkisəyi hɛ hwa kweci hwelefefi kala nya ŋkisə ha mbeli. Ama te hɛɗi nyi cakeɗa cakeɗa shɛhɛ ne, katezəzə ɗa hɛ. Wərə hɛ kanza te hɛɗia shɛhɛ le ŋwalea nci, kwa sebe ta ŋkɛ, katezhɛne geva hɛ kase.

¹⁰Katefə hɛ 'ya same kwa Ɛzhipte ba'a katetsene hɛ 'ya shave pelɛ Asiri. Katefə 'ya kadzeme hɛɗia Gala'ad ba'a kadzeme yɛ ghweme ta Liban. Ya tsagha shɛ ŋkɛ ne, dewə tenza ŋkwa kezha hɛ.

¹¹Katejive hɛ te ndərəa Ɛzhipte. 'Ya Mahwətə nde teɗa gaŋkeɓe ta ndərə. Hehase tenza yɛ ŋkwəɗəa hələa Nil. Ghwəpə teteɗe kele ghəa Asiri, rayɛ teza berete ta Ɛzhipte.

¹²Kateve nda berete 'ya ke mbelia ɗa, 'ya Mahwətə, wəshi nyi ɗe 'ya yatemene hɛ. 'Ya Mahwətə nde gezete.»